¹ . Dido Tipo oko teelo Yesu i wi itela me wek Sitani oot tame. ² . Kakame en ekoo tieko kanyo kede kec, pi cengere ot ongwon kec oko do neeke. ³ . Kakame do nga tam jo oko bino kede bute eko yamo ne be kame di yin ibedo wot ka Rubanga, cikakino kide gi wek ki dok kuon. ⁴ . Do en eko dwooko di ewaco be, kowandiko be, dano liko oyaro bedo kuo kede kuon kenekene, do kede buli kop kame wok idog Rubanga. ⁵ . Dokon jwogi diko terre malo iwi bomba kacil, di ko keete iwi obibiru me tempulo. ⁶ . Di eko waaco ne be, kame yin ibedo wot ka Rubanga, jal komi ipot piny, pien kowandiko be, en eyaro corakino imalaikan meege piri, di gin kiko gagao yin i cing gi, tetekeny wek kur yin iret tieni ikom engaru. ⁷ . Yesu diko waco ne be, dokon kowandiko be, kur yin itam Rwot Rubanga ni. ⁸ . Dokon, sitani diko terre malo iwi moru ka bor twatwal, di eko nyunyuto ne ajakanuto me piny kede deyo gi. ⁹ . Di eko waco ne be, gigi dedede ango ayaro miino butin, kame yin ibino poto piny di iko woora. ¹⁰ . Yesu diko waaco ne be, orwa tenge, yin sitani. pien kowandiko be, yin ipore wooro Rwot Rubanga ni, dokon en kenekene kame yin ipoore tic ne. ¹¹ . Dido jwogi oko weeke, dokon, neeni, imalaikan oko bino, dido oko tic ne. ¹² . Nan do kakame Yesu bin owinyo kede be kokete Yokana i ot kol, en eko yai eoto Galilaya. ¹³ . Dido en eweko Nasaret eko bino bedo i Kaperenaum, kame kiyo kede dog nam, iye ikor me Sebulun kede Naptali. ¹⁴ . Tetekeny wek kop kame bin enabi Isaiya oyamo twer cobere eyamo be, ¹⁵ . Yin lobo me Sebulun, kede lobo me Naptali, kame tie iyongayo me nam, kame kalamo Yorodan, i Galilaya me Abilere. ¹⁶ . JO kame obedo ipiny acol bino neno lero, dokon gin jo kame kibedo ipiny kede itipo me too, lero bino rieny ikom gi. ¹⁷ . Geeno ikare nono Yesu oko caako tuco ejiri di ewaco be, Swilaro nu, pien ajakanut me malo tie icing wa. ¹⁸ . Dido Yesu, tie oot idog nam me Galilaya en eko neeno imiegu are, Simoni ka,e kolwango be Petero, kede omimere Andrea di gin ki tie wucco bwoi ii pi: pien gin oudo bin kibedo jo cik. ¹⁹ . Di en eko waaco negi, Lubunu ango di ango ako loko wu idokunu jo cik jo. ²⁰ . Awaka awaka di gin weeko bwoini gi, di kiko lubo en. ²¹ . Dokon en eko meede kede oot inyime, en eko neeno imiegu icegun are, Yakobo wot ka Sebedayo, kede Yokana omimere, di ki tie ii ye kede papa gi, di kitie yiiko bwoini gi, di en eko iwoongo gi. ²² . Awaka awaka di gin kiko weeko ye kede papa gi, di kiko lube. ²³ . Yesu oko rimaro Galilaya dedede, di epwonyo kii kacokeren gi, dokon di etuco ejiri me ajakanut, di ecango epone me tuere dedede kede aramo dedede kame oudo tie idier jo. ²⁴ . Di rwonge mere di ko roomo piny me Siria dedede, jo diko keelo ne jo kame aramo kede lito me epone apapat odio kede jo kame jwogi omako, karacel kede jo ko poi, kede jo kame kom gi otoo, di en eko caango gi. ²⁵ . Dido alule me jo katot kame owok i Galilaya kede Dekapoli, karacel kede jo kowok i Yerusalem, kede Judaya, kede ilobere kame kalamo Yorodan, oko lubbe.