¹ De al shetetu gum did inta. Gafiru hetta ta medina, ragibu sika, jahizu le harib, juru takum guwa takum sawa. ² Lanu Yahwah bi rija shukul kebir ta Yagub, ze shukul kebir ta Israel, ragmi inu nas al nahabin demiro kurum tumon. ³ Turs ta abtal tuo ahmar, wa asakir libisu gurmus; markibat be nar ta fulas fi yom la jahisu umon, wa sar bi hizu hizu. ⁴ Markibat bi jere guwam fi sikat; umon bi jere gidam wa wara fi sikat. Umon bi bainu ze duo, wa umon bi jere jere ze meleng meleng ta muturu. ⁵ De al bi kasuru inta le gitaat bi nadi ruwasa tuo; umon bi sedimu badum fi duoriya tumon; umon bi istajil ashan bi hajimu hetta ta medina. Turs al kebir jahizu ashan bi hami nas delin al bi hajimu. ⁶ Abuwab al be safa bahar fatau be guwa, wa mahal de karabu. ⁷ Hussab kashifu gumashat tuo wa shilu bara; abeed tuo al abu nusuwan bi kure ze hamam, bi dugu dus tumon. ⁸ Nenawabi naga ze bir ta moyo, be nas tuo bi jere guwam ze moyo. Natnin kuer, ''Wegif, wegif,'' lakin mafi zol ab bi ayinu wara. ⁹ Nakamu takum fidda, nakamu takum dahab, lanu mafi nihaya ta tuo, le nahab ta hajat al giyafa ta Nenawa. ¹⁰ Nenawa fadi wa karban. Geliba ta ayi zol sih, rukuba ta ayi zol bi sedimu sawa, wa bi tala zalan fugu ayi wahid; usat tumon kulu ahmar. ¹¹ Hasa wenu mahal dusu ta usud, mahal al iyal ta ased bi akulu fugu, mahal al ased ma lubuwa bi duru fugu, ma jena ta ased, bidun kuf? ¹² Ased bi sheretu haiwan al uwu gubudu de le gitaat le iyal tuo; uwu bi gata gata haja al uwu gubudu de le labuwa, wa bi mala hufura tuo be laham. ¹³ ''Ayinu, Ana did intakum - de elaan ta Yahwah Rab al junud. Ana bi haragu markibat takum be nar, wa sef bi akulu iyal ta usud takum. Ana bi gata ferisa taki min beled takum, wa sout ta mursilin taki ma bi asumau tani mara.''