¹ Awo Dawudi n'a koba Mukama ebigambo eby'o lwembo luno ku lunaku Mukama kwe yamuwonyeirye mu mukono gw'a balabe be bonabona n'o mu mukono gwa Sawulo: ² n'a tumula nti Mukama nilwo lwazi lwange era ekigo kyange era omulokozi wange, owange nze; ³ Katonda ow'o lwazi lwange, oyo gwe nesiganga; Engabo yange, era eiziga ery'o bulokozi bwange, ekigo kyange ekiwanvu, era ekiirukiro kyange; Omulokozi wange, niiwe omponya mu kyeju. ⁴ Nakungiire Mukama, asaaniire okutenderezebwa: Ntyo bwe nalokokanga eri abalabe bange. ⁵ Kubanga amayengo ag'o kufa gazingizya, amataba ag'o butatya Katonda ni gantiisya. ⁶ Emiguwa egy'e magombe gyaneetooloire: Ebyambika eby'o kufa byantuukireku. ⁷ Bwe naboine enaku ni nkungira Mukama, niiwo awo, nakungiire Katonda wange: n'a wulira eidoboozi lyange ng'a yema mu yeekalu ye, okukunga kwange ni kutuuka mu matu ge. ⁸ Ensi kaisi n'e sagaasagana n'etengera, emisingi gy'e igulu ni gijulukuka ni gitengerezebwa, kubanga asunguwaire. ⁹ Omwoka ne gunyooka okuva mu nyindo gye, n'o musyo ogwaviire mu munwa gwe ni gwokya: ni gukwata amanda. ¹⁰ Yakutamirye n'e igulu n'a serengeta; endikirirya enziyivu ne bba wansi w'e bigere bye. ¹¹ Ne yeebagala kerubi n'a buuka: niiwo awo, yabonekeire ku biwawa by'e mpewo. ¹² N'afuula endikirirya okubba eweema egimwetoolooire: Amaizi we gakuŋaanira, ebireri ebiziyivu eby'o mu igulu. ¹³ Okumasamasa okwabbaire mu maiso ge ni kwakisya amanda ag'o musyo. ¹⁴ Mukama n'a bwatuka ng'a yema mu igulu, ali waigulu inu n'a leeta eidoboozi lye. ¹⁵ N'alasa obusaale n'a basaansaanya; n'a weererya okumyansa n'a beeraliikirirya. ¹⁶ Awo ensalosalo egy'e nyanja kaisi ne giboneka, E emisingi gy'e nsi ni gyeruka, olw'okunenya kwa Mukama, Olw'o kufuuwa omwoka ogw'o mu nyindo gye. ¹⁷ Yatumire ng'a yema waigulu n'a ntwala; N'a mpalula n'a ntoola mu maizi amangi; ¹⁸ N'a mponya eri omulabe wange ow'a maani, Eri abo abankyawa; kubanga banyingire Amaani. ¹⁹ Bangwireku ku lunaku kwe nabonekeire enaku: Naye Mukama niiye yanywezerye. ²⁰ Era n'a nfulumya n'a ndeeta mu kifo ekigazi: Yamponyerye kubanga ya nsanyukiire. ²¹ Mukama yampire empeera ng'o butuukirivu bwange bwe bwabbaire: Ansaswire ng'o bulongoofu bw'e ngalo gyange bwe bwabbaire. ²² Kubanga na kuumanga amangira ga Mukama, So tingiranga ku Katonda wange lwe kyeju. ²³ Kubanga emisango gye gyonagyona gy'a bbanga mu maiso gange: N'a mateeka ge tigavangamu. ²⁴ Era nabbanga eyatuukiriire eri iye, ni neekuuma mu butali butuukirivu bwange. ²⁵ Mukama kyaviire ansasula ng'o butuukirivu bwange bwe bwabbaire: Ng'o bulongoofu bwange bwe bwabbaire mu maiso ge. ²⁶ Awali ow'e kisa yeraganga we kisa, awali omuntu eyatuukiriire yeraganga mutuukirivu; ²⁷ Awali omulongoofu yeraganga mulongoofu; Era awali omukakanyali yeraganga aziyizya. ²⁸ Era olirokola abantu abaabonyabonyezebwa: Naye amaiso go galingirira ab'a malala obaikye wansi. ²⁹ Kubanga niiwe tabaaza yange, ai Mukama: Era Mukama alyakira endikirirya yange. ³⁰ Kubanga ku lulwo ngiruka mbiro ni numba ekibiina: Ku lwa Katonda wange mbuuka ekigo: ³¹ Katonda engira niiyo yatuukiriire: Ekigambo kya Mukama kyakemeibwe; oyo niiyo ngabo eri abo bonabona abamwesiga. ³² Kubanga niiye ani Katonda wabula Mukama? Oba yani lwazi wabula Katonda waisu? ³³ Katonda niikyo ekigo kyange eky'a maani: Era aluŋamya eyatuukiriire mu ngira ye. ³⁴ Afuula ebigere bye okubba (ng'e bigere) by'e nangaazi: Era anteeka ku bifo byange ebigulumivu. ³⁵ Ayegeresya engalo gyange okulwana; Emikono gyange ne gitega omutego ogw'e kikomo. ³⁶ Era ompaire engabo ey'o bulokozi bwo: N'o buwombeefu bwo bungulumizirye. ³⁷ Wagaziyirye ebisinde byange wansi wange, Ebigere byange ni bitatyerera. ³⁸ Nayiganya abalabe bange, ne mbazikirirya; So nakyukire ate nga bakaali kumalibwawo. ³⁹ Era mbamalirewo ne mbasumitira dala n'o kusobola ni batasobola kugolokoka: Niiwo awo, bagwire wansi w'e bigere byange. ⁴⁰ Kubanga onsibire amaani ag'o kulwana: Owangwire wansi wange abo abangolokokeraku. ⁴¹ Era abalabe bange obankubbisirye amabega, nzikirirye abo abankyawa. ⁴² Balingire naye wabula wo kulokola; Balingiriire Mukama naye n'atabairamu. ⁴³ Awo ni mbasekulirasekulira dala ng'e nfuufu ey'o ku nsi, Nabasamba ng'e bitosi eby'o mu nguudo ne mbasaansaanya. ⁴⁴ Era omponyerye mu kuwakana kw'a bantu bange; n'o nkuuma okubba omutwe gw'a mawanga: Eigwanga lye ntamanyanga lirimpeererya. ⁴⁵ Banaigwanga balinjeemulukukira: Nga baakaiza bampulire baliŋondera. ⁴⁶ Banaigwanga baliweerera, Era baliva mu bifo byabwe eby'e kyama nga batengera. ⁴⁷ Mukama mulamu; era lwazi lwange atenderezebwe; Agulumizibwe Katonda ow'o lwazi olw'o bulokozi bwange: ⁴⁸ Niiye Katonda ampalanira eigwanga, N'aitisya amawanga wansi wange, ⁴⁹ Era antoola mu balabe bange: Niiwo awo, ongulumizirye okusinga abo abangolokokeraku: Omponyerye eri omusaiza ow'e kyeju. ⁵⁰ Kyenaaviire nkwebalya, ai Mukama, mu mawanga, ni nyemba okutendereza eriina lyo. ⁵¹ Awa kabaka we obulokozi obunene: Era amukola eby'e kisa ekingi oyo gwe yafukireku amafuta, Dawudi n'e izaire lye emirembe gyonagyona.