¹ Mubone okutaka bwe kuli okunene Itawaisu kwe yatuwaire, ife okwetebwanga abaana ba Katonda; era bwe tuli. Ensi kyeva ereka okututegeera, kubanga teyamutegeire iye. ² Abatakibwa, atyanu tuli baana ba Katonda, so kikaali kubonesebwa kye tulibba. Tumaite nti bw'alibonebonesebwa tulifaanana nga iye; kubanga tulimubona nga bw'ali. ³ Era buli muntu yenayena alina eisuubi eryo mu iye yetukuzia ng'oyo bw'ali omutukuvu. ⁴ Buli muntu yenayena akola ekibbiibi, akola n'obujeemu; era ekibbiibi niibwo bujeemu. ⁵ Era mumaite ng'oyo yaboneseibwe era atwoirewo ebibbiibi; ne mu iye mubula kibbiibi. ⁶ Buli muntu yenayena abba mu iye takola kibbiibi: buli muntu yenayena akola ekibbiibi nga tamubonangaku, so tamutegeera. ⁷ Abaana abatobato, omuntu yenayena tabakyamyanga; akola obutuukirivu iye mutuukirivu, nga iye bw'ali omutuukirivu; ⁸ akola ekibbiibi wa Setaani; kubanga okuva ku luberyeberye Setaani akola bibbiibi. Omwana wa Katonda kyeyaviire abonesebwa amalewo ebikolwa bya Setaani. ⁹ Buli muntu yenayena eyazaaliibwe Katonda takola kibbiibi, kubanga ensigo ye ebba mu niiye; so tayinza kukola kibbiibi, kubanga yazaaliibwe Katonda. ¹⁰ Ku kino abaana ba Katonda n'abaana ba Setaani kwe babonekera: buli muntu yenayena atakola butuukirivu ti wa Katonda, waire atataka omugande. ¹¹ Kubanga kino niikyo kigambo kye mwawuliire okuva ku luberyeberye ife okutakagananga ¹² ti nga Kayini bwe yabbaire ow'omubbiibi n'aita mugande. Era yamwitiire ki? kubanga ebikolwa bye byabbaire bibbiibi n'ebya mugande bituukirivu. ¹³ Temwewuunyanga, ab'oluganda, ensi bw'ebakyawanga. ¹⁴ Ife tumaite nga twava mu kufa ne tuyingira mu bulamu, kubanga tutaka ab'oluganda. Atataka abba mu kufa. ¹⁵ Buli muntu yenayena akyawa mugande iye mwiti; era mumaite nga wabula mwiti alina obulamu obutawaawo nga bubba mu iye. ¹⁶ Ku kino kwe tutegeerera okutaka, kubanga oyo yawaireyo obulamu bwe ku lwaisu: feena kitugwanira okuwangayo obulamu bwaisu ku lw'ab'oluganda. ¹⁷ Naye buli alina ebintu eby'omu nsi, nalingirira mugande nga yeetaaga, namwigalirawo emeeme ye, okutaka kwa Katonda kubba kutya mu iye? ¹⁸ Abaana abatobato, tuleke okutakagananga mu kigambo ne mu lulimi, naye mu kikolwa ne mu mazima. ¹⁹ Ku kino kwe twategeereranga nga tuli ba mazima ne tukaikania omwoyo gwaisu mu maiso ge, ²⁰ mu buli kigambo omwoyo gwaisu kye gutusalira okutusinga; kubanga Katonda asinga obukulu omwoyo gwaisu, era ategeera byonabyona. ²¹ Abatakibwa, omwoyo bwe gutatusalira kutusinga, tubba n'obugumu eri Katonda; ²² era buli kye tusaba akituwa, kubanga tukwata ebiragiro bye era tukola ebisiimibwa mu maiso ge. ²³ Ne kino niikyo kiragiro kye, twikirirye eriina ly'Omwana we Yesu Kristo, era tutakaganenga, nga bwe yatuwaire ekiragiro. ²⁴ Era akwata ebiragiro bye abba mu iye, naye mu iye. Era ku kino kwe tutegeerera ng'abba mu ife, olw'Omwoyo gwe yatuwaire.