¹ Kubanga imwe mwenka, ab'oluganda, mumaite ng'okuyingira kwaisu gye muli tekwabbaire kwo bwereere: ² naye bwe twamalire okubonaabona okukolerwa ekyeju mu Firipi, nga bwe mumaite, ne tugumira mu Katonda waisu okubuulira gye muli enjiri ya Katonda mu kufuba okungi. ³ Kubanga okubuulirira kwaisu ti kwo bubbeyi, so ti kwo bugwagwa, so ti mu bukuusa: ⁴ naye nga bwe twasaanyiziibwe Katonda okugisisibwa enjiri, bwe tutumula tutyo, ti ng'abataka okusiimibwa abantu, wabula Katonda akema emyoyo gyaisu. ⁵ Kubanga tetubbanga ne kigambo eky'okwegondya, nga bwe mumaite, waire n'ensonga ey'okugisa okwegomba, Katonda niiye mujulizi; ⁶ waire nga tusagira ekitiibwa eri abantu, waire eri imwe, ⁷ Naye twabbaire bawombeefu mu imwe, ng'omuleri bw'aijanjaba abaana be iye: ⁸ tutyo bwe twabalumiirwe omwoyo, ne tusiima okubagabira, ti njiri ya Katonda yonka, era naye n'emyoyo gyaisu ife, kubanga mwabbaire batakibwa baisu inu. ⁹ Kubanga mwijukira, ab'oluganda, okufuba kwaisu n'okutegana: bwe twakolanga emirimu emisana n'obwire, obutazitoowereranga muntu yenayena ku imwe, ne tubabuuliranga enjiri ya Katonda. ¹⁰ Niimwe bajulizi era ne Katonda, bwe twabbanga n'obutukuvu n'obutuukirivu awabula kunenyezebwa eri imwe abaikirirya: ¹¹ nga bwe mumaite ife bwe twabbaire edi buli muntu ku imwe, nga itawabwe bw'abba eri abaana be, nga tubabuulirira era nga tubagumya emyoyo era nga tutegeeza, ¹² kaisi mutambulenga nga bwe kisaanira Katonda abeeta okuyingira mu bwakabaka bwe iye n'ekitiibwa. ¹³ Feena kyetuva twebalya Katonda obutayosya, kubanga bwe mwaweweibwe ife ekigambo eky'okuwulirwa, niikyo kya Katonda, temwakitoire nge kigambo kya bantu, naye nga bwe kiri amazima, ekigambo kya Katonda, n'okukola ekikolera mu imwe abaikirirya. ¹⁴ Kubanga imwe, ab'oluganda, mwasengereirye ekanisa gya Katonda egiri mu Buyudaaya mu Kristo Yesu: kubanga mwena mwabonyaabonyezeibwe mutyo ab'eigwanga lyanyu imwe, nga boona bwe baabonyaabonyezeibwe Abayudaaya; ¹⁵ abaitire Mukama waisu Yesu ne banabbi, era abatubbingire, so tebasiimibwa Katonda, era balabe ba bantu bonabona; ¹⁶ nga batuziyizia okubuulira ab'amawanga kaisi balokoke; okutuukiriya ebibbiibi byabwe enaku gyonagyona: naye obusungu bubatuukireku obumalira dala. ¹⁷ Naye ife, ab'oluganda, bwe mwatwawukanireku akaseera akatono (akadidiiri), mu maiso ti mu mwoyo, tweyongera inu okufuba okubabona mu maiso ganyu n'okubalumirwa einu omwoyo: ¹⁸ kubanga tutaka okwiza gye muli, nze Pawulo omulundi ogw'oluberyeberye era n'ogw'okubiri; Setaani n'atuziyizia. ¹⁹ Kubanga eisuubi lyaisu ki oba isanyu oba ngule ey'okwenyumirizia? Bwe mutabba imwe, mu maiso ga Mukama waisu Yesu mu kwiza kwe? ²⁰ Kubanga niimwe kitiibwa kyaisu n'eisanyu.