¹ Awo Isubosesi mutaane wa Sawulo bwe yawuliire Abuneeri ng'afiiriire e Kebbulooni, emikono gye ni giyongobera, Abaisiraeri bonabona ni beeraliikirira. ² Era Isubosesi mutaane wa Sawulo yabbaire n'a basaiza babiri abaami b'e bibiina: omumu eriina lye Baana n'o w'o kubiri eriina lye Lekabu, bataane ba Limoni Omubeerosi ow'o ku baana ba Benyamini: (kubanga n'e Beerosi kibalirwa Benyamini: ³ ab'e Beerosi ni bairukira e Gitayimu ne babba eyo na guno gwiza.) ⁴ Era Yonasaani mutaane wa Sawulo yabbaire n'o mwana eyalemaire ebigere. yabbaire yaakamala emyaka itaanu ebigambo bwe byatuukire okuva mu Yezuleeri ebya Sawulo n'o Yonasaani, omuleri we n'a musitula n'a iruka: awo olwatuukire bwe yayanguwire okwiruka n'agwa n'a lemala. N'e riina lye lyabbaire Mefibosesi. ⁵ Awo bataane ba Limoni Omubeerosi, Lekabu n'o Baana, ni baaba ni batuuka mu nyumba ya Isubosesi omusana nga gukalirye, bwe yabbaire ng'a wumwire mu iyangwe: ⁶ Ne batoolayo wakati mu nyumba ng'a bataka okusyoma eŋaanu; ni bamusumita ekida: Lekabu n'o Baana mugande we ni bawona. ⁷ Awo bwe baatukire mu nyumba, ng'a galamiire ku kitanda kye mu nyumba ye, ni bamusumita ni bamwita, ni bamuteekaku omutwe, ni batwala omutwe gwe, ni batambula mu ngira eya Alaba ni bakyesya obwire. ⁸ Ne bamuleetera Dawudi omutwe gwa Isubosesi e Kebbulooni, ne bakoba kabaka nti bona omutwe gwa Isubosesi mutaane wa Sawulo omulabe wo eyasagiire obulamu bwo: era Mukama awalanire eigwanga lya mukama wange kabaka watynu ku Sawulo n'o ku izaire lye. ⁹ Awo Dawudi n'airamu Lekabu n'o Baana mugande we, bataane ba Limoni Omubeerosi, n'abakoba nti Mukama nga bw'ali omulamu eyanunwire emeeme yange mu kubona enaku kwonakwona, ¹⁰ omuntu bwe yankobeire nti bona, Sawulo afiire, ng'a lowooza okuleeta ebigambo ebisa, awo ni mukwata ni mwitira e Zikulagi, niiye empeera gye namuwaire olw'e bigambo bye. ¹¹ Kale, abantu ababbiibi nga batyaime omuntu omutuukirivu mu nyumba ye ku kitanda kye, tindisinga einu atyanu kuvunaana musaayi gwe mu mukono gwanyu, ne mbatoola ku nsi? ¹² Awo Dawudi n'a lagira abaisuka be, ni babaita ne babasalaku engalo n'e bigere ne babiwanika ku mbali kw'e kidiba e Kebbulooni. Naye ne batwala omutwe gwa Isubosesi ni baguziika mu magombe ga Abuneeri e Kebbulooni.