¹ Ashan kede inta ma indu uzur, inta ya zol al gi hukumu bi teriga al inta gi hukumu ma huwo nas tanin de inta gi hakimu nefsa taki. lianu inta al gi hakimu de, inta kaman gi amulu hajat de. ² Lakin nina inu hukum ta Allah huwo bi hak hasab amail ta nas al gi amulu hajat ze de. ³ Kede ainu ya zol, inta al gi hakimu nas al gi amulu hajat del, wa inta kaman gi amulu, nefsa hajat del, hal inta bi jere min hukum ta Allah? ⁴ Wole inta gi alisu shokol ghina ta kwes ta Allah. wa subur towoal huwo gi akir hukum towo? hal inta ma arufu inu kwes ta Allah ashan bi sibu inta bi tuub? ⁵ Lakin ashan ras gowi taki wa geliba taki al ma deir tuub inta gi limu le nefsa taki zalan fi yom ta zalan de fi yom al Allah bi zahir fogohukum towo al adil. ⁶ Huwo bi hukum kulu wahid hasab amail towo. ⁷ Lakin le nas al kan indu subur fi amail tomon al kwes,humon bi ligo sukur, mejid wa karama wa bi genifi al haya al abadiya. ⁸ Lakin le nas al gi amulu le nefsa tomon, wa ma gi ihtaramu al hak wa lakin gi ihtaramu katiya zalan ta Allah al shedid bi ja. ⁹ Allah bi jibu taab wa kawaris le kulu Roho ta insan al amulu katiya le Yahudi awel wa kaman le Yonani. ¹⁰ Lakin mejid, wa karama wa salam bi kun le kulu zol al amulu kwes. Le Yahudi awel wa kaman le Yonani, ¹¹ Ashan Allah ma gi gesimu au fadilu. ¹² Wa ze ma nas kutar amulu katiya bidun sheriya, kaman bi hakimu humon bidun sheriya. ¹³ Ashan ma bes nas al gi asuma sheriya humon yau kwesin gidam Allah, lakin nas al gi amulu bi sheriya humon yau kwesin. ¹⁴ Ashan le umam al humon ma indu sheriya, humon gi amulu hajat ta sheriya bi tebiya humon sheriya le nufus tomon, hata kan humon ma indu sheriya. ¹⁵ Wa kede, humon gi wori inu al amail al sheriya gi talabude, moktub fi gulub tomon, wa kaman demir tomon gi wori le humon, wa afkar tomon bi kun gi ishteki au gi defa humon ma nefsa tomon. ¹⁶ Wa kaman le Allah, al inu bi hasil fi zaman al Allah bi hakimu asrar ta kulu nas, hasab injil tai, fi Yesuah al Mesi. ¹⁷ Lakin inta gal inu inta Yahudi wa gi teki fi sheriya, wa gi dalama Allah. ¹⁸ Wa arufu irada towo wa arufu hajat al kwes, ashan inta alimu min sheriya. ¹⁹ Wa iza kan inta arufu gal inta kaiid le amiyanwa nur le nas al fi duluma. ²⁰ Wa gi sahu nas al belidiin, wa mualim le iyal sukerin, wa inta indu sura ta ilim wa al hak fi sheriya. Biga kef de bi asir ma teriga al inta gi ish ma huwo. ²¹ Inta al gi alimu nas tanin, wa kef inta ma bi agder alimu nefsa taki? Inta al gi beshiru did serega, hal inta gi seregu? ²² Inta al gi kelim inu kede zol ma amulu zina, hal inta gi amulu zina? Inta al gi akrahu asnam, hal inta serigu haikal? ²³ Inta al dala bi sheriya, hal inta amulu fadiya le Allahbi kasuru sheriya? ²⁴ Ashan isim ta Allah shetimu fi wasat ta Umam, ashan inta, bes ze ma kan katibu. ²⁵ Ashan khitan bi kun indu faida iza kan inta ihterimu sheriya, lakin iza kan inta kasuru sheriya, khitan de bikun mafi biga. ²⁶ Iza kan zol al ma teiru hafisu hajat ta sheriya, hal ma bi hasibu huwo biga muteher? ²⁷ Hal zol al ma teiru de ma bi hukumu inta iza kan huwo gi hafisu sheriya? de ashan inta arufu sheriya al moktub wa khitan, wa lisa inta kasuru ganun! ²⁸ Ashan Yahudi al ta jisim de ma Yahudi, wa khitan al ta jisim wa fi laham de ma khitan. ²⁹ Lakin Yahudi al be juwa wa khitan al ta geliba, al huwo ta Roho, ma al fi kita, al sukuran towo ma gi ja min nas, lakin min Allah.