¹ Atyo Mukama Katonda bwe yandagire: era, Bona, yabbumbire enzige ebimerereri nga bitanwire okumera; era, Bona, byabbaire bimerereri okukungula kwa kabaka nga kuweire. ² Awo olwatuukire bwe guamalire okulya omwido ogw'omu nsi kaisi ntumula nti Ai Mukama Katonda, sonyiwa, nkwegayiriire: Yakobo yayemerera atya? kubanga mutono. ³ Mukama ne yejusa olw'ekyo: Tekiribbaawo, bw'atumula Mukama. ⁴ Atyo Mukama Katonda bwe yandagire: kale, bona, Mukama Katonda n'ayeta abantu okuwakana n'omusyo; ne gwokya obuliba obunene, era gwandimalirewo n'olukalu. ⁵ Awo kaisi ne ntumula nti Ai Mukama Katonda, lekayo, nkwegayiriire: Yakobo yayinza atya okwemerera? kubanga mutono. ⁶ Awo Mukama ne yejusa ekyo: Era n'ekyo tekiribbaawo, bw'atumula Mukama Katonda. ⁷ Atyo bwe yandagire: kale, bona, Mukama n'ayemereire ku mbali kw'ekisenge ekyazimbiibwe n'empunga epima, era ng'akwaite omugwa ogupima mu mukono gwe. ⁸ Awo Mukama n'ankoba nti obona ki? Ne nkoba nti Omuguwa ogupima. Awo Mukama n'atumula nti Bona, nditeeka omuguwa ogupima wakati w'abantu bange Isiraeri; tindibabitaku ate lwo kubiri: ⁹ n'ebifo ebigulumivu ebya Isaaka birirekebwawo, n'ebifo ebitukuvu ebya Isiraeri birizikibwa; era ndigolokokera ku nyumba ya Yerobowaamu n'ekitala. ¹⁰ Awo Amaziya kabona ow'e Beseri n'atumira Yerobowaamu kabaka wa Isiraeri ng'atumula nti akwekobeire wakati mu nyumba ya Isiraeri: ensi teyinza kugumiinkiriza bigambo niiby byonbyona. ¹¹ Kubanga bw'atumula ati nti Yerobowaamu alifa n'ekitala, era Isiraeri talireka kutwalibwa nga musibe okuva mu nsi ye. ¹² Era Amaziya n'agamba nti iwe omuboni, yaba weirukire mu nsi ya Yuda, oliire eyo emere, olagulire eyo: ¹³ naye tolagulanga ate lwo kubiri e Beseri: kubanga nookyo ekifo ekitukuvu ekya kabaka, era niiyo enyumba ya kabaka. ¹⁴ Awo kaisi nairamu n'akoba Amaziya nti Nabbaire tindi nabbi, so tinabbaire mwana wa nabbi; naye nabbaire musumba era musalili w'emisukomooli: ¹⁵ Mukama n'antoola ku mulimu ogw'okusengererya ekisibo, Mukama n'ankoba nti yaba olagule abantu bange Isiraeri. ¹⁶ Kale wulira ekigambo kya Mukama: Otumula nti Tolagulanga ku Isiraeri, so totonyesyanga ku nyumba ya Isaaka; ¹⁷ Mukama kyava atumula ati nti Mukali wo alibba mwenzi mu kibuga, ne batataane bo na bawala bo baligwa n'ekitala, n'ensi yo erigabibwa n'omugwa; weena mweene olifiira mu nsi eteri nongoofu, era Isiraeri talireka okutwalibwa nga omusibe okuva mu nsi ye.