¹ Atyanu ngiza gye muli omulundi ogw'okusatu. Mu munwa gw'abajulizi ababiri oba basatu buli kigambo kirinywera. ² Naboneka era mboneka, nga bwe nakolere bwe nabbaire eyo omulundi ogw'okubiri, era ne atyanu ntyo nga mbulayo, mbakoba abo abaayonoonere eira n'abandi bonabona, nti bwe ndiiza ate, tindisaasira; ³ kubanga munsagira ekitegeeza nga Kristo atumulira mu nze; atali munafu eri imwe, naye alina amaani mu imwe: ⁴ kubanga yakomereirwe olw'obunafu, naye mulamu olw'amaani ga Katonda. Kubanga feena tuli banafu mu iye, naye tuliba balamu awamu naye olw'amaani ga Katonda eri imwe. ⁵ Mwekebere mwenka oba nga muli mu kwikirirya; mwekeme mwenka. Oba temwetegeera mwenka nga Yesu Kristo ali mu imwe? wabula nga muli abatasiimibwa. ⁶ Naye nsuubira nga mulitegeera nga ife tetuli batasiimibwa. ⁷ Era tusaba Katonda imwe mulekenga okukola obubbiibi bwonabwona; ti niife okuboneka ng'abasiimibwa, wabula imwe okukolanga obusa ife ne bwe tulibba ng'abatasiimibwa. ⁸ Kubanga tetuyinza kuziyizia mazima, wabula okugayamba. ⁹ Kubanga tusanyuka ife bwe tuba abanafu, mweena bwe mubba n'amaani: era na kino tukisaba, imwe, okutuukirira. ¹⁰ Kyenviire mpandiika ebyo nga tindi eyo, bwe mba eyo ndeke okubba omukambwe, ng'obuyinza bwe buli Mukama waisu bwe yampaire olw'okuzimba, so ti lwo kumenya. ¹¹ Eky'enkomerero, ab'oluganda, mweraba. Mutuukirire; musanyusibwe; mulowooze bumu; mubbe n'emirembe: ne Katonda ow'okutaka n'emirembe yaabbanga naimwe. ¹² Musugiryagane n'okunywegera okutukuvu. Abatukuvu bonabona babasugirye. ¹³ Ekisa kya Mukama waisu Yesu Kristo, n'okutaka kwa Katonda, n'okwikirirya ekimu okw'Omwoyo Omutukuvu, bibbenga naimwe mwenamwena.