¹ De yao kelima ta Yahwah al ja le Mika Al Morsheti fi ayamat ta Yusam, wa Ahaz, wa Hazkiah, muluk ta Yahuza, al huwo ayinu fi Samira wa Urshelim. ² Asuma takum, intakum ya shaab. Asuma takum ya ard, wa kulu delin la fi fugu. Kede Yahwah yao kun shahid did intakum, Rabuna min haikal tuo al mukadas. ³ Ayinu takum Yahwah bi tala bara min mahal tuo; huwo bi nezil tihit wa duru fi murtafaat ta ard. ⁴ Jubal bi siih gidam tuo; murafaat bi kasuru, ze sheme gidam ta nar, ze moyo al kubu tihit fi mahal al nenzila. ⁵ De kulu ashan katiya ta Yagub, wa ashan katiyat ta bet ta Israel. De shunu yao katiya ta Yagub? Hal de ma Samira? Deshunu yao mahalat al murtefe? Hal de ma Urshelim? ⁶ Ana bi kutu Samira mahal al karabu, mahal zara ta Inab wa bi kubu hujar tuo fi wadi wa Ana bi sibu asas tuo fadi. ⁷ Asnam tuo kulu bi kasuru sukerin sukerin, wa kulu hadiyat al huwo ligu bi aragu be nar, wa Ana bi demiro kulu asnam tuo. Ze ma hiya limu hadiyat tuo min gurush ta shukul zinna, umon bi tala gurush ta shukul zinna tani mara.'' ⁸ Ashan sabab de Ana bi kuer wa ana bi amulu wululu; Ana bi duru hafian wa arian; Ana bi kuer be sout ze banat awa wa bi tala hazinan ze naam. ⁹ Ashan dabara tuo ma indu shiffa, lanu wusulo le Yahuza. Wusulo fi bab ta ta shaab tai, le Urshelim. ¹⁰ Matakum weri kabara tuo fi Jat; matkum kure ta kulu kulu. Fi Bet Affra Ana muru muru nefsa tai fi turab. ¹¹ Mururu takum, ya sukan ta Sahfir, fi shukul ariyan wa faddiya. Ya sukan ta Saanan matakum tala bara. Kure ta Bet Hayasil, ta himaya tumon de shilu bara. ¹² Ashan sukan ta Maros bi istena kabara al kues be tefkir, ashan karisa ja min Yahwah le abuab ta Urshelim. ¹³ Shidu markibat le hasin, ya sukan ta Lachish. Intakum, ya Lachish, mahal ta bidaya ta katiya le biniya ta Sahiun, lanu sher ta Israel kan ligu fugu hiya. ¹⁴ Ashan inta bi wedi hadiya ta sherik le Morsha jet; medina ta Akzib bi kabasu muluk ta Israel. ¹⁵ Ana tani bi jibu waris le intakum, ya sukan ta Marisha; Mejid ta shaab Israel bi ja le Adlam. ¹⁶ Haligu ras taki wa shar taki le iyal al inta bi hibu. Kutu badun taki ze sugur, lanu iyal taki bi ruwa fi sebi.