¹ Abali mu bufuge abaidu balowoozenga bakama baabwe beene nga basaaniire ekitiibwa kyonakyona, eriina lya Katonda n'okwegeresya kwaisu birekenga okuvumibwa. ² Era abalina bakama baabwe abaikiriya tebabanyoomanga, kubanga bo luganda; naye beeyongerye okubasembezia, kubanga abaikirirya ekimu mu kukolebwa okusa baikirirya era batakibwa. Yegeresyanga ebyo obibuulirirenga. ³ Omuntu yenayena bw'ayegeresyanga obundi, so nga taikirirya bigambo byo bulamu, niibyo bya Mukama waisu Yesu Kristo, n'okwegeresya okusengereryanga okutya Katonda; ⁴ nga yeekulumbazia, nga bulaku ky'ategeera, wabula okukalambizia obukalambizi empaka n'entalo egy'ebigambo, omuva eiyali, okutongana, okuvuma, okuteerera obubbiibi, ⁵ okukaayana kw'abantu abayonooneka amagezi, abatoleibweku amazima, nga balowooza ng'okutya Katonda niikwo kufuna amagoba. ⁶ Naye okutya Katonda wamu n'obutayaayaananga niigo magoba amangi: ⁷ kubanga titwaleetere kintu mu nsi, kubanga era tetusobola kutoolamu kintu; ⁸ naye bwe tubba n’emere n'ebyokuvaala, ebyo byatumalanga. ⁹ Naye abataka okugaigawala bagwa mu kukemebwa ne mu mutego n'okwegomba okungi okw'obusirusiru okwonoona, okwinika abantu mu kugota n'okuzikirira. ¹⁰ Kubanga okutaka ebintu niikyo kikolo ky'ebbiibi byonabyona: waliwo abantu abayaayaaniira ebyo, ne bakyamizibwa okuva mu kwikirirya, ne beefumitira dala n'enaku enyingi. ¹¹ Naye iwe, omuntu wa Katonda, irukanga ebyo,osengereryenga obutuukirivu, okutya Katonda, okwikirirya, okutaka, okugumiinkiriza, obuwombeefu. ¹² Lwananga okulwana okusa okw'okwikirirya, nywezanga obulamu obutawaawo, bwe wayeteirwe, n'oyatula okwatula okusa mu maiso g'abajulizi abangi. ¹³ Nkulingirira mu maiso ga Katonda, awa byonabyona obulamu, ne Kristo Yesu eyategeezerye okwatula okusa eri Pontio Piraato; ¹⁴ weekuumenga ekiragiro awabula eibala, awabula kyo kunenyezebwa, okutuusa ku kukuboneka kwa Mukama waisu Yesu Kristo: ¹⁵ kw'aliraga mu ntuuko gy'akwo Mwene buyinza yenka atenderezebwa, Kabaka wa bakabaka, era Mukama w'abaami; ¹⁶ alina obutafa yenka, atyama mu kutangaala okutasemberekeka; omuntu yenayena gw'atabonangaku, so wabula ayinza okumubona: aweebwenga ekitiibwa n'obuyinza obutawaawo. Amiina. ¹⁷ Okuutirenga abagaiga ab'omu mirembe gya atyanu obuteegulumizyanga, waire okwesiga obugaiga obutali bwo lubeerera, wabula Katonda, atuwa byonabyona olw'obugaiga kaisi twesanyusyenga n'ebyo; ¹⁸ bakolenga obusa, babeerenga abagaiga mu bikolwa ebisa, babbenga bagabi, baikiriryenga kimu; ¹⁹ nga beegisira eky'okwemereraku ekisa olw'ebiseera ebyaba okwiza, kaisi banywezenga obulamu dala dala. ²⁰ Ai Timoseewo, kuumanga kye wagisisiibwe, nga weewala ebigambo ebibulamu ebitali bya Katonda n'okulwana kw'ebigambo eby'okutegeera, okwetebwa kutyo mu bubbeyi; ²¹ waliwo abantu abeegomba okubba nakwo, ne bakyama mu kwikirirya. Ekisa kibbenga naimwe.