¹ Paulo, eyayeteibwe okubba omutume wa Yesu Kristo olw'okutaka kwa Katonda, ne Sossene ow'oluganda, ² eri ekanisa ya Katonda eri mu Kolinso, abaatukuzibwa mu Kristo Yesu, abayeteibwe okubba abatukuvu, wamu ne bonabona abeeta eriina lya Mukama waisu Yesu Kristo mu buli kifo, niiye Mukama waabwe era owaisu: ³ ekisa kibbenga gye muli n'emirembe ebiva eri Katonda Itawaisu, ne Mukama waisu Yesu Kristo. ⁴ Neebalya Katonda wange bulijo ku lwanyu, olw'ekisa kya Katonda kye mwaweweirwe mu Kristo Yesu; ⁵ kubanga mu buli kigambo mwagagawaliire mu iye, mu kutumula kwonakwona no mu kutegeera kwonakwona; ⁶ ng'okutegeeza kwa Kristo bwe kwanywezeibwe mu imwe: ⁷ imwe obutaweebuuka mu kirabo kyonakyona; nga mulindirira okubikuliwa kwa Mukama waisu Yesu Kristo; ⁸ era alibanyweza okutuusia ku nkomerero, obutabbaku kyo kunenyezebwa ku lunaku lwa Mukama waisu Yesu Kristo. ⁹ Katonda mwesigwa, eyabeteire okuyingira mu kwikirirya ekimu kw'Omwana we Yesu Kristo Mukama waisu. ¹⁰ Naye mbeegayirira, ab'oluganda, olw'eriina lya Mukama waisu Yesu Kristo, mwenamwena okutumulanga obumu, so okwawukana kulekenga okubba mu imwe, naye mugaitirwenga dala mu magezi gamu no mu kulowooza kumu. ¹¹ Kubanga nabuuliirwe ebifa gye muli, bagande bange, abo ab'omu nyumba yo Kuloowe, ng'eriyo okutongana mu imwe. ¹² Kye kyentumwire niikyo kino nti buli muntu mu imwe atumula nti Nze ndi wa Pawulo; nzeena wa Apolo; nzeena wa Keefa; nzeena wa Kristo: ¹³ Kristo ayawuliibwemu? Pawulo yakomereirwe ku lwanyu? oba mwabatiziibwe okuyingira mu liina lya Pawulo? ¹⁴ Neebalya Katonda kubanga timbatizanga muntu yenayena mu imwe, wabula Kulisupo ne Gaayo; ¹⁵ omuntu yenayena alekenga okutumula nga mwabatiziibwe okuyingira mu liina lyange: ¹⁶ Era nabatiza n'enyumba ya Suteefana: ate timaite nga nabatizire ogondi yenayena. ¹⁷ Kubanga Kristo teyantumire kubatiza, wabula okubuulira Enjiri: ti mu magezi ge bigambo, omusalaba gwa Kristo gulekenga okubba ogw'obwereere. ¹⁸ Kubanga ekigambo eky'omusalaba niibwo busirusiru eri abo abagota; naye eri ife abalokokeibwe niigo maani ga Katonda. ¹⁹ Kubanga kyawandiikibwe nti Ndizikirirya amagezi g'abagezigezi, N'obukabakaba bw'abakabakaba ndibutoolawo. ²⁰ Omugezigezi aliwaina? omuwaadiiki aliwaina? omuwakani ow'omu nsi muno aliwaina? Katonda teyasiruwazirye magezi ge nsi? ²¹ Kubanga mu magezi ga Katonda ensi olw'amagezi gaayo bw'etaategeera Katonda, Katonda n'asiima olw'obusirusiru obw'okubuulira okwo okulokola abo abaikirirya. ²² Kubanga Abayudaaya basaba obubonero, n'Abayonaani basagira amagezi: ²³ naye ife tubuulira Kristo eyakomereirwe, eri Abayudaaya nkonge, n'eri ab'amawanga busirusiru; ²⁴ naye eri abo abeete Abayudaaya era n'Abayonaani, Kristo maani ga Katonda, era magezi ga Katonda. ²⁵ Kubanga obusirusiru bwa Katonda businga abantu amagezi; n'obunafu bwa Katonda businga abantu amaani. ²⁶ Kubanga mulingilire okwetebwa kwanyu, ab'oluganda, ng'ab'amagezi ag'omubiri ti bangi abayeteibwe, ab'amaani ti bangi, ab'ekitiibwa ti bangi: ²⁷ naye Katonda yalondere ebisirusiru eby'ensi, abagezigezi abakwatisye ensoni; era Katonda yalondere ebinafu eby'ensi, akwatisye ensoni eby'amaani; ²⁸ n'ebikopi by'ensi n'ebinyoomebwa Katonda yabirondere era n'ebibulawo, atoolewo ebiriwo: ²⁹ omubiri gwonagwona gulekenga okwenyumiriza mu maiso ga Katonda. ³⁰ Naye ku bw'oyo imwe muli mu Kristo Yesu, eyafuukire amagezi gye tuli okuva eri Katonda, era n'obutuukirivu n'okutukuzibwa, n'okununulibwa: ³¹ nga bwe kyawandiikibwe nti Eyenyumirizia, yeenyumiririzienga mu Mukama.