¹ Huwo ja fi zaman al Yesua kalasu kalamat del, huwo tala min Jelil wa ja le iklim(mantika) ta Judea wara nahar Ordon. ² Jamahir masha warau, wa huwo aliju umon hinak. ³ Pharisiyin ja le huwo, bi jeribu huwo, bi kelimu le huwo, '''Hal huwo ganuni le rajil ashan bi talagu mara tou be ai sabab?'' ⁴ Yesua juwabu wa gal, Ha intum ma agara be-inu huwo al kalagu umon min bidaya kalagu umon rajil wa mara? ⁵ Huwo al kalagu umon kaman gal, 'Be sabab de rajil bi sibu abu tou wa uma tou wa bi limu ma mara tou, wa al itnin bikun jisim wahid; ⁶ Umon ma bikun itnin lakin wahid jisim. Ashan kida haja al Allah limu mafi zol keli ferigu.'' ⁷ Umon kelimu le huwo, Lee(malu) bad kida Musa wodi wosia le nina ashan bi wodi waraga talag wa bad dak bi turuju hiya?'' Huwo kelimu le umon, ⁸ ''ashan gulub takum al gowi, Musa sedeku le intum ashan bi talagu nusuwan bitakum, lakin fi bidaya kan ma be teriga dak. ⁹ Ana kelimu le intum, ai zol al bi talagu mara tou, ile bes be kalam zina, wa zowuju mara tani, huwo amulu zina; wa rajil al zowuju mara al talagu huwo amulu zina.'' ¹⁰ Talamiz kelimu le Yesua, Iza kan de yau muskila ta zol dak ma mara tou, huwo ma kwes ashan inta bi zowuju.'' ¹¹ Lakin Yesua kelimu le umon, '' Maa ai zol bi rudu dirasa de, lakin ile del al bi sedeku le umon ashan bi rudu. ¹² fi nas al ma indu Kisia min fi batna bita umahat tomon, wa fi nas al talau kisia tomon be nas tanin, wa fi nas al fekir ashan ma bi zowuju bi sabab bita molokut ta samah. Ai zol al bi gabil dirasa de, keli huwo gabilu.'' ¹³ Bad dak iyal tanin jibu le huwo ashan huwo bi kutu idan bitou le umon wa bi seli, lakin talamiz wobiku(abusu) umon. ¹⁴ Lakin Yesua gal, keli iyal suhar del, wa mata abusu umon ashan ja le ana, molokut ta samah huwo le iyal al suhar.'' ¹⁵ Huwo kutu idan tou fi ras iyal de, wa bad dak huwo tala min hinak. ¹⁶ Asmau, zol ja le Yesua wa gal, ''Mualim, Yatu hajat kwes al ana bi amulu ashan ana biligo haya al abadiya?'' ¹⁷ Yesua kelimu le huwo, Lee(malu) inta bi asalu ana an hajat al kwes? Wahid bes yau kwes, lakin iza kan inta deiru haya, hafisu wosaya.'' ¹⁸ Zol kelim le Yesua, ''Wosaya yatu?'' Yesua gal, '' mata katulu, mata amulu zina, mata seregu, mata kun sahid al kizib, ¹⁹ Ihterim abu bitak wa uma bitak, wa hibu jiran bitak ze nefsak.'' ²⁰ Shab de kelimu le huwo, '' hajat del ana hafisu kulu. Sunu tani al ana deir?'' ²¹ Yesua kelimu le huwo, ''Iza kan inta deir ashan bikun sale, Amshi biyu hajat al inta indak, wa wodi le masakin, wa inta bi indu kazina fi samah; wa tal, wara ana.'' ²² Lakin zaman shab de asuma kalam al Yesua kelimu, Huwo masha(rua) hazin, le- anu huwo indu mumutalakat(mal) ketir. ²³ Yesua kelimu le talamiz bitou, ''Ana bi kelimu le intum hagiga, huwo gowi(saab) le zol al ghaniyan ashan bi dakalu fi molokut bita samah. ²⁴ Ana bi kelimu le intum tanimara, huwo sahil(besit) le jemel bi yemsi be wasat hufra(ena) bita ibira bidal zol al ghaniyan bi dakalu fi mololku ta Allah.'' ²⁵ Fi zaman Talamiz asuma kalam de, umon estagarab wa gal, ''Munu yau biga bi ankizu?'' ²⁶ Yesua ainu le umon wa gal, ''Ma nas kalam de ma besit, Lakin ma Allah huwo besit.'' ²⁷ Bada dak Butrus juwabu wa kelim le Yesua, ''Ainu. nina sibu ai haja wa ja wara inta. Nina bad kida be indu sunu?'' ²⁸ Yesua kelimu le umon, Ana bi kelim le intum hagiga, Fi zaman al jedid Izakan ibin al insan geni fi kursi bitou, Intum al kan douru wara(tabau) ana bi geni kaman fi itnasar karasi, bi hakimu itnasar gebila bita Israel. ²⁹ Ai zol (wahid) al sibu biyut, Akwanu, ikiwatu, abu, umu, iyal, wele watan ashan ana bi akhudu miya marat wa kifaya wa bi ligo(warishu) haya al abadiya. ³⁰ Lakin kutar al kan awel bikun akhir, wa al akhir bikun awel.