¹ Pae tchipapita omanima ekuinhi naakuana, ami nkhe iyende vali Kocheluchale na Mbalanambe, na Titu nkhu ndjinae. ² Ami mbaendele omukonda yoluambo ya ivehepuliepo ondaka ombua endji mipopi pokati kovipunde. Ami mbapopia pé kombenha nkhu mavamunika vali okutia nge mavatavele okutia ami mingi ovipuka embi viavalela. ³ Pae na Titu engu nkhu ename, engu nkhu eli omungeleko, ahindilua okuhita moviyumbo. ⁴ Tcho tchaetua omukonda yovangu ovakembi omba veya okuyombela vakolovele eyovo endi tunalho ku Yesu Clistu. Owo nkhu vahanda okutupaka moupika. ⁵ Pae otue ahamatutavele no kaphuku, opo otchatchili otcho ndaka ombua konue haiviluke. ⁶ Pae ombenha vapopia okutia ovatumini kavena ku vamphopila. Kavichukifhe kuame puenha nkhu vakalela. Huku kakoyefha kolutu. ⁷ Putcho, owo vamunako mbaomikua kokupopia ondaka ombua kombenha havahete moviyumbo, ngatchi Petulu nkhu makapopia ondaka ombua kombenha vahita moviyumbo, ⁸ pae Huku ingu atalavayea mo Petulu aile omulongefhi kombenha haveyahita moviyumbo, nkhe atalavaya vali muame ndjile owovipunde. ⁹ Pae ku Tiaku na Chefa na Ndjuau omba nkhu veli avazhimbukua ngaombenha nkhu veli avatezhi wongelecha, vanongonoka ombembua endji nkhu mbapewa, owo vanhamunununa okuwoko okulumioko kuonkhenda ku Mbalanambe naku kuami. owo tcho vetchininga opó otue tuende kovipunde, ya vaende kombenha nkhu vahita moviyumbo. ¹⁰ Owo nawo nkhu vahanda tunongonike ovahepi. Tchi naami nkhu mbahanda okuninga. ¹¹ Pae tchi Chefa eya Kodjiokiya, ami mbemukulamina omphapakana, mokonda é nkhuj wapengefha. ¹² Poupe yapua nkhu hakuyeya ovazhiu vamu kotchivei tcha Tiaku, Chefa nkhu ulha pamu novipunde. Ya ovazhiu ombo tchevefhika, é alupo ya aka kokula novipunde, mokonda é nkhu utila ovoma yaombenha vahindila okuhita moviyumbo. ¹³ Novachundeu vakuwo aveliongezhe ku Chefa kokukelenga. Putcho Mbelenambe nae eliwifha metutu lhatcho olhawo. ¹⁴ Pae amitchi mbevemuna owo nkhu kavatezha otchatchili oyondaka ombua, ami ipopi na Chefa pokati kvengi: Okutia onue moyochundeu, ongapi mamulinaminine okuka Ngayochundeu? ¹⁵ Otue omba tuli avachundeu wokutchituamu, ya katuvaningi vanavi ovipunde, ¹⁶ tutchi okutia kutupu ingu apewa ouhunga kovininga viotchitumino, ya upewa kekolelo ku Yesu Clistu. Otue tuezhila kekolelo ku Clistu opo tupewe ouhunga wokolelo Kue ya ahama tupewa kovininga viotchitumino. Mokonda kovininga viotchitumino kutupu onhama maikapewa ouhunga. ¹⁷ Pae pua tuayeva okupewa ouhunga ku Clistu, naotue lumu tuavafhua koyondingavivi, okutia Clistu nge vaila ongamba yopekalo? Po aye! ¹⁸ Pae ami ndjitungu ovipuka embinha ami mbatungulula, po ami mililifha omutungululi wotchitumino. ¹⁹ Mokonda ami kotchipala tchotchitumino, mbatchua kotchitumino, opo ami ndjikae ku Huku. ²⁰ Ami mbahumea pamu na Clistu, ngatchi, ami hami vali, Clistu éaka muami. Omunhu ombu pahe ndjika nawo konhama, ami ndjika kekolelo kondeya Huku, ingu antchanda ya ampha omunhu wae kuami. ²¹ Nge hinhono otchali tcha Huku, omkonda okutia ouhunga ukako mokonda yotchimino, pó Clistu watchua kokuhachiliviya.