¹ Yesua tala bara min haikal wa mashi fi terik bitou. Talamiz bitou ja le huwo ashan bi wori le huwo mabna ta haikal. ² Lakin huwo juwabu wa kelimu le umon, ''Intum ma ainu hajat de kulu? Ana bi kelimu le intum hagiga, mafi hajer hata wahid bi sibu fi ras tani al ma bi talau bara.'' ³ Ze huwo geni fi jebel zetun, talamiz ja le huwo be siri wa gal, ''Wori le nina, hajat del bi hasil miten? Alama bita meji(ruju) bitak bikun sunu wa bita akir zaman?'' ⁴ Yesua juwabu wa kelimu le umon, '' Keli intum kun harisin ashan mafi zol bi woduru intum. ⁵ Nas kutar bi ja fi isim bitai. Umon bi kelimu, Ana al Mesih.' wa bi woduru nas kutar. ⁶ Intum bi asuma hurubad wa taharir bita hurubad. Ainu ashan intum ma bi kun fi muskila, hajat del lazim bi hasil; lakin akir zaman lisa, ⁷ Doula bikun did doula tani, mamlaka did mamlaka. Maja wa zalzal bikun fi mahalat kutar. ⁸ Lakin hajat del kulu bikun bes bidaya bita waja ta welada. ⁹ Bad dak umon estelimu intum le azab wa bi katulu intum. Nas kulu fi dual bi karahu intum be sabab bita isim bitai. ¹⁰ Bad dak nas kutar bi waga, wa bi estelimu baadakum wa akra baad. ¹¹ Anbiya al kuzaba bi zahir wa bi woduru nas. ¹² Le-anu adam hafisu ganun bi zid, nas kutar ma bi hibu nas tanin. ¹³ Lakin le zol bi ithamal le akir bi kalisu. ¹⁴ Kabar al kwes bita molokut de bi besihru le alam (Duniya) kulu ze shuhuda le kulu dual(nas) Bad dak akir zaman bi ja. ¹⁵ Ashan kida, fi zaman intum ainu nas al bi karubu(wasaku) hajat bita Allah: Ali nebi Daniel wonusu, bi wogif fi mahal kudus''(keli zol al bi agra afham), ¹⁶ ''Keli nas al fi Yahudiya jere le jubal, ¹⁷ Keli zol al fi ras al bet ma nezil tehet ashan bi shilu ai haja min bet bitou, ¹⁸ wa keli zol al fi mazra ma raja ashan bi shilu gumas bitou. ¹⁹ Lakin woe le del al indum jena wa le del al bi radau iyal suhar fi ayam dak! ²⁰ Seli ashan zaman bita jere bitakum ma bi hasil fi kharif wele yom al ahat. ²¹ Azab bikun fi, ali ma hasal fi bidaya bita duniya lahadi hasa, la, wele bi hasil tanimara. ²² Ile kan ayam dak kan gasiru, ma bi kalisu ai zol. Lakin be sabab bita nas ali azilu(muhtarin) Ayam dak bi gasiru. ²³ Bad dak iza kan ai zol kelimu le intum, 'Ainu, Al Mesih yau hina' wele, Al Mesih yau hinak!' ma takum amin(sedeku). ²⁴ Mesih al kuzuba wa anbiya al kuzuba bi ja wa bi amulu hajaib wa alamat azim, ashan bi woduru intum, iza kan mumkin hata nas al azilu. ²⁵ Ainu, Ana wori le intum gubal zaman. ²⁶ Ashan kida, iza kan umon kelimu le intum, 'Ainu, huwo fi beriya(sahara),' mata kum amshi(rua)fi beriya.Wele, 'ainu, huwo fi dakil bet(oda),' matukum sedeku(amin). ²⁷ Fa ze nur bi wala(zahir) fi sherik wa bi wala share(sika) fi gharib, de yau meji bita Ibin al Insan. ²⁸ Fi mahal al fi ayuwan meit, nusur bi limu hinak. ²⁹ Lakin baad azaab bita ayam dak tawali shemis bikun duluma, gamar ma bi wala, nujum bi waga min fok, wa guwa al fi samah bi hizu. ³⁰ Bad dak alama bita Ibin al Insan bi zahir fi jou, wa kulu gabail fi ardi bikun fi huzun. Umon bi ainu Ibin al Insan fi sihaf be guwa wa mejid azim. ³¹ Huwo bi rasulu malaikat bitou be sot azim bita turumbeta, wa umon bi limu nas al zilu min kulu arba arkan bita duniya fi mahal wahid, min kulu tija ila tija tani ³² Akudu dirasa min shejer al tin. zema fere tala gowi wa bi jada ursal(awurak), Intum bi arufu be inu(gal) kharif biga gerib. ³³ Wa kaman fi zaman intum sufu hajat del, keli intum arufu be inu huwo biga gerib, fi bab hoz. ³⁴ Ana bi kelimu le intum hagiga, jil de ma mutu lahadi hajat del kulu hasal. ³⁵ Samah wa al ard bi futu(yezulan), lakin kalam bitai ma bi futu. ³⁶ Lakin yom wa sah dak mafi zol bi arufu, hata malaikat ta samah, wele al Ibin, lakin ile abu. ³⁷ Ruju bita Ibin al Insan, bikun ze fi ayam bita Noah. ³⁸ Fi ayam dak gubal toufan nas kan bi akulu wa bi asrubu, bi zowuju wa bi wodi banat le zuwaj lahadi fi ayam Noah dakal babur, ³⁹ wa umon ma arufu haja lahadi toufan ja wa katulu umon kulu- ruju bita Ibin al Insan bi kun zede. ⁴⁰ Bad dak itnin rujal bikun fi mazra- bi shilu wahid, wa bi sibu wahid. ⁴¹ Itnin nasawin bi atanu fi murkaka- bi shilu wahid, wa bi sibu wahid. ⁴² Ashan kida keli intum yekun harisin, le-anu intum ma arufu yom al Rabana bitakum bi rija. ⁴³ Lakin keli intum arufu kalam de, lo kan sahib(sidi) bet arufu yatu sah(zaman) fi lel ali harami bi ja, huwo kan bi gafiru wa ma bi sibu harami ashan bi dakalu fi bet tou ashan seregu hajat. ⁴⁴ Ashan kida keli intum kun jahizin, Ibin al Insan bija fi zaman ali intum ma arufu ⁴⁵ Ashan kida munu yau amin wa khadam al indu hikma ali seid bitou jahizu usra tou ashan bi wodi le umon akil tomon fi zaman al sah? ⁴⁶ Baraka le khadam ali seid bitou bi ligo bi amulu hajat del fi wokit huwo rija. ⁴⁷ Ana bi kelim le intum hagiga be inu seid bi kutu huwo fi ras kulu hajat bitou(hagu). ⁴⁸ Lakin izakan khadam al sherir kelimu fi geliba tou, 'seid bita akir,' ⁴⁹ wa bada dugu khudam tanin al ma huwo, wa bi akulu wa bi ashrubu ma sakarin,(sukurjia), ⁵⁰ bad dak seid bita khadam dak bi rija fi yom al khadam de ma bi itwaka wa sah al huwo ma arufu. ⁵¹ Seid bitou bi gata huwo heta heta wa bi wodi mahal le huwo ma nas al mumesilin, fi mahal al fi kore wa adi sunun.