¹ nkukuutirira mu maiso ga katonda no kristo yesu, alisalira omusango abalamu n'abafu, era n'olw'okuboneka kwe n'obwakabaka bwe; ² buuliranga ekigambo; kubbiririzyanga mu ibbanga erisaaniramu n’eritasaaniramu; weranga, nenyanga, buuliriranga n'okugumiikirizia kwonakwona n'okwegeresya. ³ kubanga ebiseera biriiza lwe batalikirirya kuwulira kwegeresya kwo bulamu; naye, amatu nga gabasiiwa, balikuŋaania abegeresya ng'okwegomba kwabwe ibo bwe kuli; ⁴ baliigala amatu okulekanga amazima, balikyama okusengereryanga enfumu obufumu. ⁵ naye iwe tamiirukukanga mu byonabyona, bonaabonanga, kolanga omulimu ogw'omubuulizi w'enjiri, tuukiriryanga okuweererya kwo. ⁶ kubanga nze atyanu nfukibwa, n'ebiseera eby'okulekulibwa kwange bituuse. ⁷ nwaine okulwana okusa, olugendo ndutuukirye, okwikirirya nkukuumire: ⁸ ekisigaireyo, engisisiibwe engule ey'obutuukirivu mukama waisu gy'alimpeera ku lunaku ludi, asala emisango egy'ensonga: so ti niinze nzenka naye era ne bonabona abataka okuboneka kwe. ⁹ fuba okwiza gye ndi mangu: ¹⁰ kubanga dema yandekerewo, ng'ataka emirembe egya atyanu, n'ayaba e sesalonika; kulesuke e galatiya, tito e dalumatiya. ¹¹ luka niiye eyabbaire awamu nanze yenka. twala mako, omuleete wamu naiwe; kubanga angasa olw'okuweerezya. ¹² naye tukiko namutumire mu efeso. ¹³ ekivaalo kye nalekere mu tulowa ewa kappo, bw'olibba ng'oiza, kireete, n'ebitabo, naye, okusinga, bidi eby'amadiba. ¹⁴ alegezanda omuweesi w'ebikomo yankolere obubbiibi bungi: mukama waisu alimusasula ng'ebikolwa bye bwe byabbaire: ¹⁵ oyo weena omwekuumanga; kubanga yaziyizire inu ebigambo byaisu. ¹⁶ mu kuwozya kwange okw'oluberyeberye wabula eyanyambire, naye bonabona banjabuliire: nsaba baleke okukibalirwa. ¹⁷ naye mukama waisu yayemereire kumpi nanze, n’ampa amaani; nze kaisi ntuukirizie kye mbuulira, era ab'amawanga bonabona kaisi bawulire: ne ndokoka mu munwa gw'empologoma. ¹⁸ mukama waisu yandokolanga mu buli kikolwa ekibbiibi, era yankuumanga okutuusia ku bwakabaka bwe obw'omu igulu: aweebwenga ekitiibwa emirembe n'emirembe. amiina. ¹⁹ sugirya pulisika ne akula, n'ennyumba ya onesifolo. ²⁰ erasuto yabbaire mu kolinso: naye tulofiimo namulekere mu mireeto ng'alwaire. ²¹ fuba okwiza ebiseera by'empewo nga nga bikaali kutuuka. ewubulo akusugiirye, ne pudente, ne lino, ne kulawudiya, n'ab'oluganda bonabona. ²² mukama waisu abbenga n'omwoyo gwo. ekisa kibbenga naimwe.