¹ Baana bange abatobato, mbawandiikire ebyo mulekenga okukola ekibbiibi. Era omuntu yenayena bw'akola ekibbiibi, tulina Okumuwozereya eri Itawaisu, Yesu Kristo omutuukirivu: ² n'oyo niigwo mutango olw'ebibbiibi byaisu; so ti lwe bibbiibi byaisu fenka, era naye n'olw'ensi gyonagyona. ³ Era ku kino kwe tutegeerera nga tumutegeire, bwe tukwata ebiragiro bye. ⁴ Atumula nti Mutegeire, n'atakwata biragiro bye, niiye mubbeeyi, n'amazima gabula mu oyo; ⁵ naye buli akwata ekigambo kye, mazima okutaka kwa Katonda nga kumalire okutuukirizibwa mu oyo. Ku kino kwe tutegeerera nga tuli mu niiye: ⁶ atumula ng'abba mu iye kimugwanira yena mwene okutambulanga era nga iye bwe yatambwire. ⁷ Abatakibwa, timbawandiikira kiragiro kiyaaka, wabula ekiragiro eky'eira, kye mwamanyire okuva ku luberyeberye; ekiragiro ekyo eky'eira niikyo kigambo kye mwawulire. ⁸ Ate mbawandiikira ekiragiro ekiyaka, ekigambo eky'amazima mu iye ne mu imwe; kubanga endikiriria ewaawo, n'omusana ogw'amazima atyanu gwaka. ⁹ Atumula ng'ali mu musana n'akyawa mugande, ng'akaali mu ndikirirya ne atyanu. ¹⁰ Ataka mugande abba mu musana, era wabula kimwesitazia. ¹¹ Naye akyawa mugande ali mu ndikirirya, era atambulira mu ndikirirya, so nga tamaite gy'ayaba, kubanga endikirirya yamuzibire amaiso. ¹² Mbawandiikira imwe, abaana abatobato, kubanga ebibbiibi byanyu bibasonyiyibwe olw'erina lye. ¹³ Mbawandiikira imwe, abakaire, kubanga mutegeire oyo eyabbairewo okuva ku luberyeberye. Mbawandiikire imwe, abavubuka, kubanga muwangwire omubbiibi. Mbawandiikire imwe, abaana abatobato, kubanga mutegeire Itawaisu. ¹⁴ Mbawandiikire imwe, abakaire, kubanga mutegeire oyo eyabbairewo okuva ku luberyeberye. Mbawandiikire imwe, abavubuka, kubanga mulina amaani, n'ekigambo kya Katonda kibba mu niimwe, era muwangwire omubbiibi. ¹⁵ Temutakanga nsi waire ebiri mu nsi. Omuntu yenayena bw'ataka ensi, okutaka kwa Itawaisu tekubba mu iye. ¹⁶ Kubanga buli ekiri mu nsi, okwegomba kw'omubiri, n'okwegomba kw'amaiso, n'okwegulumizia kw'obulamu okubulamu, tebiva eri Itawaisu, naye biva eri ensi. ¹⁷ Era ensi ewaawo, n'okwegomba kwayo; naye akola Katonda by'ataka abbeerera emirembe egitawaawo. ¹⁸ Abaana abatobato, niikyo ekiseera eky'enkomerero, era nga bwe mwawulire ng'omulabe wa Kristo aiza, ne atyanu waliwo abalabe ba Kristo bangi; kyetuva tutegeera nga niikyo kiseera eky'enkomerero. ¹⁹ Baviire mu niife, naye tebabbaire b'ewaisu; kuba singa babbaire b'ewaisu, bandibbaire wamu naife; naye batuviiremu era babonekere bonabona nga ti b'ewaisu. ²⁰ Mwenamwena mufukibwaku amafuta eri Omutuknvu, era mumaite byonabyona. ²¹ Timbawandiikire kubanga temumaite mazima, naye kubanga mugamaite, era kubanga wabula bubbeyi obuva mu mazima. ²² Omubbeyi niiye ani wabula oyo agaana nga Yesu ti niiye Kristo? Oyo niiye omulabe wa Kristo, agaana Itawaisu n'Omwana. ²³ Buli muntu yenayena agaana Omwana, ne Itawaisu nga tali naye; ayatula Omwana, ne Itwaisu ali naye. ²⁴ Imwe kye mwawuliire okuva ku luberyeberye kibbenga mu imwe. Kye mwawulira okuva ku luberyeberye bwekyabbanga mu imwe, mwena mwabbannga mu Mwana ne mu Itawaisu. ²⁵ Na kuno niikwo kusuubiza kwe yatusuubizirye, obulamu obutawaawo. ²⁶ Ebyo mbawandiikire olw'ebigambo by'abo abakyamya. ²⁷ Mwena okufukibwaku amafuta kwe mwaweweibwe iye kubba mu imwe, so temwetaaga muntu yenayena okubayigirizanga; naye ng'okufuka kwe okw'amafuta bwe kubayigiriza mu bigambo byonabyona, era kwa mazima so ti bubbeyi, era nga bwe kwabayigirizirie, mubbenga mu iye. ²⁸ Ne atyanu, abaana abatobato, mubbenga mu iye; bw'alibonesebwa kaisi tubbe n'obugumu, era ensoni gireke okutukwatira mu maiso ge mu kwiza kwe. ²⁹ Oba nga mumaite nga mutuukirivu, era mutegeera nga buli muntu yenna akola obutuukirivu yazaaliibwe iye.