¹ Kale bwe tulina Ebyasuubiziibwe ebyo, abaatakibwa, twenaabyengaku obugwagwa bwonabwona obw'omubiri n'obw'omwoyo, nga tutuukirirya obutukuvu mu kutya Katonda ² Mutukirirye: tetwonoonanga muntu yenayena, tetwiguliriranga muntu yenayena, tetulyazaamaanyanga muntu yenayena: ³ Tintumwire kubanenya: kubanga eira natumwire nga muli mu myoyo gyaisu okufiira awamu naimwe n'okubba abalamu awamu naimwe. ⁴ Ntumula n'obuvumu bungi eri imwe, neenyumirizia inu ku lwanyu: ngizwiire Inu eisanyu, nsukiriire okujaguza mu bibonoobono byaisu byonabyona. ⁵ Kubanga era bwe twaizire mu Makedoni, omubiri gwaisu ne gutabona kuwummula n'akatono, naye ne tubonaabona eruuyi n'eruuyi; ewanza wabbaireyo entalo, mukati mwabbairemu okutya. ⁶ Naye asanyusia abawombeefu niiye Katonda, n'atusanyusa ife, olw'okwiza kwa Tito; ⁷ so ti lwo kwiza kwe kwonka, era naye olw'okusanyusibwa kwe yasanyusiibwe mu imwe, bwe yatubuuliire okwegomba kwanyu, okunakuwala kwanyu, okunyiinkira kwanyu ku lwange; nzeena Kyenaviire neeyongera okusanyuka. ⁸ Kuba waire nga nabanakuwairye n'ebbaluwa yange, tinejusa, waire nga namalire okwejusa; kubanga mboine ng'ebbaluwa eyo yabanakuwairye, waire nga yabanakuwairye kaseera. ⁹ Atyanu nsanyukire, tinsanyukire kubanga mwanakuwaziibwe, naye kubanga mwanakuwaire n'okwenenya ne mwenenya: kubanga mwanakuwaire eri Katonda, muleke okufiirwa mu kigambo kyonakyona ku bwaisu. ¹⁰ Kubanga okunakuwala eri Katonda kuleeta okwenenya okw'obulokozi okutejusibwa: naye okunakuwala okw'omu nsi kuleeta okufa ¹¹ Kubanga, bona, okunakuwala okwo eri Katonda nga kwabaleeteire okufuba okungi, era n'okuwozia ensonga yanyu, era n'okusunguwala, era n'okutya, era n'okwegomba, era n'okunyiinkira, era n'okuwalana eigwanga! Mu byonabyona mwetegeeza nga muli balongoofu mu kigambo ekyo. ¹² Kale waire nga Nabawandiikiire, tinawandiikire ku lw'oyo eyakolere obubbiibi; waire ku lw'oyo eyakolere obubi, wabula okunyiinkira kwanyu ku lwaisu kaisi kubonesebwe eri imwe mu maiso ga Katonda. ¹³ Kyetwaviire tusanyusibwa: ne mu kusanyusibwa kwaisu, ne tweyongera inu okusanyuka olw'eisanyu lya Tito, kubanga omwoyo gwe gwawumuziibwe imwe mwenamwena. ¹⁴ Kuba oba nga neenyumirizia mu kigambo kyonakyona ku lwanyu eri oyo, tinakwatiibwe nsoni; naye nga bwe twababuuliire byonabyona mu mazima, era kutyo n'okwenyumirizia kwaisu eri Tito kwabbaire kwa mazima. ¹⁵ N'okutaka kwe okw'omunda kweyongeire inu dala okubba gye muli, ng'aijukira okugonda kwanyu mwenamwena, bwe mwamusembezerye n'okutya n'okutengera. ¹⁶ Nsanyukire kubanga mu byonabyona nguma omwoyo mu imwe.