¹ Bulus, kadam ta Yesuah al Mesi, nadi huwo ashan bi kun rosul, wa huwo wodi nefsa towo le injil ta Allah, ² al huwo waadu min bediri be wasat ta anbiya al fi kitab al mukadas, ³ an jena towo al huwo kan min usra ta Daud hasab jisim. ⁴ Be wasat Roho ta kadasa, huwo kan kelimu be guwa ashan bi kun jena ta Allah be wasat giyama min amwat, Yesuah al MesiRabuna ta nina. ⁵ Al bi wasat towo nina ligo neima ta rosuliya ta ihteram ta iman fi nus ta nas, min ajli isim towo. ⁶ Fi nus ta nas, kaman nadi intum ashan intum bi kun le Yesuah al Mesi. ⁷ Resala de le kulu nas al fi Roma, nas al Allah gi hibu, al nadi humon ashan bi kun nas al kudus, keli neima kun le intum, wa salam min Allah Abu ta nina wa Rabuna Yesuah al Mesi. ⁸ Awelan, ana bi shukuru Allah bi wasat Yesuah al Mesi min ajil intum kulu, ashan iman takum gi wonusu fi alam kulu. ⁹ Allah yau shuhud tai, al ana gi akdim le huwo be Roho tai fi injil ta jena towo, al ana gi zekiru intum be istemrar. ¹⁰ Ana daiman gi talabu fi salawat bitai teriga ashan bi naja be irada ta Allah ashan bi ja le intum. ¹¹ Ana indu niya ashan bi ainu intum, ashan ana bi agder wodi le intum baad min hadiya rohiya, ashan bi sheja intum. ¹² Aw nina bi agder sheja fi beina intum, bi wasat iman ta nas tanin, al huwo kakum wa tai. ¹³ Ana ma deir intum ashan bi nesitu ya kwana tai, inu ana daiman gi hawil ashan bi ja le intum, (lakin ana ma agder lahadi hasa). Ashan ana bi indu samar fi intum, ze ma ana indu fi bagi nas tanin al humon umamiin. ¹⁴ Deinu ana le Yonaniin wa le Ajanib, le nas al negitin wa nas al belidin. ¹⁵ Biga haja al fi le ana, inu ana jahiz ashan bi bashir al injil le intum al fi Roma. ¹⁶ Fadiya mafi le ana, ashan injil, lianu huwo guwa ta Allah le kulasa le kulu zol al amin, le Yahudiin awel, wa kaman le Yonaniin. ¹⁷ Lianu kadasa ta Allah zahir min iman le iman. ze ma kan katibu, "Zol al adil bi hai be iman." ¹⁸ Ashan zalan t Allah zahir min sama did kulu nas ta kujur wa al ma adil, aal humon bi wasat katiya gi gofulu hak ta Allah. ¹⁹ De ashan faarafa ta Allah zahir le humon, Allah wori le humon. ²⁰ Ashan shikil ta hajat al ma gi ainu, ainu min zaman kaliga ta Alam, bi wasat hajat al huwo sala wa be wasat guwa towo al abadiya wa lahut towo. Ashan kida humon ma bi indu uzur. ²¹ De ashan ze ma humon arufu an Allah, huimon ma mejidu huwo ze Allah, wole humon agder wodi shukuran, lakin humon tala belidin fi afkar tomon, wa kaman gulub tomon al duluma al ma gi fahim. ²² Humon gi fekir gal humon negitiin, lakin humon belidin. ²³ Humon geiru mejid ta Allah al ma gi karabu, le shikil wa sura ta insan al gi karabu, wa kaman ta tiyur wa dawab, wa zahifat. ²⁴ Ashan kida Allah selimu humon le shahwat ta gulub tomon le najasa, ashan humon bi karabu jisim tomon fi beina tomon. ²⁵ De humon al gi geiru hagiga ta Allah le kizib, wa le nas al gi abidu kaliga min kan al bi abidu Allah, al gi shukuru lel abad, Amin. ²⁶ Ashan kida, Allah selimu homon le hajat ta duniya, wa nuswan omon geiru elakat al tebiya le al ma tebiya. ²⁷ Wa bi nefs teriga kaman rujal tomon sibu elakat al tebiya ma nuswan, wa humon dakalu fi shahwat ma baad. Del kan rujal al gi amulu elaka al rajil ma rajil wa humon ligo ekab ashan haja al humon genin amulu. ²⁸ Ashan humon ma kutu Allah fi maarafa tomon, Allah wodi le humon fekira al batal ashan keli humon amulu hajat al ma kwes. ²⁹ Humon kan mala bi adam kadasa, katiya, tama, kizib, humon maliyan ma hasada, katulu, ingisamat wa afkar sheitaniya, humon ta suwata. ³⁰ Kerehiya le Allah, kebriya wa turuk ketir ta amulu katiya, humon ma gi ihterimu Abuhat tomon. ³¹ Humon ma gi fahim, ma indum iman, ma indum geliba, wa ma indum rahma. ³² Humon fahim gawanin ta Allah al inu le nas al gi amulu hajat al batal humon bi mutu, lakin humon ma bes gi amulu hajat del, lakin kaman humon mokosutin ma nas al gi amulu.