¹ Naboine Mukama ng'ayemereire ku mbali kw'ekyoto: n'atumula nti Kubba emitwe, emiryango gikankane: era bamenyeemenye ku mitwe gy'abo bonabona; era ndiita n'ekitala ow'enkomerero ku ibo: tewalibba ku ibo aliiruka, so tewalibba ku ibo aliwona n'omumu. ² Waire nga basima okutuuka mu magombe, omukono gwange gulibatoolayo; era waire nga baniina okutuuka mu igulu, ndibateeka okubatoolayo. ³ Era waire nga beegisira ku ntiiko ya Kalumeeri, ndikeneenya ne mbatoolayo; era waire nga bagisiibwe amaiso gange mu buliba bw'enyanza wansi, ndiragirira eyo omusota ne gubaluma. ⁴ Era waire nga baaba mu busibe mu maiso g'abalabe baabwe, ndiragirira eyo ekitala ne kibaita: era nditeeka amaiso gange ku ibo olw'okuleeta obubbiibi so ti busa. ⁵ Kubanga Mukama, Katonda ow'eigye, niiye oyo akoma ku nsi n'esaanuuka, ne bonabona abagibbamu baliwuubaala; era eritumbiirira dala wamu nga Omwiga; era eriika ate nga Omwiga ogw'e Misiri; ⁶ niiye oyo azimba amanyu ge mu igulu, era eyateekerewo eibbanga lye ku itakali; ayeta amaizi ag'omu nyanza n'agafuka ku maiso g'olunalu; Mukama niilyo eriina lye. ⁷ Imwe temuli ng'abaana b'Abaesiyopya gye ndi, ai abaana ba Isiraeri? bw'atumula Mukama. Tinatoire Isiraeri mu nsi y'e Misiri ne mbaniinisya, ne ntoola Abafirisuuti e Kafutoli, n'Abasuuli e Kiri? ⁸ Bona, amaiso ga Mukama Katonda gali ku bwakabaka obulina ebibbiibi, era ndibuzikirirya okuva ku maiso g'eitakali; kyoka tindizikiririrya dala nyumba ya Yakobo, bw'atumula Mukama. ⁹ Kubanga, bona, ndiragira era ndikonjera enyumba ya Isiraeri mu mawanga gonagona, ng'eŋaanu bw'ekonjerwa mu lugali, naye tewalibba na kaweke na kamu akaligwa ku itakali. ¹⁰ Abalina ebibbiibi bonabona ab'omu bantu bange balifa n'ekitala abatumula nti Obubbiibi tebulitutuukaku so tebulitutangira. ¹¹ Ku lunaku olwo ndisimba eweema ya Dawudi eyagwire, ne nziba ebituli byayo; era ndisimba ebibye ebyagwire, era ndigizimba nga mu naku egy'eira; ¹² kaisi balye ekitundu kya Edomu ekifiikirewo, n'amawanga gonagona agatuumibwa eriina lyange, bw'atumula Mukama akola kino. ¹³ bona, enaku giiza, bw'atumula Mukama, akabala lw'alituuka ku oyo akungula, n'oyo asamba eizabbibu lw'alituuka ku oyo asiga ensigo; n'ensozi giritonya omwenge omuwoomereri, n'obusozi bwonabwona bulisaanuuka. ¹⁴ Era ndiiryawo obusibe bw'abantu bange Isiraeri, kale balizimba ebibuga ebyalekeibwrwo, ne babityamamu; era balisimba ensuku egy'emizabbibu, ne banywa omwenge gwamu; era balirima enimiro, ne balya ebibala byamu. ¹⁵ Era ndibasimba ku nsi yaabwe, so tebalisimbulwa ate mu nsi gye mbawaire, bw'atumula Mukama Katonda wo.