¹ Ana kelim, ''Hasa asumatakum, intakum ya ruwasa ta Yagub wa hukam ta bet ta Israel: Hal ma sah le intakum kede fahim adala? ² Intakum al bi akrah shukul kues wa hibu sher, intakum al bi gata gata jilid tumon, laham tumon min udam tumo - ³ intakum al bi akulu jisim ta shaab tai, wa bi gata gata jilid tumon, kasuru udam tumon, wa gata gata umon le gitaat, ze laham ta kujurun, bes ze laham fi tawwa. ⁴ Yala intakum ya hukam bi kure le Yahwah, lakin Ana bi juwabu intakum. Huwo bi dusu usa tuo min intakum fi zaman dak, ashan intakum amulu sher.'' ⁵ Yahwah bi kelim kida, ''Ze ambiya al bi wuduru shaab tai, kan fi zol wedi le umon haja al umon bi akulu, umon wunuso, 'Salam.' Lakin huwo ma kutu haja fi kashmat tumon, umon bi kasisu badun tumon ashan bi haribu did huwo. ⁶ Ashan kida, bi kun bilel le intakum bidun ruya; bikun duluma ashan intakum ma bi amulu shukul kujur. Shemish bi nezil tihit le ambiya, wa yom de bi kun duluma fugu umon. ⁷ Nas al bi ayinu umon bi kun indu faddiya, wa nas al amulu kujur de bi berjilu muk tumon. Umon kulu bi kati kashmat tumon, lanu fi juwab le umon.'' ⁸ Lakin le ana, Ana malian ma guwa min Roho ta Yahwah, wa Ana malian ma adala wa gudura, ashan bi alinu le Yagub katiyat tuo, wa le Israel weled tuo. ⁹ Hasda asuma takum le kalam de, intakum ya ruwasa ta bet ta Yagub, wa hukam ta bet ta Israel, intakum al bi aba adala wa bi kifu ayi haja al adil. ¹⁰ Intakum abinu Sahiun be dum wa Urshelim be sher. ¹¹ Ruwasa takum bi hakim be rushuwa, abunat takum bi alimu nas be gurush, wa ambiya takum bi amulu shukul kujur be gurush. Lisa intakum bi teki le Yahwah wa bi kelim, ''Hal Yahwah ma ma nina? Mafi sher bi ja le nina.'' ¹² Ashan kida, be saba takum , Sahiun bi tala mahal zira, wa Urshelim bi karabu, wa jebel ta haikal bi karabu karabu.