¹ Baluwa kowok kibut Adwong. But ngawota Gayo kame amaro i ateni. ² Ngawota kame amaro, ango alego be gi dedede bed ni kiber, kede be, ibed kede yotkom, bala kame kuo me cunyi tie kede kiber. ³ Oudo abedo kede yomcuny adwong kakame imiegu mogo obino kede di kiko mino ijura i kom epone kame in igenere kede i kop me ateni, manono en epone kame in ilubo kede kop me ateni. ⁴ Likame tie yomcuny moro kame ango akaruno bedo kede kame kalamo man, en yomcuny me winyo be idwe na tie lubo ateni. ⁵ Ngawota kame amaro, in igenere i tic dedede kame i timo ne imiegu kede amiegu, bed bala gin kibedo jokumbor kibuti. ⁶ Gin kitieko mino ijura i kom amara ni but ekodet me jokirisito kame tie kan. Ebino bedo ber ka in ikonyo gi pi gin meede kede ot gi bala kame poore i tic ka Rubanga. ⁷ Pien gin oudo kicako yai ot sapali gi pi tic ka Kirisito, di likame kiyei gamo kony moro kibut jo kalikame oyei. ⁸ Pi mano, wan opoorenu konyo jo kame cal kamanono, tetekeny odokunu jo kame nywako tic me pwonyo kop me ateni. ⁹ Ango atieko wandiko baluwa moro but ekodet me jokirisito; do Dioterepe ngat kame mito be en etel jo apat odagi winyo kop na. ¹⁰ Aso ka ango abino, abino nyuto gi dedede kame en etie timo pi sarakino kope me abe i koma. Likame mago kenekene, do en edagi da gamo imiegu kede amiegu, doko egengo jo kame mito gamo gi di eriamo gi tenge ki ekodet me jokirisito. ¹¹ Ngawota kame amaro, kur ilub timo gikarac do lub timo gikaber. Ngat kame timo gikaber obedo dano ka Rubanga, do ngat kame timo gikarac likame pwodi oneno Rubanga. ¹² Jo dedede waco kop aber i kom Demeterio, akadi gi me ateni kame en etimo da mio ijura i kome. Wada ojurao en, doko wun ingeunu be ijura kame wan omio tie me ateni. ¹³ Ango atie kede kope atot kame amito waco ni, do likame amito wandiko gi awandik. ¹⁴ Do akaka manono, ango atie kede gen me bino neni awakawaka, di oko bino yamo karacel wang i wang. ¹⁵ Mulem bed buti. Jowoti omoti. Mot awotino wa kame tie kuno, ngat acelacel kede nyinge.