¹ Baaa kalama dolde kulu Yesu arja weeri uwo ne nas swahaba to fi bahari ab te beriya oweeri uwo fadi. ² Mon kan fi bakan wayi Simoni Petero me Dudemu, me Nasnairi ab te kaana ab te Galilaaya, me yala te Zebedaayi, me swahaba to taanin. ³ Simoni Petero dukur kelem gali ana guruwa kum kelem nowo gali ina gi ruwa me eta mon ruwa mon dooru fi fuluka; fileli te yom de umon ma ligo sokol. ⁴ Lakin bakan lata gi saba Yesu yegif fi torofu lakin nas swahaba ma faham jede Yesu. ⁵ Yesu dukur kelem noumon yala tokum endis sokol akul? mon arja fogo ina endis ma. ⁶ Okelem noumon jada kum katimba fi ida yomin te bahari tokum bi amsuku ini ya umon jada ligo umon kala ma agdr juru katimba sabab te samga milan. ⁷ In ya swahaba ab Yesu kan aju zaidi de okelem ne Simoni Petero gali deya sidi tena wakti Simoni Petero asma gali deya sidi tena orobutu uwo me gumasi( kalam kan uwoPilili) Ojada uwo fi bahari. ⁸ Lakin nas swahaba taanin umon ja me fuluka ab sakar kalam ata kan umon ma boyi me gaba lakin ida 200 ligo umon gi uru katimba ab amla samaga. ⁹ Wakti umon tala mina umon rasulu fi tura mon ayin naari te maka ligo fi ini me samaga ligo kutu fogo me mukati. ¹⁰ Yesu kelem noumon jibu kum fi samaga ab itakum amsuku asede. ¹¹ In ya Simoni Petero masi fi fuluka ligo amla samaga ab kubari 153: lakin sala kan kan mila jede karimba de ma gata. ¹² Yesu naadi umon taal kum akul min swahaba kulu mafi ajol ab asadu uwo gali ita ya munu? ligo umon arufu de sidi tena. ¹³ Yesu dukur ja owedi noumon mukati me samaga kaman. ¹⁴ Wede ya mara tarata ab yesu beenu ne nas swahaba to baada gum min meitin. ¹⁵ Wakti umon kala akulu Yesu kelem ne Simoni Petero gali ita aju ana futu dolde? Okelem nowo ya jede sidi tayi; ita arufu gal je ana aju ita . okelem nowo gali akilisa yala te kooru tayi. ¹⁶ Okelem nowo mara tinini Simoni ita aju ana? okelem nowo taasil ana aju ita okelem nowo chunga kooru tayi. ¹⁷ Okelem nowo mara tarata Simoni nyereku te Yokaana ita aju ana Petero dukur ligo ohuzuni kalam uwo asadu uwo te mara talata ita aju ana? Okelem nowo gal sidi tayi ita arufu kulu, ita gi faham je ana aju ita Yesu kelem nowo gal akilisha kooru tayi. ¹⁸ Taasilana gi kelem ne ita gal wakti ita lisa yowele ita kan gi ruwa fi killa bakan kulu ab ita aju lakin ita kan bija kun ajusi ita bija arfa ida taki ajol taanin bija robutu obija sulu ia bakan ab ita aju ma. ¹⁹ Owonus jede ligo ogi weeri mutu ab uwo bi ja mutu fiarfa Rabbana wakti okala wonusu jede okelem nowo taal warana. ²⁰ Petero bakan geeru uwo ayin swahaba ab kan Yesu aju zaidi de ogi ruwa wara uwo ya kan gi num fi dusu to fi akil te filel okelem gali sidi tayi munu, ya bi akul fugu ita lukwe. ²¹ Wakti Petero ayinu uwo okelem ne Yesu gali me wede obija kun sunu? ²² Yesu dukur kelem gal kan ana aju ana bi seebu uwo laadi wakti ab ana bija arja ita gi feker sunu? taki fatiya ana. ²³ In ya kalam de fere fere fi na swahaba je swahaba wede ma gura mutu: lakin ligo Yesu ma kelem nowo gal uwo ma gura mutu; lakin kan aana aju obi sten ana ladi wakti ab na bi arja ita gi feker sunu? ²⁴ Wede ya swahaba ab wonus wede okaif dolde; ina kaman arufu je kalam to te haki. ²⁵ Kaman fi taanin mulan yesu ab uwo so kan kan kulu katif wayi wayi ana gi feker kan duniya muzima ma bi kun fogo kitaba ab kan bi katifu.