¹ Naye Omwoyo atumula lwatu nti mu naku egy'oluvanyuma walibbaawo abaliva mu kwikirirya, nga bawulira emyoyo egigotya n'okwegeresya kwa basetaani, ² olw'obunanfuusi bw'ababbeyi, nga bookyebwa emyoyo gyabwe nga n'ekyoma ekyokya, ³ nga bawera okufumbirwagananga era nga balagira okulekanga eby'okulya, Katonda bye yatondere biriibwenga mu kwebalya abaikiriya ne bategeerera kimu amazima. ⁴ Kubanga buli kitonde kya Katonda kisa, so wabila kyo kusuula bwe kitoolebwa n'okwebalya: ⁵ kubanga kitukuzibwa na kigambo kya Katonda n'okusaba. ⁶ Bwewaijukiryanga ab'oluganda ebyo, wabbanga muweereza musa owa Kristo Yesu, ng'okulira mu bigambo eby'okwikirirya n'eby'okwegeresya okusa kwe wasengereirye: ⁷ naye enfumu egitali gye eidiini egy'obusirusiru gy'obbe olekanga. Weemanyiriryenga okutya Katonda: ⁸ kubanga okwemanyirirya kw'omubiri kugasa kaseera katono; naye okutya Katonda kugasa mu byonabyona, kubanga kulina okusuubiza kw'obulamu obwa atyanu n'obw'obwaba okwiza. ⁹ Ekigambo ekyo kyesigwa era ekisaanira okwikirizibwa kwonakwona. ¹⁰ Kubanga kyetuva tutegana ne tufuba, kubanga twasuubiire Katonda omulamu, Omulokozi w'abantu bonabona, okusinga w'abaikirirya, ¹¹ Lagiranga ebyo obyegeresyenga, ¹² Omuntu yenayena takunyoomanga lwa buvubuka bwo; naye bbanga kyo kuboneraku eri abo abaikirirya mu kutumulanga, mu kutambulanga: mu kutakanga, mu kwikiriryanga, mu kubbanga omulongoofu. ¹³ Okutuusia lwe ndiiza, nyiikiranga mu kusoma, n'okubuuliriranga, n'okwegeresyanga. ¹⁴ Tolekanga kirabo ekiri mu iwe, kye waweweibwe olw'obunabbi awamu n'okuteekebwaku emikono gy'abakaire. ¹⁵ Ebyo obirowozenga, obbenga mu ebyo; okubitirira kwo kubonekenga eri bonabona. ¹⁶ Weekuumenga wenka n'okwegeresya kwo. Nyiikiriranga mu ebyo; kubanga bw'okola otyo, olyerokola wenka era n'abo abakuwulira.