¹ Kan fi ajol wayi fi Kayisaliya, asma to Koluneriyo, ragi ab kan kebir te bakan kazi ab kan gi nadi Kitaliyano. ² Ajol al giso kalam bisesi, ab gi kafu Rabbana me anas te juwa to kulu ab gi gesim sokolina milan ne anas owomba Rabbana yom kulu. ³ Dukur uwo ayinu wahyu faadi, je saa 9 te yom te laasiya, malaika te Rabbana ligo gida kalu ogi kelem nowo Koluneriyo. ⁴ Ofata ena tow, okafu okelem sunu sidi tayi? Okelem nowo womba taki me gesim taki ruwa fo kalam kumbuka kalam te Rabbana. ⁵ Ya jede rasul anas fi yopa, kede ita naadi ajol ab asma tow Simon, asma tow te tinini Petero. ⁶ Wede ya ajol ab gi ligo difan ne Simoni ajol te abu gi selegu gili, me juwa to geeri me bahari. ⁷ Malaika abu kan uwonus mo uwo ligo oruwa,onade labiya to tinen te jua me asekeri abu gi kafu Rabbana mi abu kan gi alim kala yom. ⁹ Fi yom te tinini wakti umon gi massi mon geeri me rasul fi medina, Petero panda foo ta juwa fi womba fi saa sita. ¹⁰ Jiyan abidu so waju akul akil lakin wakti gi amurugu akili Roho to badul. ¹¹ Uwo ayin samayi ligo fata uwo, sokol nenzil fogo uwo gi beenu je suuka ab kebir ligo amsuku fi sonda arubate robutu dukur nenzil falata. ¹² kan fogo lam gaba kulu ab endis kura arba me al gi masi me batana, me teeran te loobu. ¹³ Sauti ja nowo gi kelem gum, Petero, kede ita daba kede ita akul. ¹⁴ Lakin Petero kelem la sidu tayi, ana magi akul sokol te sibir sala kan batal. ¹⁵ Sauti (arja ja) fi bakan ab uwo kan fi fogo gi kelem gal Rabbana sokolini ab uwo adul mata sulu je harram. ¹⁶ Ya kan jede mara talata: gwamu dukur sokolina de sulu fi samayi. ¹⁷ In ya Petero wakti ligo wasi wasi dakal fi gilba to te telim de ab uwo ayin de je fi, anas ab rasul me Kuluneriyo wakti umon asadu bey te Simoni mon agifu fi beebu. ¹⁸ Mon nadi umon asadu Simon asma to tani ya Petero,yakan difani. ¹⁹ Wakti Petero kan gi feker fi Roho dukur kelem nowo ayinu anas talata gi gusu ita. ²⁰ Lakin gum kede ita ruwa noumon ligo ita magi ligo wasi wasi: kalam ana ya rasul umon. ²¹ Petero ruwa ne anas dukur okelem noumon ayinu ana yade ab itakum gi gusu: Sumu ya jib itakum? ²² Mon kelem Koloneriyo rai ajol ab nedifu, ab gi kafu Rabbana, ab sulu uwo te foo fi bele tanas Yudaaya kelem gali malaika ab nedif kelem nowo gal kede ia ja fi juwa to okede asma kalama ab gi tala, min ita. ²³ Dukur orudu kede umon dakal je diffana in fi yom te tinini Petero gum min num uwo arfa bakan wayi me umon me akwaana taanin te yopa mon ruwa sawa. ²⁴ Fi yom te tinini mon dakal fi Kayisaria Koluneriyo kan gisten umon ligo olim anas te kika to me ab kan Sabiyana. ²⁵ In ya Petero wakti kalas gura dakal Koluneriyo dukur umon ligo badum mowo dukur odugu rukuba wabadu uwo agif. ²⁶ Lakin Petero kelem nowo agufu fo ana kaman ajol je ita. ²⁷ Ligo ogi wonus mowo odakalu oligo anas milan ligo umn lim umon. ²⁸ Okelem noumon gal itakum arufu jema kuwesi ajol te Yudaaya kun me ajol bele taani aw ja jambu uwo; wu Rabbana weeri nana kede ana ma gi nadi ajol yoyote harram, aw batal. ²⁹ Ya ana ja wakti itakum nadi ana ya ana asadu gal sunu ya nadana fogo? ³⁰ In ya Koluneriya kelem gal ya fi jede kala futu aruba yomu ligo ana gi womba rasul fi saa wede womba te saa 9 fi joju tayi ayin ajol wegif gidam ana ab kan endis gumasi te gold. ³¹ Okelem gal Koluneriyo womba taki asma, okelem nowo gal gesim tak kum gidam Rabbana. ³² Yala rasul fi yopa kede ita nadi Simoni asma tow te tinini Petero: uwo ya kun diffan te Simoni ajol ab gi selegu gili ab fi geeri me bahari. ³³ Inya gwam dukur ana rasul neitai ita so kuwesi wakti ita ja.Yla asede ina fi kulu in gidam Rabbana kede ina asma kulu ab Rabbana amrisha ita. ³⁴ In ya Petero fata kasma tow okelem gali fi hakki ana faham Rabbana omagi tafatautisa anas. ³⁵ Lakin fi bele kulu ajol ab gi kafu uwo dukur oso kalam te hidaaya ogi rudu mowo. ³⁶ Kalam ab uwo rasul ne yala te Israel ligo ogi kelem amani ab fi fi Yesu Kristo ya sidi te killa sokol. ³⁷ Itakum arufu ab ja wonus ab kan fi Yudaaya kulu ab abidu fi Galilaaya baada te batiza ab okelem ne yo kaana. ³⁸ Yesu te Nazareth Rabbana wakti kubu fugu uwo din me Roho ab nedif me gudra:kan gi masi ligo ogiso seme, ogi ponyesha anas kulu ab kan fi me shaitani.kalam Rabbana kan fi me uwo ³⁹ Ina kaman bi wedi ushahidi te kalama kulu ab so fi bele te nas Yudaaya me fi Yerusalem; dukur katul aligu uwo fi musalaba. ⁴⁰ Wede Rabbana gum uwo fi yom te talata oweri uwo faadi. ⁴¹ Mafi anas kulu illa fi anas ab te ushahidi ab Rabbana nigitu fawlan, okelem gali ya ina anas ab akul wu ina asurub mowo wakti ogum min meitin. ⁴² Okelem nena me fahamisha anas kalam te Rabbana ab uwo amrisha, kun ajol bi gata kesi te anas ab hayyi me anas abmutu. ⁴³ Wede nas nebiya kul ja wonus fugu uwo killa ajol ab bi amin mowo bi amurugu min uwo batal sabab te asma tow. ⁴⁴ In wakti Petero lisa gi wonus kalama dolde Roho ab nedif dukur waga fugu umon kulu anas ab asma kalam. ⁴⁵ Mon kulu fata kasma aw shanga anas ab rudu kede taaru, mon kulu ab ja me Petero kalam fi belana zawadi te Roho ab nedif kubu. ⁴⁶ Kalam asma umon ligo umon gi arfa asma te Rabbana. In ya Petero kelem gali. ⁴⁷ Ajol agder aba anas dolde kede batizaumon anas ab wedi noumon Roho ab nedif jeena? ⁴⁸ Uwo amrisha kede batiza umon fi dakal fi asma te Yeu Kristo. Baada naade umon waga waga nowo kede umon kalas na yom kiyas.