¹ Kakame bin Yesu tie wok kede i tempulo, ngasiao mere acel oko waco ne be, “Apwony, neningo twon kide kede twon gedo gi!” ² Yesu oko dwoko ne be, “Mam in itie neno twon gedo gi? Likame tie kidi akadi acel moro kame bino dong cungo i wi kidi ocelu; kame likame kobino reto piny.” ³ Di bin Yesu tie bedo i wi moru me Olibeti, kame oudo pimere kede tempulo, Petero, Yakobo, Yokana kede Anderia oko bino bute gin kiko penye i mung be, ⁴ “Wac ne wa, awene en kame gigi bino timere kede, doko nyo en kame bino bedo gianena kame bino nyuto be kare noni do oyapuno tuno?” ⁵ Di Yesu oko cako waco ne gi be, “Gwokerenu me wek kur ngatamoro rweny wu. ⁶ Pien jo atot oyaro bino i nyinga di kiwaco be, ‘Ango en Krisito!’ di gin kiko bino rwenyo jo atot. ⁷ Doko kame iwinyunu kop me yi, kede rwonge me yi, kur cunyu poti, pien manoni miero ber timere, do udo ajikini likame pwodi otuno. ⁸ Pien ateker bino yi kede ateker ace, doko ajakanut acel da bino yi kede ajakanut ocelu; doko yangere me piny bino bedo tie kabedo apapat doko kec kede can bino bedo tie: da magi tie agege me aramo me can. ⁹ “Do gwokerenu; pien kobino pido wu i nyim kansulon, kede kobino bungo wu i sinagogan, doko kobino tero wu cungo i nyim jopug kede i nyim abakai pira, pi bedo ijura but gi. ¹⁰ Do me agege miero ber tuc ejiri ne atekerin dedede. ¹¹ Do kame gin kimako wu di iko tero wu pido wu i nyim kansulon, kur igeunu bedo kede par pi kop kame ibinunu yamo; do kame esawa oromo, wacunu kop kame kobino keto i dogu: pien kop kame ibinunu yamo likame bino bedo megu do kame wok kibut Tipo Kacil. ¹² Pi mano, omin bino mino rupao omimere di oko neko, papa da kamanono but atin mere, kede idwe da bino dagi jonywal gi, di kiko mino koneko gi. ¹³ Da jo dedede bino dagi wu pira, do ngat kame bino kanyakino tuno i ajikini bino udo alako. ¹⁴ “Do kame inenunu gikame munao kabedo kacil me ka Rubanga kame Daniel enabi oyamo di kosipo ikabedo kalikame oudo epoore bedo iye (miero ngat kame tie somo niang dwong mere), jo kame tie Yudea miero do ringi i wi mori. ¹⁵ Doko dano kame tie i wi ot kur wok piny pi donyo i ot, amotoko edonyi i ot pi kwanyo gimoro. ¹⁶ Doko ngat kame tie i poto kur edok ipaco pi omo egoe. ¹⁷ Otukwi mon kame oyac kede kame doto idwe i ceng nogo! ¹⁸ Legunu, me wek ginogi kur timere i kare me ngico. ¹⁹ Pien ceng go can adwong bino bedo tie kame epone mere lem pwodi likame otimere cako Rubanga cweno piny tuno nan, doko da likame ebino timere. ²⁰ Doko ka koto Rwot likame omio wel me ceng nogo, koto likame ngatamoro obwot. Do pi jo mege kame en eyero, omio Rwot odwodwoko ceng nogo obedo nonok, oudo koto likame tie dano more odong di kuo: do pi jo kame oyero, kame en eyero; omio en edwodwoko ceng go dong nonok. ²¹ I kare nono ka ngatamoro owaco ne wu be, ‘Neni, Krisito ine kan arabo be, ‘Neni, en ica kuca; kur iyeunu. ²² Pien jo kame bino cuko be gin kibedo Krisito, kede inabin me angalo oyaro neno, kibino timo gianena kede gi me aura pi ngalo cuny jo, ka koto twerere kiton jo kame oyero da. ²³ Do gwokerenu, pien ango atieko waco ne wu gi dedede di pwodi kare gi likame otuno. ²⁴ Doko i kare nono di do itidil nono otieko timere, wang ceng bino doko col, duwe likame bino rieny, ²⁵ acerin bino popoto ki malo, akadi twer kame tie malo bino yayangun. ²⁶ Di do gin kiko bino neno Wot ka dano di bino i idoun kede twer adwong kede deyo. ²⁷ Di en eko bino cwano imalaikan mege, gin kiko coko jo kame koyero kame tie i bad ongwon dedede me wi lobo, cako ki agege me lobo tuno i ajikini me malo. ²⁸ Pi mano, siaonu itatam kame yai ki kom yat epigi; Kame ajange mege yoyom di pote ko cako lot, ingeunu kiber be kare me iporo do otuno. ²⁹ Iepone acel nono da, kame inenunu gigi tie timere, ngeunu be en do etieko doko iyapiyapi, kom udo do etuno i okeko. ³⁰ Ateteni ango awaco ne wu be, lwak ni likame bino to dedede, tuno kede di gigi otieko timere. ³¹ Malo kede lobo bino rwenyo, do kop nango likame bino rwenyo. ³² Do ikom kop me ceng kede esawa, likame tie dano kame ngeo, akadi imalaikan kame tie i malo, akadi Wot, kwanyo Papa en kame ngeo. ³³ Gwokerenu, kiunu piny di ilegunu; pien likame ingeunu awene en kame ebino timere kede. ³⁴ Pien me ka Wot ka dano bino bedo cal bala dano moro kame tie ot i piny abor, di pwodi likame eyai, eko mino jotic mege tic: ngat acelacel gikame poore en timo, di en eko ciko ngadar adwong pi bedo di ekio piny. ³⁵ Pi mano, uda bedunu di ikiunu piny, pien likame ingeunu awene kame won ot oyaro bino kede, cengemogo eyaro bino otieno, arabo i dier iwor, arabo tetu obai di tongwen tie koko amotoko odiko. ³⁶ Kur bino mere ngoole angola di eko udo wu di ininunu. ³⁷ Gikame ango atie waco ne wu, en kame da atie waco ne jo dedede be: kiunu piny!