¹ Ze ma biga kutu nina adil be wasat iman, nina indu salam ma Allah be wasat Rabuna ta nina Yesuah al Mesi. ² Al be wasat Huwo nina kaman bi agder dakalu be iman fi neima Towo al nina fogo hasa, wa nina bi afrah fi raja wa mejid ta Allah. ³ Ma de bes, lakin nina kaman bi afrah fi mashakil ta nina wa nina arufu inu taab bi weledu sobur. ⁴ Sobur bi weledu tahamul, wa tahamul bi weledu sifsat al kuwes, wa sifat al kuwes bi weledu raja. ⁵ Wa raja ma bi amulu fadiya ashan muhaba ta Allah kan kubu fi gulub ta nina be wasat ta roho al kudus al wodi le nina. ⁶ Fi zaman al kan nina lisa deifiin Yesuah mutu min ajil katiya fi zaman al munasib. ⁷ Lianu be guwa zol bi mutu ashan geni adil, kaman mumkin zol tani bi mutu ashan zol al kuwes. ⁸ Wa lakin Allah beinu muhaba Towo le nina inu zaman amulu katiya Yesuah mutu ashan nina. ⁹ De ketir shedid ashan kalisu nina hasa be dom Towo, al bi kalisu nina min zalan ta Allah. ¹⁰ Fi zaman al kan nina lisa adu, salau ilaka ta nina ma be wasat mutu ta Jena Towo, al ketir shedid salau ilaka ta nina wa kalisu ninja be haya Towo. ¹¹ Ma bes ashan kida, lakin nina kaman farhaniin fi Allah be wasat Yesuah al Mesi, al nina ligo musalaha be wasat Bito. ¹² Biga be wasat insan wahid katiya dakalu fi duniya, wa be nefsa teriga mutu dakalu be wasat ta katiya, wa mutu bada shetetu le nas kulu, ashan nas kulu amulu katiya. ¹³ Lahadi fi zaman ta namus, katiya kan fi duniya, lakin ma bi kun fi hisab le katiya kan mafi namus. ¹⁴ Lakin mutu hukumu nina min zaman ta Adam lahadi zaman ta Musa, kaman lahadi le nas al ma amulu katiya ze ta Adam ta kalifu awamir, al huwo yau misal le Huwo al kan jai. ¹⁵ Lakin hadiya ma ze katiya, wa kan be katiya ta zol wahid nas ketir mutu, godur shunu biga neima ta Allah wa hadiya al be wasat ta neima ta zol wahid, Yesuah al Mesi, zidu le nas ketir. ¹⁶ Inu hadiya ma ze katiya ta wahid zol, ashan hukum bi ruwa wara wahid katiya,wa bi jibu gata gediya. Lakin hadiya bi ruwa wara katiya ta nas kutar, wa bi jibu tebrir. ¹⁷ Biga kan be katiya ta wahid zol mutu hukumu be wasat wahid, wala bi kun godur shunu le nas al ligo neima wa hadiya ta geni adil bi hukumu fi haya be wasat al wahid. Yesuah al Mesi. ¹⁸ Biga be wasat katiya wahid hukum ja le nas kulu, kaman biga amal ta zol al adil jibu tbrir wa haya le nas kulu. ¹⁹ Ashan be wasat ta katiya ta zol wahid nas kutar hasibu hmon kulu amulu katiya.kaman be wasat ihteram ta zol wahid nas kutar bi kutu adil. ²⁰ Lakin namus dakalu ashan bi zidu katiya, lakin kan katiya zidu, kaman neima bi zidu ketir shedid. ²¹ De bi hasil ashan ze ma katiya bi hukum, fi mutu kaman neima bi hukum be wasat adil le haya al abadiya be wasat ta Yesuah al Mesi Rabuna ta nina.