¹ Awo olwatuukire Sawulo ng'a malire okufa, Dawudi ng'airirewo ng'a malire okwita Abamaleki, era Dawudi ng'amalire enaku biri e Zikulagi: ² awo olwatuukire ku lunaku olw'o kusatu, bona, omusaiza n'ava mu lusiisira eri Sawulo ng'a kanwire ebivaalo bye n'eitakali nga liri ku mutwe gwe: awo olwatuukire bwe yaizire eri Dawudi, n'avuunama ni yeeyanzya. ³ Dawudi n'a mukoba nti Ova waina? N'amukoba nti Mponere mu lusiisira lwa Isiraeri. ⁴ Dawudi n'a mukoba nti byabbaire bitya? Nkwegayiriire, nkobera. N'airamu nti Abantu bairukire mu lutalo, era n'a bantu bangi bagwire bafiire; n'o Sawulo n'o Yonasaani mutaane we bafiire boona. ⁵ Dawudi n'akoba omwisuka eyamukobeire nti omanyira ku ki nga Sawulo n'o Yonasaani mutaane we bafiire? ⁶ Omwisuka eyamukobeire n'a tumula nti bwe nabbaire ndi awo ku lusozi Girubowa, bona, Sawulo ni yeesigika ku isimu lye; awo, bona, amagaali n'a beebagala embalaasi ni bamucoca. ⁷ Awo bwe yakebukire, n'a mbona n'a njeta. Ni ngiramu nti Ninze ono. ⁸ N'ankoba nti niiwe ani? Ne mwiramu nti nze ndi Mwamaleki. ⁹ N'ankoba nti Nkwegayiriire, yemerera ku mbali kwange ongite, kubanga obubalagali bunkwaite; kubanga obulamu bwange bukaali bulamu mu nze. ¹⁰ Awo ne nyemerera ku mbali kwe, ni mwita, kubanga nategeereire dala nga tasobola kubba omulamu ng'amalire okugwa: ne ntwala engule eyabbaire ku mutwe gwe n'e kikomo ekyabbaire ku mukono gwe, era mbireetere wano eri mukama wange. ¹¹ Awo Dawudi n'akwata engoye gye n'agikanula; era batyo abasaiza bonabona Ababbaire naye: ¹² ni bawuubaala ni bakunga amaliga ne basiiba ne bazibya obwire, olwa Sawulo n'olwa Yonasaani mutaane we n'o lw'a bantu ba Mukama n'o lw'e nyumba ya Isiraeri; kubanga bagwire n'e kitala. ¹³ Dawudi n'a koba omwisuka eyamukobeire nti oli wa waina? N'a iramu nti Ndi mwana wa munaigwanga, Omwamaleki. ¹⁴ Dawudi n'a mukoba nti kiki ekyakulobeire okutya okugolola omukono gwo okuzikirirya oyo Mukama gwe yafukireku amafuta? ¹⁵ Dawudi n'ayeta omumu ku baisuka n'a tumula nti Sembera omugweku. N'a musumita n'afa. ¹⁶ Dawudi n'amukoba nti Omusaayi gwo gubbe ku mutwe gwo; kubanga omunwa gwo niiye mujulizi gy'oli ng'otumula nti ngitire oyo Mukama gwe yafukireku amafuta. ¹⁷ Awo Dawudi n'a kungubagira Sawulo n'o Yonasaani mutaane we okukungubaga kuno: ¹⁸ n'alagira okwegeresya abaana ba Yuda (olwembo) olw'o mutego: bona, lwa wandiikiibwe mu kitabo kya Yasali. ¹⁹ Ekitiibwa kyo, ai Isiraeri, kiitiibwe ku bifo byo ebigulumivu. Ab'a maani nga bagwire! ²⁰ Ti mukikoberenga mu Gaasi, ti mukyatulanga mu nguudo gya Asukulooni; Abawala b'Abafirisuuti baleke okusanyuka, Abawala b'a batali bakomole baleke okujaguza. ²¹ Imwe ensozi gya Girubowa, ku imwe kuleke okubaaku omusulo waire amaizi, waire ensuku egy'e biweebwayo: Kubanga eyo engabo ey'a b'a maani gye yasuuliibwe obubbiibi, engabo ya Sawulo, ng'a taafukiibweku mafuta. ²² Omutego gwa Yonasaani tegwakyukanga nyuma okuva ku musaayi gw'a baitibwe, ku masavu g'a b'a maani, n'e kitala kya Sawulo ti kyairangawo nga kyereere. ²³ Sawulo n'o Yonasaani babbaire basa era b'o kusanyusya mu bulamu bwabwe, n'o mu kufa kwabwe tebayawuliibwe; Babbaire be mbiro okusinga eikookoma, babbaire ba maani okusinga empologoma. ²⁴ Imwe abawala ba Isiraeri, mukungire Sawulo, Eyabavaalisirye engoye egitwakaala egy'o kwesiima, eyayonjere ebivaalo byanyu n'e zaabu. ²⁵ Ab'a maani nga bagwire wakati mu lutalo! Yonasaani aitiibwe ku bifo byo ebigulumivu. ²⁶ Nkunakuwaliire, mugande wange Yonasaani: Wansanyusyanga inu dala: Okutaka kwo gye ndi kwabbaire kwe kitalo, nga kusinga okutaka kw'a bakali. ²⁷ Ab'a maani nga bagwire, n'e byokulwanyisya nga bizikiriire!