¹ Ateteni, ateteni awaco ne wu be, ngat kalikame donyo i ot me oromini di ebeo i erute; do eko yito ayita ikaramoro, ngat nono udo obedo akuwo kede ngayak. ² Do ngat kame donyo di ebeo i erute, udo ebedo ngat akwao oromini; ³ nga dar erute bino yabo ne erute, doko oromini winyo dwane: En elwongo oromini mege kede nying gi da eko telo gi wok oko. ⁴ Da kame etieko woto oromini mege, en etelo ne gi yongayo, di oromini ko lube, pien gin kingeo dwane ⁵ Gin likame kiyei lubo ngat apat, doko kiringo tenge kibute, pien gin likame kingeo dwan jo apat. ⁶ Yesu otio kede agole noni, do gin likame kiko niang gikame Yesu oudo tie waco ne gi. ⁷ Di Yesu bobo oko waco ne gi be, “Ateteni ateteni awaco ne wu be, ango en kame atie erute kame oromini donyo kiye. ⁸ Jo dedede kame bin ogeo bino nango, obedo jokuwo kede joyak, do oromini likame oko winyo gi. ⁹ Ango abedo erute, ka ngatamoro odonyo kibuta, ebino udo alako, da ebino donyo kede wok ooko; doko ebino udo lum alibaliba. ¹⁰ Ngakuo likame bino atatai, do pi kwalo, neko kede pi dudubo. Do ango abino me wek gin kiud kuo, kuo kopong. ¹¹ Ango abedo ngakwat aber. Ngakwat kaber mio kuo mere pi oromini mege. ¹² Do ngat kame opango apanga, ngat kalikame tie ngatkwat, kalikame obedo won oromini, ka eneno epeet bino, en eyai eko weko romini, di en eko ringo; di epeet ko mako oromo di apat ko sarakin. ¹³ Ngat kame opango apango ringo, pien udo kopange apanga, doko likame eparo pi oromini. ¹⁴ Ango abedo ngakwat aber, doko ango angeo romino na, doko oromini na da ngea. ¹⁵ Bala kame Papa ngea kede, doko ango da angeo Papa; pi mano, ango ayei rwenyo kuo na pi oromini. ¹⁶ Doko oromini ace tie nango kalikame obedo me awi noni; ango miero akel gida di iko winyo dwana: di do awi kobino bedo acel kede ngakwat acel. ¹⁷ Pi mano, Papa na mara, pien ango ayei rwenyo kuo na di bobo ako dwoke. ¹⁸ Likame tie ngatamoro kame bino kwanyo kuo nango, do ango ikoma en kame abino jalo kuo na kena. Ango atie kede twer me rwenyo kuo na, doko atie kede twero me dwoko kuo na. Cik noni Papa nango en kame omia. ¹⁹ Pi mano, kope nogi bobo oko kelo ne Iyudayan pokopokun. ²⁰ Atot kikom gi oko waco be, “En etie kede jwogi doko epoi da: Pinyo komio wun itienu winyo kop mere?” ²¹ Apat mege oko waco be, “Magi likame kope kame dano atie kede jwogi sobolo yamo. Jwogi twero yabo wang emuduk?” ²² Manoni oudo obedo kare me camo ebaga me jalere but Rwot i Yerusalem; doko oudo ebedo kare kame piny ngic kede. ²³ Di Yesu oko ot i tempulo di beo i kakame Solomon oudo donyo kiye ²⁴ Di do Iyudayan mogo oko cokere oluke, gin kiko yamo ne be, “Ibino mino tam wa sipakin awene? Ka in en ibedo Krisito wac ne wa kakaler. ²⁵ Yesu oko dwoko ne gi be, “Ango awaco ne wu, do wun likame ikounu yei tice kame ango atimo inying Papa na, pien gin kimio ijura ikoma. ²⁶ Do wun ikounu dagi yei, “Pien wun likame itienu oromini na; bala kame ango awaco kede. ²⁷ Oromini na winyo dwana, ango da angeo gi, doko gin da kiluba. ²⁸ Da ango amio gi kuo me nakanaka; doko gin likame kibino to, akadi ngatamoro likame bino wareso gi ki i cinga. ²⁹ Papa nan gat komio gin buta, dwong kalamo jo dedede, doko likame tie ngat kame twero wareso gin ki i cing Papa na ³⁰ Ango kede Papa na otie acel. ³¹ Di Iyudayan bobo oko kwanyo kide di kimito didipo en. ³² Yesu oko waco ne gi be, “Ango atieko nyuto ne wu tice abeco atot kame wok kibut Papa, pi acel ikom tice go mio imitunu didipo ango?” ³³ Iyudayan oko dwoko ne di kiwaco be, “Wan likame obino didipo in pi tic aber; do pi acae kede pien in dano adana itingere idoko Rubanga.” ³⁴ Yesu oko dwoko ne gi be, “Likame kowandiko i iswil wu be Ango awaco be, “Wun ibedunu rubangan? ³⁵ Ka en bin elwongo jo kame kop ka Rubanga obino but gi be rubangan, doko di iwandik kacil likame kosobolo loko, ³⁶ benyo benyo kame mio wun itienu waco ne ngat kame Rubanga olonyo, di eko cwano ipiny kan be, “In itie cano Rubanga, be pi ango awaco be, “Ango atie Wot ka Rubanga?” ³⁷ Ka likame atie timo tice ka Papa na, kur do iyeunu kop nango. ³⁸ Do ka atimo, akadi bed bala likame iyeunu ango, yeunu do tice, me wek ingeunu kede yei be Papa tie i ango, doko ada atie i en.” ³⁹ Pi mano, gin bobo iko mono make, do en eko lwi idyere gi. ⁴⁰ Di en bobo oko ot loka Yorodan kakame oudo Yokana ogeo batisi kiye jo, en eko dong bedo kuno. ⁴¹ Jo atot oko ot bute di kiko waco ne be, Yokana bin likame otimo gianena moro, do gi dedede kame Yokana oyamo i kom icuo ni obedo me ateni. ⁴² Jo atot oko yei en ikuno.