¹ Di Malaika ka Rwot oko wok i Giligal eko oot i Bochim, ekowaco bee, ango amio iyaunu tenge i lobo me Misiri, ako kelo uu ilobo kame alairo but jo akwari uu, ango ako Waco bee, likame ayaro turo cikere nakede uu. ² Doko likame ibinunu timo aribakin kede jo me piny ni, iyarunu rereto piny Alutarin gi: do likame an ikounu winyo duana: Nyo omio un itimunu gini? ³ Pi mano ango da ako Waco bee, likame ayaro riamo gi tenge i nyim uu; do gin kiyaro bedo bala okuto ingetu, rubangan gi bino doko ne uu owic. ⁴ Oko timere Kaman, kame Malaika ka Rwot owaco kede kop gi dedede but jo me isirail dedede, di jo oko woto duan gi malo di kiko kok. ⁵ Di kiko cako nying adul nono bee Bochim, dido gin kiko yalo Rwot i kanono. ⁶ Dido kame Yosua ogonyo kede jo pi oot, idwe me isirael oko yai ngat acel acel ooto kame opoko ne pi tero. ⁷ Jo di ko tic ne Rwot ikare ka Yosua dedede, kede ikare me odong dedede kame obedo lango Yosua jo koneno tice ka Rwot dedede adongo dongo kame etimo ne Isirael. ⁸ Di do Yosua wot ka Nuni, epasoit ka Rwot oko too, eto kede muaka tol acel kede tomon (110). ⁹ Di gin kiko yike i ikor me lobo mere: Timmnath heres imoru me Eprhaim, ibad me malo inget emkura me Gaash. ¹⁰ Doko da lwak jo me kare no dedede otieko too oko coko gida but jo akwari gi, lwak ace apat oko wok cen ngei gin, kame likame ngeo Rwot, kiton tice kame etimo ne isirael. ¹¹ Di idwe me isirael oko timo tim areco inyim Rwot, kiko tic ne Baalim: ¹² Kiko weko Rwot Rubanga me jo ka kwari gi okelo gi ipiny me misiri, kiko lubo rubangan ka pat, rubangan me jo koluko gi, kiko donyo gungo but gi, kiko mino Rwot ongoi kede gi. ¹³ Kiko weko Rwot, kiko tic ne Baal kede Ashtaroth. ¹⁴ Di lilo ka Rwot oko dop ikom isirail, eko jalo gi icing jo yak ayako gi, eko jalo gi icing jo kwor gi oluko gi, di do likame kiko do twero bobo cungo inyim jo kwor gi. ¹⁵ Kara moro dedede kame gin ioto iye oko, cing Rwot timo ne gi can, bala kame Rwot oyamo kede doko bala kite kame Rwot olairo kede but gi. Kiko beo ipeko atek. ¹⁶ Kame mago tie da, Rwot oko woto jo ngol kop olako gi icing jo yak ayako gi. ¹⁷ Do pwodi gin likame kiko winyo jo ngol kop gi kiko oot timo tim me Malaya but rubangan ace kiko gungo but gi, ki lokere awaka awaka tenge iyongayo kame jo ka kwarigi oudo lubo, di kiwinyo cik ka Rwot, do gin likame kiko timo amanono. ¹⁸ Kame dido Rwot omio gi jo ngol kop, udo Rwot tie kede ongol kop, di eko lako gi icing jo kwor gi, ikare lung me kuo me ongol kop no, piento Rwot ko sasiro gi pi cur kede acano kame jo kwor gi tidilo gi kede. ¹⁹ Oko timere Kaman, kame ongol kop otoo, di bobo gin kilokere, kiko dubere akato jo kakwari gi, ilubo rubangan ace pitic ne gi, di kiko riondiko piny ne gi, likame kiko weko timo tim gi, ara bo weko elol gi nono. ²⁰ Gero ka Rwot oko dop ikom Isirael, eko Waco bee piento jogi oturo cikere na kame aciko ne jo ka kwari gi, di likame kiko winyo dwana; ²¹ Ango da apira, geno tin, likame ayaro riamo tenge inyim gi Atekerin kame Yosua otoo oweko odong. ²² Me ati kede gi me tamo IsirIL, ara bo kitwero rikito yongayo Rwot pi lubo, kame papi gi orikito, arabo li. ²³ En komio Rwot oweko Atekerin ace go, abongo riamo gi tenge awaka awaka, doko da en komio likame emio gi cing Yosua.