¹ Paulo kede Timoteo, kobedo ipasoi a Yesu Kristo, but Joacil i Yesu Kristo kame obedo jo me Pilipi, kede jo piskopi kede jo iweres. ² Kisa bed but wu kede anapakin me Rubanga, kisa kede mulem kame yai ibut Rubanga Papa kede Yesu Kristo bed butu. ³ Ango apwoyo Rubanga na ikare dedede kame ayutuno wu kede. ⁴ Di alego kede yom cuny piru dedede nakanaka i lega na acel acel. ⁵ Pi epone kame inywakunu kede timo tic me Ejiri, cako i ceng me agege tuno nan. ⁶ Doko ango angeo kiber be, ngat kogeo tic aber idiere wu bino mine ecobere i ceng me dwogo ka Yesu Kristo. ⁷ Etie gi opoore pi ango paro piru i epone noni, pien wun itienu icunya, bala kame wun dedede inywakunu karacel keda kisa kame komia di nan ango atie mabus, kede i kare me jurao kede mino Ejiri cungo di etek. ⁸ Rubanga en mujura na kame ngeo be ango aparo wun dedede kede amara ka Kristo Yesu. ⁹ Ango alego be, wek amara wu meede kede dongo, di epong kede ngec kede niang atut. ¹⁰ Tetekeny ikarununu yero gi kaber, manono bino mino ibedunu jo kame li kede raco moro, kede abongo gimoro kame koromo bunano wu iye iceng me dwogo ka Kristo. ¹¹ Di kuo wu opong kede anyakini me kuo kopoore, kame wok kibut Yesu Kristo, pi mino Rubanga deyo kede pi pake ¹² Imiegu kede amiegu na ango amito ingeunu be gikame otimere na ateteni konyo pi sarakino Ejiri. ¹³ Manoni omio Isirikalen kame daro paco me abaka kede jo apat ongeo be kotwea i mabus pi Kristo. ¹⁴ Omio imiegu kede amiegu atot obedo kede yei ikom Rwot pi bedo kede nwangcuny adwong, pi pwonyo kop ka Rubanga abongo lworo. ¹⁵ Ateteni jo mogo pwonyo kop ikom Kristo pien kitie kede nyeko, kede lok, do apat mege pi cuny aber. ¹⁶ Jo kame tatamo kop ikome kede cuny aber timo pi amara di kingeo be ango koketa kan pien jurao Ejiri. ¹⁷ Do jo apat timo pi mit gi kede pi cuny me apokapoka, do weko kede ateni kiparo pi medo na can di atie i ot kol. ¹⁸ Nan do nyo? Gikame pire tek en ine be, i yore moro ni kenekene kotie tatamo kop ikom Kristo akadi bed bala me ecuke arabo me ateni: pi man ango alelo. Ebo, doko abino meede kede ilel. ¹⁹ Pien ango angeo be, pi ilega wu kede pi kony me Tipo ka Yesu Kristo man bino doko alako nango. ²⁰ Ki mit kede gen na, likame lewic bino maka atwal, do nataman kede tek cuny adwong koma bino mino Kristo wor bala lem nakanaka, akadi bed bala akuo amoto ato. ²¹ Pien kibuta, bedo kuo en Kristo do to en ameda. ²² Do kame bedo nango kuo i koma bino mino tic ni nyai likame angeo be ayer do mene. ²³ Kope are gi dia twatwal, mit nango tie be koto a toi di ako ot bedo kede Kristo, pien mano ber kalamo. ²⁴ Do ango dong di kuo ikoma mitere twatwal piru. ²⁵ Bala kame angeo kede kiber, ango be abino dong kuo di ako meede kede wu dedede pi wun meede anyim kede pi ilel iyei. ²⁶ Mano bino mina anywako kede wu wakere I Kristo Yesu ka adwogo bobo butu. ²⁷ Kenekene miunu ekite me kuo wu bed bala kame Ejiri ka Kristo mito, tetekeny akadi ka ango abino pi neno wu arabo li, abino winyo kop ikom wu be icungunu di i tekunu kede cuny acel, kede tam acel, di itienu cane karacel pi yei kame Ejiri okelo ²⁸ Doko di likame jo kwor wu kelo ne wu lworo, man tie gikame nyuto kakaler be gin kibino rwenyo, do wun ibinunu udo alako, man Rubanga en kame bino timo. ²⁹ Piento en etieko mino wu winyo pi kisa mere, likame winyo me yei Kristo kenekene, do da me neno can pire. ³⁰ Bala kame nataman itienu kede auta kame oudo inenunu doko nan iwinyunu be ango atie iye.