¹ . Kur imiunu cunyu bed kede peko; yeunu Rubanga, dokon yeunu ada. ² . I ot ka papa na, tie iye isengen katot; koto likame amanono oud koto ango awaco ne u. Ango aoto pi iiko kabedo pir wu. ³ . Dokon kame ango aoto iiko kabedo pir u, ayaro dwoogo dokon, di akko gamou butango, tetekeny wek kakame ango abedo iye, uda ibedunu kanono. ⁴ . Dokon kakame ango atie ot iye un ingeo unu dokon yongayo mere un ingeounu. ⁵ . Tomasi di ko yamo ne be, Rwot, wan liko ongeo kakame yin itie oot iye; dokon epone mene en kame wan obino ngeeno kede yongayo? ⁶ . Yesu oko waco ne be; Ango en yongayo, ateni kede kuo; dano moro likoyaro bino but papa, kwaanyo di ebeo kibuta. ⁷ . Koto di bin un ingeunu ango, koto oudo ingeunu papa na da; dokon geno nan oot anyim un ingeenu, dokon itiekunu neene. ⁸ . Pilipo diko yaamo ne be, Rwot nyut ne wan papa, di manono do koroomo wan. ⁹ . Yesu diko waco ne be, Benyo, ango atieko kedi kare kalac amano, yin pwodi likame ingeango, Pilipo? Ngat ko nenango, udo etieko neeno papa, dodo epone mene en kame yin iyamo kede be nyut ne wan papa? ¹⁰ . Benyo, yin iyei be ango atie ii papa, dokon papa da tie iiya? kope kame ango ayamo ne un likame ayamo pira, do papa ngat kame bedo ii ya, en kame tiyo tice. ¹¹ . Yeunu be ango atie ii yi papa, dokon papa da tie ii ango, arabo do yeunu pir tice kikome. ¹² . Ateteni, ateteni, ango awaco ne u be, Dano kame yei ango, tice kame ango atimo eda eyaro tiimo; dokon en ebino tiimo tice kadongo kalamo magi; pien ango atie oot but papa. ¹³ . Dokon gimoroni kame un iyarounu peenyo kii nyinga, ginono ango amito timo ne u, tetekeny wek papa wud deyo kii wod. ¹⁴ . Kame iyarounu penyo gimoroni kenekene kii nyinga, ango amito tiime. ¹⁵ . Kame di un imaranu, gwokunu iswiliaka na. ¹⁶ . Dokon ango amito leego papa, di en eko miino u, ngakwei cuny ace, me wek en etwer bedo kede u atwal. ¹⁷ . En kame ebedo Tipo me ateni, kame lubo likame twero gaamo, piento likame en eneno, amotoko ngeene; do un ingeounu en, piento en ebedo kede u, da dokon eyaro bedo ii wu. ¹⁸ . Ango likame amito wwekou abongo kwei cuny: Ango amito bino but wu. ¹⁹ . Dodi pi kare acecek, doko lobo likoyaro nenango dokon; do un ibinunu bedo kuo. ²⁰ . Iceng nono en kame un iyarounu ngeeno kede bee, ango atie ii papa, di uda itie unu ii ango dokon ada atie ii wu. ²¹ . Ngat kame tie kede iswiliaka nango, di egwoko gi, ngat nono en kame mara ngo; dokon ngat kame mara ngo, papa nango da oyaro maro en, dokon emito nyuuto kome bute. ²² . Yuda kame likame obedo Esikariot, oko waco ne be, Rwot, epone mene en kame yin imito nyutere kede nne wan; dodi likame ne lobo? ²³ . Yesu oko dwoko di waco ne be; kame dano moro mara ngo, en emito gwooko kope nango, dokon papa nango da omito mare, dokon wan omito bino bute, di oko cweeno kabedo wa kede en. ²⁴ . Dano kalikame marango likame gwoko kope na; dokon kope kame un iwinyunu likame obedo mega, do gin kibedo me ka papa ngat ko ora. ²⁵ . Gigi ango ayamo ne un pien ango pwodi atie. ²⁶ . Do nga kwei cuny, kame obedo Tipo ka cil, kame papa omito cwaano kii nyinga, oyaro pwoonyo u gi dedede, di dokon en eko yutuno ne u gi dedede kame ango atieko waaco neu. ²⁷ . Ango aweko u kede mulem; mulem n ango amio butu; ango amio butu, likame bala kame lobo mio, kur imiunu cunyu be kede peko, amotoko miine bedo kede iworo. ²⁸ . Un itiekunu winyo kite kame ango ayamo neu kede, ango atie oot tenge, di ako dwogo bobon butu, kakoto di oudo imara nu, oudo koto ilelunu, pien ango awaco ne u be, ango atie oot but papa, pien papa nango dwong loa. ²⁹ . Dokon ango awaco ne u kope gi di pwodi likame kitimere, tetekeny kame ki cobere, un ibin iyeunu. ³⁰ . Icen ngei magi ango likame abino yaamo kope katot kede u; pien abaka me lobo ni tie bino di dokon eli kede gimoro ki buta. ³¹ . Do wek tetekeny lobo twer ngeeno be ango amaro papa, dokon bala kame papa omia kede iswil, ango da atimo kamanono. Yaunu, me wek outunu ikan tenge.