¹ Kale, ab'oluganda, eby'ebirabo eby'omwoyo tintaka imwe obutabitegeera. ² Mumaite bwe mwabbaire ab'amawanga nga mwakyamizibwanga eri ebifaananyi ebitatumula, nga mukyamizibwa mu ngeri yonayona. ³ Kyenva mbategeeza nga wabula muntu bw'atumula mu Mwoyo gwa Katonda akoba nti Yesu Akolimiirwe; so wabula muntu ayinza okutumula nti Yesu niiye Mukama waisu, wabula mu Mwoyo Omutukuvu. ⁴ Naye waliwo enjawulo gy'ebirabo, naye Omwoyo ali mumu. ⁵ Era waliwo enjawulo gy'okuweereza, era Mukama waisu ali mumu. ⁶ Era waliwo enjawulo gy'okukola, naye Katonda ali mumu, akola byonabyona mu bonabona. ⁷ Naye buli muntu aweebwa okulagibwa kw'Omwoyo olw'okugasia. ⁸ Kubanga ogondi Omwoyo amuweesia ekigambo eky'amagezi; n'ogondi aweebwa ekigambo eky'okutegeeranga, ku bw'Omwoyo oyo ⁹ ogondi okwikirirya, ku bw'Omwoyo oyo; n'ogondi ebirabo eby'okuwonyanga, ku bw'Omwoyo mumu; ¹⁰ n’ogondi okukolanga eby'amagero; n'ogondi okubuuliranga; n'ogondi okwawulanga emyoyo: ogondi engeri gy'enimi; n'ogondi okuvuunuzanga enimi: ¹¹ naye ebyo byonabyona Omwoyo oyo omumu niiye abikola, ng'agabira buli muntu omumu nga iye bw'ataka. ¹² Kuba omubiri nga bwe guli ogumu ne gubba n'ebitundu ebingi n'ebitundu byonabyona eby'omubiri, waire nga bingi, niigwo mubiri ogumu; era ne Kristo atyo. ¹³ Kubanga mu Mwoyo omumu fenafena twabatiziibwe okuyingira mu mubiri gumu, oba Bayudaaya oba Bayonaani, oba baidu oba beidembe; fenafena ne tunywesebwa mu Mwoyo mumu. ¹⁴ Kubanga n'omubiri ti kitundu kimu, naye bingi. ¹⁵ Ekigere bwe kitumula nti Kubanga tindi mukono, tindi wo ku mubiri; olwekyo tekibba ekitali kyo ku mubiri. ¹⁶ Era ekitu bwe kitumula nti Kubanga tindi liiso, tindi wo ku mubiri; olwekyo tekibba kitali kyo ku mubiri. ¹⁷ Omubiri gwonagwona singa liiso, okuwulira kwandibbaire waina? Gwonagwona singa kuwulira, okuwunyirirya kwandibbaire waina? ¹⁸ Naye atyanu Katonda yatekerewo ebitundu buli kimu mu mubiri, nga bwe yatakire. ¹⁹ Era byonabyona singa kyabbaire kitundu kimu, omubiri gwandibaire waina? ²⁰ Naye atyanu ebitundu biri bingi, naye omubiri gumu. ²¹ N'eriiso terisobola kukoba mukono nti iwe tinkwetaaga: oba ate omutwe okukoba ebigere nti Imwe timbeetaaga. ²² Naye, ekisinga einu, ebitundu bino eby'omubiri ebirowoozebwa okubba ebinafu byetaagibwa: ²³ n'ebyo eby'oku mubiri bye tulowooza obutabba ne kitiibwa einu, bye tuvaalisia ekitiibwa ekisinga obungi: n'ebitundu byaisu ebitali bisa niibyo bisinga okubba n'obusa; ²⁴ naye ebisa byaisu tebyetaaga: naye Katonda yagaitiire dala wamu omubiri, ekitundu ekyabulireku ng'akiwa ekitiibwa ekisinga obusa; ²⁵ walekenga okubbaawo okwawula mu mubiri; naye ebitundu bibberaganenga bumu byonka na byonka. ²⁶ Era ekitundu ekimu bwe kibonaabona, ebitundu byonabyona bibonabonera wamu nakyo; oba ekitundu ekimu bwe kigulumizibwa, ebitundu byonabyona bisanyukira wamu nakyo. ²⁷ Naye imwe muli mubiri gwa Kristo, n'ebitundu byagwo, buli muntu. ²⁸ Era Katonda yatekerewo mu kanisa abandi, okusooka batume, ab'okubiri banabbi, ab'okusatu abegeresya, ate eby'amagero, ate ebirabo eby'okuwonyanga, abayambi, abafuga, abatumuli b'enimi. ²⁹ Bonabona batume? bonabona banabbi? bonabona begeresi? bonabona bakola eby'amagero? ³⁰ bonabona balina ebirabo eby'okuwonyanga? bonabona batumula enimi? bonabona baavuunula? ³¹ Naye mwegombenga ebirabo ebisinga obukulu. Era mbalaga engira esinga einu obusa.