¹ Pau na Timotio, owatalavai wa Yesu Clistu, kovafuifhipo avehe mo Yesu Clistu omba veko Filipu, novatumini wongelecha. ² Otchali konue, nombembua ya Huku Tate yetu, ya na Tate Kulu yetu Yesu Clistu. ³ Mbapandula ku Huku yange, omakando atcho aehe pua mbemunongonuka. ⁴ Apehe pomalikuambelo ange konue, ndjilikuambela nehambo. ⁵ Mbapandula kutcheinha mumunika kondaka ombua, okuilila potchitenha tcho poupe té pahe. ⁶ Tcho mbetchiomiika: Inguinha afhimbika ovininga oviwa konue maketchitukifha té kotchitenha tcha Yesu Clistu. ⁷ Tcho ouhunga okulitea tcho konue amuhe, pae ndjina onue mombunga yange. Onue amuhe mumapangange kotchali, nokounkhuatua wange, nokokupopia ondaka ombua. ⁸ Mokonda Huku ombangi yange kutcheinha ndjino ehambo konue amuhe, nonkhenda ya Yesu Clistu. ⁹ Ya tcho ndjilikuambela okutia: otchihando tcheni ngatchikule unene unene vali kokuiva nokulitea okufuifhapo; ¹⁰ opo mupangule ovipuka embi viavalela, okuningea okutia mufuepo potchetenha tcha Clistu. ¹¹ Nkhe ndjilikuambela mukae mueyula nouhunga, ombo mauzhe ku Yesu Clistu, koumbala nokukuyimbila kua Huku. ¹² Pahe, mbahanda mutchive okutia vango vange ovipuka embi mbakondja navio viaundapa unene kokukula kondaka ombua. ¹³ Putcho, ounkhuatua wange ku Clistu waiwa noyongualata zhactho azhihe ozho kondjuwo onene, novengi vatcho; ¹⁴ ya ovango vange ovengi ku Tate Kulu, avambo vaonikako vali mokonda younkhuatua wange, opo haningi owoma kokupopia ondaka ya Huku. ¹⁵ Vamu vapopia ondaka omba ku Clistu kemuna, ya vamu okefhipa, pae, vetchingea kouwa. ¹⁶ Ombenha vapopia Clistu notchihando, vetchi okutia mbapakuako kono ndjile omuyakeleli wondaka ombua. ¹⁷ Vamu vapopia Clistu kokuninga otchipululu nemuna, ya ahamatchilu komungo, okututa okutia mavaningi ekulula monkhando yapua djili onkhuatua. ¹⁸ Pae otchitchi tchachukifha? ngaile kokuhatavela, ngaile kotchatchili Clistu upopiwa, ya ami putcho, ndjika nehambo. Inga ami mihaka mbalemua, ¹⁹ pae, ndjitchi okutia matchikaholola eyowo lhange, mokonda yomalikuambelo emii mokonda yomphepo ya Yesu Clistu. ²⁰ Koholo yange onen e nokuomiikako kekevelo okutia kakuna tchi nge matchikanthalaleka, nokukola ombungo apehe makahilivikua molutu luange ngaile komunhu, ngaile kokutchua; ²¹ mokonda kuami okuka kouye óClistu ya okutchua olukulu. ²² Okutia okuka kouye movivi tchipopia okutia oviwa kovininga viange, otchipi tchi nge mihopopo? Ami hitchi. ²³ Mokonda ndjipokati kovipuka vivali, oholo yange oyokuenda ndjikakae na Clistu, tchi eliko vali unene otchiwa; ²⁴ ya pae, okuka kolutu tchavalela vali mokonda yaonue. ²⁵ Tchi mbeliomiika lumu ndjitchi okutia mituatuako lumu nokuka naonue amuhe, okulumbanaa kuemii nehambo mekolelo; ²⁶ opo tchitie, mokonda yange kumunike ovipuka embinha nge mavimuhambukifha ku Clistu tchi pe meya vali konue. ²⁷ Kombanda yaembio avihe kaemii muavioka mokonda ya Clistu opo tchitie ngaile mikemutala, ngeka kokula naonue, otcho minute lumu okutia napahe otcho nkhe bbmuatakamifhile, Komphepo imu pé, okuluifha pamu ondaka yekolelo; ²⁸ ya ahamakuningi tchi matchimupa owoma kovita vieni. Tcho kuwo otchilikifha tchokutunguluka kuawo; ya konue otchilikifha tcheyowo malilu naku Huku. ²⁹ Mokonda konue mupewa otchalitcho kuhatavela pé ku Clistu, ya pae mupewa ovio kumuna ohali mokonda yae, ³⁰ mukae otchilua tchi muamuine muami ya natchi pahe mutea tchi muami.