¹ Ceng me agege me sabiti odiko sek, Maria Magadalina oko dilo di pwodi piny cocol, di eko ot i ates; di en eko neno be oudo kokwanyo kidi tenge ki dog ates. ² Di en eko ringo, eoto but Simoni Petero kede ngasiao ocelu kame oudo Yesu maro itek, di eko waco ne gi be, “Kikwanyo kom Rwot tenge ki ates, likame ongeo tuwai kame kikete iye.” ³ Pi mano, Petero oko yai, en kede ngasiao ocelu ca, iko tuno i ates. ⁴ Kiko donyo ringo aringa, do ngasiao ocelu ca oko ringo olanyo Petero, di en eko geno tuno i ates. ⁵ En eko gungo neno ii ates, di eko neno isukai kenekene di tie kuno, do en likame eko donyo i ie. ⁶ Di do Simoni Petero da oko tuno di tie lube ki cen, di eko pororo donyo ii ates; en eko neno isukai en atie. ⁷ Kede itambala kame bin oteno wie iye, en kame oudo tie kare kene ika isukai oudo tie iye, do oudo kodole ikare kene. ⁸ Di do ngasiao ocelu kame oudo ogeo tuno i ates oko eda donyo i ie, en eko neno di eko yei; ⁹ Pien pwodi gin oudo likame kiniang iwandik kacil, kame waco be poore en yaruno kikom jo oto. ¹⁰ Di josiao oko dok i miere gi. ¹¹ Do Maria oko dong cungo di etie koko ooko me ates; di pwodi oudo etie koko, en eko gungo pi neno ii ates; ¹² Di en eko neno imalaikan are kame oudo ngapo gi tar, di kibedo kakame oudo kopielo kom Yesu iye, acel tetu kawie kede acel i katiene. ¹³ Gin kiko waco ne be, “Dako ni, itie kok pinyo?” En eko dwoko ne gi be, “Pien kitero kom Rwot na tenge, likame angeo kakame kikete iye.” ¹⁴ Ingei en waco kamano, en eko lokere di eko neno Yesu di tie cungo, do likame eko ngeno be Yesu inonono. ¹⁵ Yesu oko waco ne be, “Dako ni itie kok pinyo? In itie mono ngai?” Maria oko paro be amoto en oudo ebedo ngapur poto, omio en eko waco ne be, “Ngadwong, ka in en itere tenge, nyuta kakame ikete iye, me wek aot akwanye ako tere.” ¹⁶ Yesu oko waco ne be, “Maria!” Di Maria oko lokere oko waco ne be, “Raboni!” kame dwong mere be Apwony. ¹⁷ Yesu oko waco ne be, “Kur imaka, pien pwodi likame aoto malo but Papa; do ot but imiegu na iko waco ne gi be ango atie ot malo but Papa na, en Papa wu da; but Rubanga na, en Rubanga wu da.” ¹⁸ Maria Magadalina oko ot di eko waco ne josiao be, en oudo aneno Rwot; " da eko yamo ne gin be Rwot owaco ne gigi. ¹⁹ Otieno me ceng nono, bala kame oudo etie kede ceng me agege me sabiti, josiao oudo tie i ot, di kicego ikekoroson pi lworo Iyudayan. Yesu oko bino di eko cungo i diere gi di eko waco ne gi be, " “Mulem bed butu.” ²⁰ Ingei waco kamanono, en eko nyuto ne gi cinge kede ngete. Di cuny josiao oko doko yom kakame kineno kede Rwot. ²¹ Yesu bobo oko medo waco ne gi be, “Mulem bed butu; bala kame Papa na oora kede, ada aoro wu kamanono.” ²² Di en etieko waco kope go, en eko kuto wei mere but gi di ewaco ne gi be, “Gamunu Tipo Kacil. ²³ Ka isasirunu ngatamoro dub mege, kobino sasiro en; ka idagunu sasiro ngatamoro ki dub mege, likame kobino sasiro en.” ²⁴ Do Tomasi kame oudo kolwongo be Didimo, kame bin obedo acel kikom josiao tomon kiwie are, kame oudo likame tie kede gi i esawa kame Yesu otuno kede but gi. ²⁵ Josiao apat oko waco ne be, “Wan oneno Rwot.” Do en eko waco ne gi be, “Kwanyo di ango aneno aporeso me sumalin i cinge, di ako mulo kede lweta, kede di aketo cinga i ngete, ango likame abino yei.” ²⁶ Doko ingei ceng kanyauni, josiao mege oudo bobo tie i ot, Tomasi da di oudo tie kede gi, ikekoroson oudo ocegere, do Yesu oko bino di eko cungo i diere gi, di eko waco be, “Mulem bed butu.” ²⁷ En eko waco ne Tomasi be, “Cwai lweti kan, doko nen cinga; riei cingi iko keto i ngeta, kur ibed abongo yei, do bed kede yei.” ²⁸ Di do Tomasi oko dwoko ne di ewaco be, “Rwot na kede Rubanga na!” ²⁹ Yesu oko waco ne be, “Tomasi mam pi in inena komio iyei? Kitie kede winyo jo kalikame oneno di gin kiko bedo kede yei.” ³⁰ Yesu bin oko timo gianena atot i nyim josiao mege, kalikame kowandiko i itabu kan. ³¹ Do kowandiko magi me wek iyeunu be Yesu en obedo Krisito, Wot ka Rubanga, kede da be ka iyeunu ibinunu udo kuo i nyinge.