¹ Paulo, Silvanio, kede Temeseo, but kanisa me Tesolonika, kame tie i Rubanga Papa wa kede i Rwot Yesu Kristo. ² Kisa bed butu, kede mulem kame wok kibut Rubanga Papa kede Rwot Yesu Kristo. ³ Wan omoko pi pwono Rubanga pirun nakanaka, imiegu, bala kame poore kede, pien yei wu tie dongo, bobo amara kame ngat acel acel tie kede but jo icegun tie meede. ⁴ Pimano en omio wan owakere ikanisa ka Rubanga pirun, pi dire kede cungo iyei ikare me adagadaga kede itidil kame ikanyakino nu. ⁵ Mane nyuto be ngolo kop ka Rubanga tie ateni, me wek idokunu jo koopore pi jago ka Rubanga, kame nataman itienu neno can pire. ⁶ Eneno gi kopoore kibut Rubanga pi mino can but jo atie lolo wu, pi gi da neno can. ⁷ Kede pi mino wei but wun jo kame otie lolo, karacel kede wan, ikare me Rwot Yesu bino neeno kede imalaikan mege me twer ⁸ Imac aliel di eko mino can but jo kalikame ngeo Rubanga, kede jo adagi winyo ejiri ka Rwot wa Yesu Kristo. ⁹ Kame bino mino can kalikame tiek but gi, inyim Rubanga, kede ideyo me twer mere. ¹⁰ Man bino timere ikare kame en ebino bino kede pi jo mege, opoore mine deyo, kede pi jo oyei en dedede me ur pien wun ikounu yei ijura kame wan omio i ceng no. ¹¹ Pimano no en omio wan olego piru naka naka wek Rubanga maru ibedunu jo ko opoore pi lwongo mere, di eko cobo bero me ilel mere dedede kede gi aber ame itimunu pi yei wu. ¹² Me wek nying Rwot wa Yesu Kristo ud deyo kibutu, kede wuda kibute, di lubere kede kisa ka Rubanga wa kede me ka Rwot Yesu Kristo.