¹ Di Abimereki wot ka Jerubaal oko oot i shekem but imiegu ka Toto mere, eko poro kop kede gi, kede jo me paco me oot ka Toto me Papa mere, di ewaco bee, ² Akwao uu bee, yamunu i it jo dedede me shekem bee, mene kame ber ne un, amotoko bee, idwe ka Jerubaal dedede kame gin kitie awobe ot kanyare, pugu arabo imitutunu bee, ngat acel kenekene? Da bobo yutunu bee, ango kara abedo cogo uu kede ringo komu. ³ Di imiegu ka Toto mere oko yama kop ikome i it jo dedede me shekem, kop nogi dedede; cuny gi di oko yei kede lubo Abimereki; piento gin kiwaco bee, en ebedo omin wan. ⁴ Di gin kiko mine sente siliva ot kanyare, kame ki kwanyo iot me Baal-berith, en kame Abimereki oko pango kede jo ka kony li kede jo ka goro, oko lube ⁵ Di eko oot paco ka papa mere i ophrah, eko neko imiegu mege idwe ka Jerubaal, kame tie jo ot kanyare iwi engaru acel, di mago da otimere kamano Yosamu awobi ngorit me ka Jerubaal oko dong; piento oudo epwono. ⁶ Jo dedede me shekem oko cokere kare cal, kede jo me paco ka millo, di kiko oot, kiko mino Abimereki odoko Abaka, ika opete i epir kame oudo tie i shekem. ⁷ Kame oyamo ne kede Yosamu, en eko oot eko cungo iwi moru me Gerizim, eko woto dwane, eko redo eko waco ne gi bee, winyanu, un jo me Shekem me Rwot da winy wu da. ⁸ Ikare moro yen ojwiao pi oot wiro Abaka apugo gi gin kiko waco ne yat olibeto bee, in en kame ipug wan. ⁹ Do yat olibeto oko waco ne gi bee, kom ango awek moo na kame mio ko woro Rubanga kiton dano da. Di ango ako oot pi mina dwongo me pugo yen? ¹⁰ Yen di ko do waco ne olok bee, bia do in ipug wan. ¹¹ Do yat olok oko Waco ne gi bee, kom ango awek winyi winyi na, kede elem na kabeco, di ako oot wira pi mina dwogo me pugo yen? ¹² Yen di ko Waco ne Epigi bee, bia do in ipug wan. ¹³ Yat Epigi oko Waco ne gi bee, en kom ango awek vini na, kame yomo cuny Rubanga kede dano, di ako oot pi mina dwogo me pugo yen? ¹⁴ Di do yen dedede oko Waco ne Etirir bee, bia do in, ipug wan. ¹⁵ Etirir oko Waco ne yen bee, i ateni kame iwira nu pi bedo Abaka apugo uu, bia nu ikounu keto gen uu itipo na: do kame li, wek do mac woki i Etirir, di ko wango Sedar me Lebanon. ¹⁶ Nan pimano, kame itimunu ateni, bobodi kakare, me un imiunu Abimereki doko Abaka, kame di itimunu kiber ne Jerubaal kede jo me ture ikounu timo ne nu di lubere kede gi kame cinge obedo timo. ¹⁷ Piento Papa nango oii piru, eko jalo kwo mere ka lac, eko lako uu icing jo me Midia: ¹⁸ Di un ikountu tin lokere ii i ot ka Papa wa, ikounu neko awobe mege, jo ot kanyare, iwi engaru acel, di ikounu mino Abimeleki, wot ka dako mere kameli kenyomo, odoko Abaka kame pugo jo me sheken, be piento ebedo ominu. ¹⁹ Kom kame di un itimunu gi me ateni di tie kakare ne Jerubaal kede ne Jo ture tin ni, nan do lelunu ikom Abimeleki, eda eko ilel pi un. ²⁰ Do kame li, wek mac wok kibut Abimereki, di ko wango jo me Shekem, kede i ot ka Millo; doko wek mac woki ki but Jo me Shekem, kede i ot ka Millo, diko wango Abimereki. ²¹ Yosamu di ko ringo tenge, eko lwi, eko ot i Beer eko bedo kuno, pi lworo omi mere Abimereki. ²² Di Abimereki pugo Isirail murakini adek. ²³ Di Rubanga oko cwano cuny arac, idierediere me Abimereki kede jo me shekem;di jo me shekem oko timo aguragura kede Abimeriki. ²⁴ Me tetekeny kolo kame otimere but awobe ka Jerubaal ot kanyare miero do bin, remo gi oko maro iwi Abimereki Omin gi, ngat oneko gi; kede iwi jo me shekem, kobedo konye pi neko imiegu mege. ²⁵ Jo me shekem oko keto jo angalo pi kine iwi okwidu me moru, kiko yako jo kame beo kanono, dedede, di oko Waco ne Abimereki. ²⁶ Di Gaal wot ka Ebed oko bino kede imiegu mege, di ki ko ngolo paka i Shekem; jo me shekem di ko keto gen gi ikome. ²⁷ Kiko ot oko ipoto di kiko coko anyakini me olok gi, di kiko nyonyono elem, kiko bedo i eyala, di kiko oot i ot me rubanga gi, di kiko cam kedi mat, di ko lamo Abimeriki. ²⁸ Di Gaal wot ka Ebed oko Waco bee, Abimereki en ngai do shekem en ngai, me wek wan otii ne? likame en kom wot ka Jerubssl? Ot katic mere zebul? Tii nenu jo me Hamar Papa me shekem; nyo komio wan otio ne? ²⁹ oudo koto di rubanga oyei, koto jogi obedo idud cinga koto ango ako riamo Abimereki.Eko Waco ne Abimereki bee, med ikean ni iko bino oko. ³⁰ Kame zebul dano ka pugo Bomba owinyo kede kop ka Gaal, wot ka Ebed, eko lilo. ³¹ Eko cwano kop but Abimereki elilinh, di ewaco bee, neni; Gaal wot ka Ebed obino kede imiegu mege obino i shekem: doko neni, kitieko goloro ni Bomba. ³² Na pi mano yaunu kiwor, in kede jo kame itie kede, oti ikiunu gi abuto i lum. ³³ Oyaro timere kamon, odiko, di ceng wok awoka undilunu yai, ikounu luko Bomba: do, neni, di do en etie bino kede jo kame etie kede pi suri, tim nenu gi gikame iudunu winyo me timo. ³⁴ Amimeriki di ko yai, kede jo dedede kame oudo etie kede, iwor, kiko luko sheken i abunge ongwon. ³⁵ Di Gaal wot ka Ebed oko donyo oko, eko cungo i dog erute kame odonyo kede i Bomba, Abimelek oko yai mato kede jo kame odonyo kede i Bomba, Abimelek oko yai malo kede jo kame oudo etie kede, i ka oudo etie kire iye. ³⁶ Kame do Gaal oneno kede jo, eko Waco ne zebul bee, neni, jo tie bino di kiwok iwi moru, zebul oko Waco ne bee, in itie neno tipo me moru bala jo. ³⁷ Gaal bobo oko medo yamo bee, neni jo tie bino idierediere me lobo, abunge ace tie wok ki ka opete me Meonenim. ³⁸ Zebul di ko Waco ne bee, dogi na do tie twai, kame oudo in iwaco kede bee, Abimereki en ngai, me wek wan otii ne? Likame jo kame oudo in icao ige? Ot oko, akwai na, iko ii kede gi. ³⁹ Gaal di ko oot oko but jo me Shekem, kiko ii kede Abimereki. ⁴⁰ Abimereki oko riame, eko ringo tenge kibute, jo ka tot oko neko, mogo oudo awanon, paka tuno idog erute me donyo i Bomba. ⁴¹ Abimereki oko bedo i Arumah: di zebul oko riamo Gaal kede imiegu mege, me kur kibed i shekem. ⁴² Oko timere Kaman oruo mere, di jo oko ot ipoti; di kiko Waco ne Abimereki. ⁴³ Eko kwanyo jo, eko poko gi i abunge adek, kiko ot kire i poti, di eko ngoloro, doko neni, jo obino di wok ki Bomba; eko yai oot suro gi, eko neko gi. ⁴⁴ Di Abimereki, kede abunge me jo kame oudo etie kede, kiko muomar anyim, kiko cungo i dog erute me donyo i Bomba: di abunge are oko ringo ikom jo koudo tie ipoto kiko neko gi. ⁴⁵ Abimereki di ko ii ikom Bomba piny yul; kiko mano twotwomo ude me Bomba piny yul; kiko mano Bomba, kiko neko jo kame eudo tie iye, kiko twotwomo ude me Bomba, kiko kikiro munyo iye. ⁴⁶ Kame jo dedede me Goropa me Shekem, owinyo, kiko donyo i Goropa me ot me rubanga Berith. ⁴⁷ Oko Waco ne Abimereki bee, jo dedede me Goropa me shekem ocokere karacel. ⁴⁸ Abimereki di koi to iwi moru me zalmon, en kede jo dedede kame oudo etie kede; Abimereki oko mako lee icinge, eko tongo jang yen, eko oot kede gi, eko riongo i epepet mer; eko Waco ne jo kame etie kede bee, gikame inenunu ango atie timo, timunu awaka di ikounu timo bala kame ango atimo kede. ⁴⁹ Di jo dedede kamanono da oko tongo jang yat ngat acel acel mere, kkiko lubo Abimeriki, kiko keto gi i Goropa di eko cwinyo Goropa kede gi; dido jo kame tie i Goropa me shekem oko too, jo abuco room tutumia acel, mon kede cuo. ⁵⁰ Di Abimereki oko oot i Thebes, eko luko thebeth kiko mano. ⁵¹ Do oudo tie Goropa atek idier Bomba, jo dedede oko ringo kuno, cuo, kede mon, kiton jo dedede me Bomba, kiko cego ekeko kiko ito malo me wi Goropa. ⁵² Abimereki di ko tuno i Goropa, eko ii kede, oudo eko cane kitek idog ekeko me Goropa, oudo eyapuno wango ekeko kede mac. ⁵³ Dako moro di ko uco kidi me riego iwi Abimereki paka bebelo cogo me wie. ⁵⁴ Awaka awaka eko lwonga kame yeo ne jame me ii mege, eko Waco ne bee, wot palani, iko neka me kur jo wac bee, dako a daka en oneke, eponga mere oko cobe pelepel, eko too. ⁵⁵ Kame jo me Isirail oneno bee, Abimereki otoo, kiko dok ngat acel acel ikabedo mere. ⁵⁶ En ekite no kame oculo kede raco ka Abimereki, kame etimo ne Papa mere, me neko imiegu mege ot kanyare. ⁵⁷ Di tim areco dedede kame jo me shekem otimo Rubanga oko culo gi iwi gi: di ilam ka Yosamu wot ka Jerubaal oko poto ikom gi.