¹ Awo Yowaabu mutaane wa Zeruyiya n'a tegeera ng'o mwoyo gwa kabaka guli eri Abusaalomu. ² Yowaabu n'atuma e Tekowa n'a syomayo omukali ow'a magezi n'a mukoba nti nkwegayiriire, weefuule ng'a fiiriirwe, ovaale ebivaalo eby'o kufiirwa, nkwegayiriire, so tosaaba mafuta, naye weefuule ng'o mukali eyaakamala ebiseera bingi ng'a kungira omufu: ³ oyingire eri kabaka omukobe otyo. Awo Yowaabu n'a muweererya ebigambo. ⁴ Awo omukali ow'e Tekowa bwe yatumwire n'o kabaka, n'a vuunama amaiso ge ni yeeyanzya n'a tumula nti mbeera, ai kabaka. ⁵ Kabaka n'a mukoba nti obbaire otya? N'airamu nti Mazima nze ndi Mukali namwandu, n'o ibawange yafiire. ⁶ Era omuzaana wo yabbaire n'a baana babiri, ni balwana bombiri ku itale, so nga wabula w'o kubataasya, naye omumu n'a sumita mwinaye n'a mwita. ⁷ Kale, bona, ekika kyonakyona kimugolokokeireku omuzaana wo era batumwire nti waayo oyo eyasumitire mugande we tumwite olw'o bulamu bwa mugande we gwe yaitire; twite tutyo n'o musika: kale batyo balikirya eryanda lyange erisigairewo, ni batamulekera ibawange liina waire ekitundu ekifiikirewo ku itakali lyonalyona. ⁸ Awo kabaka n'a koba omukali nti yaba ewuwo, nzena n'a lagira ebigambo byo bwe byabba. ⁹ Awo omukali ow'e Tekowa n'akoba kabaka nti Mukama wange, ai kabaka, obutali butuukirivu bubbe ku nze n'o ku nyumba ya itawange: kabaka abbe nga abulaku musango n'e ntebe ye ey'o bwakabaka. ¹⁰ Kabaka n'a tumula nti buli eyakukobanga ekigambo kyonakyona, omuleetanga gye ndi so talikukwataku lwo kubiri. ¹¹ Awo kaisi n'atumula nti nkwegayiriire, kabaka aijukire Mukama Katonda wo, awalana eigwanga lw'o musaayi aleke okweyongera okuzikirirya, baleke okuzikirirya mutaane wange. N'a tumula nti Mukama nga bw'ali omulamu, tiwalibba luziiri lumu lwa mutaane wo oluligwa wansi. ¹² Awo omukali n'a tumula nti nkwegayiriire, omuzaana wo atumule ekigambo n'o mukama wange kabaka. N'atumula nti tumula. ¹³ Omukali n'a tumula nti kale wateeserye ki ekigambo ekifaanana kityo eri abantu ba Katonda? kubanga kabaka bw'a tumula ekigambo ekyo, ali sooti aliku omusango, kubanga kabaka takomere awo eika owuwe eyabbingiibwe. ¹⁴ Kubanga kitugwanira okufa, era tuliŋanga amaizi agabitire wansi agatasoboka kuyooleka ate; so Katonda tatoolawo bulamu, naye y'a sala amagezi oyo eyabbingiibwe aleke okuba omwiruki gy'ali. ¹⁵ Kale kubanga ngizire okutumula ekigambo ekyo n'o mukama wange kabaka, kyenviire ngiza kubanga abantu bantiisirye: omuzaana wo n'a tumula nti atyanu natumula n'o kabaka; koizi kabaka alikola omuzaana we by'a mwegayiriire. ¹⁶ Kubanga kabaka yawulira, okuwonya omuzaana we mu mukono gw'o musaiza ataka okunzikirirya fembiri n'o mutaane wange okututoola mu busika bwa Katonda. ¹⁷ Awo omuzaana wo Kaisi n'a tumula nti nkwegayiriire, ekigambo kya mukama wange kabaka kibbe kyo kusanyusya: kubanga mukama wange kabaka aliŋanga malayika wa Katonda okwawulamu ebisa n'e bibbiibi: era Mukama Katonda wo abbe naiwe. ¹⁸ Awo kabaka kaisi nairamu n'akoba omukali nti Tongisa, nkwegayiriire, ekigambo kyonakyona kye naakubuulya. Omukali n'atumula nti Mukama wange kabaka atumule atyanu. ¹⁹ Kabaka n'a tumula nti Omukono gwa Yowaabu guli naiwe mu bino byonabyona? Omukali n'a iramu n'a tumula nti nga iwe bw'oli omulamu, mukama wange kabaka, wabula asobola okukyama ku mukono omulyo waire ku mugooda okuva ku kigambo kyonakyona mukama wange kabaka ky'atumwire: kubanga omwidu wo Yowaabu niiye yandagiire, era niiye yaweereire omuzaana wo ebigambo bino byonabyona: ²⁰ okuwaayisya ekigambo bwe kifaanana omwidu wo Yowaabu kyaviire akola kino: era mukama wange mugezigezi ng'a magezi bwe gali aga malayika wa Katonda, okumanya byonabyona ebiri mu nsi. ²¹ Kabaka n'a koba Yowaabu nti bona, ekigambo kino nkikolere: kale yaba omwiryewo omwisuka Abusaalomu. ²² Awo Yowaabu n'a vuunama amaiso ge, ni yeeyanzya, ne yeebalya kabaka: Yowaabu n'atumula nti watyanu omwidu wo amaite nga ŋanjire mu maiso go, mukama wange, ai kabaka, kubanga kabaka akolere omwidu we ky'amwegayiriire. ²³ Awo Yowaabu n'a golokoka n'a yaba e Gesuli n'a leeta Abusaalomu e Yerusaalemi. ²⁴ Kabaka n'a tumula nti aireyo mu nyumba ye iye, yeena aleke okubona amaiso gange. Awo Abusaalomu n'a irayo mu nyumba ye, n'a tabona maiso ga kabaka. ²⁵ Awo mu Isiraeri yenayena temwabbaire n'o mumu wo kutenderezebwa nga Abusaalomu olw'o busa bwe: okuva ku bigere bye wansi okutuuka ku bwezinge bw'o mutwe gwe nga bulaku kabbiibi. ²⁶ Awo bwe yasalanga enziiri gye, (era buli mwaka bwe gwawangaku n'a gisalanga: kubanga, gyamuzitoowereranga kyeyaviire agisala:) n'a pima enziiri egy'o ku mutwe gwe ni gibba sekeri bibiri, ng'o kupima kwa kabaka bwe kwabbaire. ²⁷ Awo Abusaalomu n'azaalirwa abaana ab'o bwisuka basatu n'o w'o buwala mumu, eriina lye Tamali: yabbaire mukali wa maiso masa. ²⁸ Awo Abusaalomu n'a mala emyaka ibiri emirambirira mu Yerusaalemi; n'a tabona maiso ga kabaka. ²⁹ Awo Abusaalomu n'a tumya Yowaabu, okumutuma eri kabaka; naye n'a takiirirya kwiza gy'ali: awo n'atumya ate omulundi ogw'okubiri, naye n'a taikirirya kwiza. ³⁰ Kyeyaviire akoba abaidu be nti bona, enimiro ya Yowaabu eriraine n'e yange, era alina sayiri eyo; mwabe mugyokye. Awo abaidu ba Abusaalomu ni bookya enimiro. ³¹ Awo Yowaabu kaisi n'a golokoka n'a iza eri Abusaalomu mu nyumba ye n'a mukoba nti Abaidu bo bookyeirye ki enimiro yange? ³² Abusaalomu n'a iramu Yowaabu nti bona nakutumiire nga ntumula nti iza wano, nkutume eri kabaka okutumula nti ngiziriire ki okuva e Gesuli? mba kubba eyo ne watyanu kyandibaire kisa gye ndi: kale mbone amaiso ga kabaka; era oba nga mulimu obutali butuukirivu mu nze, angite. ³³ Awo Yowaabu n'a iza eri kabaka n'a mukobera: awo bwe yayetere Abusaalomu, n'a iza eri kabaka, n'a vuunama amaiso ge mu maiso ga kabaka: kabaka n'a nywegera Abusaalomu.