¹ Do in i poore pwonyo pwony me ateni. ² Miero cuo adongo bed jo kame wigi rieny, ki bed jo kame keto cuny gi, jo oyei yei me ateni i amara kede cungo kitek iyei. ³ Kamanono da mon adongo poore kede iponeso abeco me woro Rubanga, weko bedo jo kame dubo nying jo, ara mino kuo gi doko jo a mer, do ibed jo pwonye me kope abeco ⁴ Tetekeny kitwer pwonyo mon atino, bedo jo kame wigi rieny, maro cuo gi kede maro idwe gi. ⁵ Miero kibed mon ka wigi tio, jo kame li kede caro, jo kame twero daro ude gi kiber, jo kame mwol doko di kijalere iloc ka cuo gi, wek kop ka Rubanga kur ud acae. ⁶ Amanono da pwony cuo da pi bedo jo kame wigi rieny. ⁷ I gi dedede bed ngat kame nyuto tice kame beco; i pwony ni nyut ateni ni kede keto cunyi. ⁸ Pwony kop me ateni, kane ngatamoro likame twero ngolo ni iye kop, di lewic kobino mako ngat kame piemo kedi, pien udo likame etie kede gimoro arac kame eyamo ikomi. ⁹ Pwony ipasoi pi bedo jo kame tie kede wor but jo dongo gi, kede yomo cuny gi kiber igi dedede, di likame ipiemo kede gi. ¹⁰ Kur kitimo kuo, do ki nyut genre gi kitek, tetekeny i gi dedede kikel deyo ikom pwony ka Rubanga, ngalak wa i gi dedede. ¹¹ Piento kisa ka Rubanga kame kelo alako otieko neno but jo dedede. ¹² Epwonyo wa dagi li me woro Rubanga kede dagi mit me lobo, kede pi bedo jo kame dio mit me kom, jo kame tie kede ekite ko poore kede kuo me woro Rubanga i piny kan. ¹³ Di otie daro gen me winyo, kede yabere me deyo ka Rubanga wa ka me dwong kede ngalak wa Yesu Kristo.