¹ Paulu omulongua umu, hamulongua wokunhemba kovazhiu, kuputupu neomuzhiu, ya oku Yesu Clistu naku Huku, Hé engu emututilifha komba vatchua, ² novangu vange avehe nami, oyongelecha zho Kongalacha. ³ Olupando nombembua konue, kotchivei tcha Huku Tate ya nawa Tate Kulu yetu Yesu Clistu, ⁴ engu ahita motchikonda tchoyopekalo zhetu etuyowole kovivi viapahe, koholo ya Huku yetu Tate. ⁵ Kue oumbala ngaukakaeko té komena nokomena. Amém. ⁶ Mbaka mbahakuka unene naonue tchi mamuviluke mondjanga Kondaka ombua endji yelikalela, okulikaleka kokula Nanguinha emuifhana kombembua ya Clistu. ⁷ Kutupu vali ondaka ombua, ya kuno ovanthu vamu omba vemuetea ovivi, ya vahanda okutungulula Ondaka ombua oya Clistu. ⁸ Ya ngaele pua otue, pamu noyo andju zho keulu okuya okumuhela ondaka yelikalela koya enguinha otue tuapopia konue, ngaipewe onkhano ombi. ⁹ Ngatchi tuapopile, ya pahe nkhe mipopi vali: umu ngemuhele ondaka endji yelikalela koya enguinha onue muatavela, endjo ngaipewe onkhano ombi. ¹⁰ Ami Pahe mbahanda eheteko lhovazhiu ene olha Huku? Ine miowola okulemuifha ovazhiu? okutia milolo okulemuifha ovazhiu, pó ami himundapi wa Clistu. ¹¹ Mokonda vango vange, ami mbahanda muive okutia ondaka ombua endji mbapopia kaituke kovanthu. ¹² Ami hitambule kovazhiu, ya hawo vandongefha, ya putchu, mbeihelua na Yesu Clistu. ¹³ Muatea motchipopiwa otchituwo tchange otchikulu kochundaichimu, tchi ami nkhu ndjitezha ongelecha ya Huku, okuitungulula. ¹⁴ Ami kochundaichimu mbaninga vali ovituhi tchapona ovachudeu ovengi omba nkhu tulitue kokuyomukua, okuila vali unene omuhumbi wovituwo viovakulu wange. ¹⁵ Ya tchi Huku ahambukua kokumphangula nkhe nkhu ndjimeyumu lha me, wandjifhana kombembua ¹⁶ apopie Ondeyae muami, Apopiwe pokati kovipunde, ami hitale vali konhama ne komulai, ¹⁷ hilondele vali Kocheluchale ombenha nkhu veli ovalungua nkhe hiyeya, ya putchu, iyende Koalambia ya pae atchuna Kondamachico. ¹⁸ Pae, tcho papita omanima atatu, ilondo Kocheluchale ndji ku Chefa, ya ika nae omala ekuinhi naatatu. ¹⁹ Pae ami ihimimunu neumu ovalongua ovakuawo, okuifhapo pé Tiaku, omuango wa Tate Kulu. ²⁰ Kutchi mimuhonikile, mbatakamifhea kotchipala tcha Huku okutia ami hikembe. ²¹ Tchalapo ami iyende kovilongo vio Kochila noyo Kochilicha. ²² Ami nkhe nkhu hiwe kovingelecha vio Kochundeya endji nkhu iku Clistu; ²³ Ya owo nkhu vatea pé okutia: Inguinha nkhu eli otchita pahe mapopi ekolelo endi nkhu ayeva okungulula. ²⁴ Ya owo nkhu vayimbilia ku Huku motchikonda tchange.