¹ Baad Yesua weledu fi Bethlaham ta Judea fi ayam ta Herodos al Melik, nas ulama min sherik wosulu Urselim kelimu, '' ² Wenu huwo al weledu Melik ta Yahud? Nihna sufu nijima bitou fi sherik wa nihna ja ashan bi abidu huwo.'' ³ Zaman Herodos al melik asma kalam de, huwo zalan, wa kulu Urselim ma huwo. ⁴ Herodos limu kulu ruasa al kuhana wa baad min nas, wa uwo asalu umon, ''wenu Al Mesih al weledu?'' ⁵ Umon kelimu le huwo, ''Fi Bethleham ta Judea, fa da yau al kan katibu be al Anbiya, ⁶ Lakin inta Bethlehem, fi ardi ta Judea, ma yau akhir fi wosat ta khadad ta Judah, fa min inta bija Reis al bi suf nas bitai Israel.'' ⁷ Bad dak Herodos nada rijal al Uluma de wa asalu umon be dapt yatu zaman nijima de kan zahar. ⁸ Uwo rasulu humon le Bethlehem, kelimu, ''Amsu wa fetisu jena al suker de be teriga kwes. Kan intum ligo huwo, jibu kabar de le ana, ashan ana kaman bija wa abidu huwo.'' ⁹ Bad umon asma le melek, umon masi sika tomom, wa nijima al umon kan sufu fi sheriq masha gidam bitomon lahadi ja wogaf fi mahal al jena de fogo. ¹⁰ Zaman umon shafu nijima de, umon farhanin be fara azim. ¹¹ Umon mashu fi bet wa shafu Jena Al suker ma uma bitou Mariam. Umon dengiru tehet wa abidu Huwo. Umon fata santat bitomon wa gedimu hadaya bitomon dahab, Luban, wa Bohur. ¹² Allah anziru umon fi hilim ma kede rajau le Herodos, wa umon rajau le doula tomon be sika tani. ¹³ Bad umon rajau, malaika ta Rabana zahir le Yusif fi hilim wa kelimu, '' gum fok, shilu jena al suker de ma uma bitou, wa jere takum le Masir. Ogot hinak lahadi ana bi wori le inta. Fa Herodos bi fetis jena al suker de ashan bi Katulu. ¹⁴ fi leil dak Yusif gam wa shalu jena al suker de wa uma bitou wa jere le Masir. ¹⁵ Huwo geni hinak lahadi mutu ta Herodos. De kamilu kalam al Rabana kelimu be wasat anbiya,'' min Masir ana nadi jena bitai.'' ¹⁶ Bad dak Herodos, Zaman huwo shafu be inu uluma del kabasu huwo, huwo biga zalan kalis. Huwo rasulu wa katulu kulu iyal al sukerin abu rujal al kan fi Bethlehem wa fi kulu akalim al iyal indu itnin sena wa tehet itnin sena, be asab zaman al rujal ulama kelim be dabt. ¹⁷ Bad dak kamilu kalam al kan wonusu be wasat Nebi Jeremiah, ¹⁸ ''Sot kan asmau fi Ramah, kore wa huzun shedid, Rachel bi kore ashan iyal bitou, Wa hiya aba taziya, le-anu umon biga maf.'' ¹⁹ zaman Herodos maat, malaika ta Rabana zahar fi hilim le Yusif fi Masir wa kelimu, ²⁰ ''Gum fok wa shilu jena ma uma bitou wa amshu le ardi ta Israel, fa del al kan deir yaktul al jena matu.'' ²¹ Yusif gam, shalu jena wa uma bitou wa ja fi ardi ta Israel. ²² Lakin zaman huwo asma be-inu Archelaus bi hakimu Yudea fi mahal ta abu Herodos, huwo kan kafu ashan yemsi hinak. baad Allah anziru huwo fi hilim, Huwo masha le iklim Galileya ²³ wa masha ashan yogot fi asima esmu Nazaretha. De kamilu kalam al kan wonusu be wasat al anbiya, ashan bi nadu huwo Nazarene.