¹ Fi zaman Yesua masha yom sebit abri zira-at ta dura. Talamiz bitou biga jiyanin wa yebda amurugu zura wa bi yakul. ² Lakin zaman pharisiyin shafu, Umon kelimu le Yesua, '' Suf, Talamiz bitak bi amulu kalam al ma ganuni al afrut ma bi amulu fi yom Sebit.'' ³ Lakin Yesua kelim le umon, ''Intum ma agra kulu kulu haja al Daud amulu, zaman huwo jiyan, wa nas al kan ma huwo? ⁴ Huwo masha fi bet ta Allah wa akal rakif al kan fi, al ma ganuni le huwo wa ma ganuni le del al kan ma huwo, lakin ganuni bes le kuhana. ⁵ Hal intum ma agra fi ganun, be-inu yom Sebit kuhana fi haikal bi amul hajat al afrud ma bi amulu yom Sebit lakin umon ma indum zam? ⁶ Lakin Ana bi gul le intum be-inu al agbar min haikal fi hina. ⁷ Kan intum arufu mana ta kalam de, 'Indi niya le rahma wa ma zebiha,' intum kan ma bi hakimu nas al ma indum zam. ⁸ Fa ibin al insan huwo Rabana ta Yom Sebit.'' ⁹ Bad dak Yesua sibu mahal dak wa masha le bet ta salawat. ¹⁰ Kan fi zol al ida tou shalal. Al Pharisiiyin asalu Yesua, gal, ''hal huwo ganuni ashan bi aliju fi yom Sebit?'' ashan humon bi tahamu be-inu huwo amulu katiya. ¹¹ Yesua kelimu le umon, ''zol yatu yau bikun fi wasat bitakum, bi kun munu, Kan huwo indu wahid koruf fakat, wa kan koruf de waga fi hufra towil fi yom Sebit, yau ma bi gobudu wa bi juru bara? ¹² Keima tou godur sunu, ta insan min ta koruf! Ashan kida huwo ganuni ashan bi amulu haja kwes fi yom Sebit.'' ¹³ Bad dakYesua kelim le zol de, ''midu ida taki dukri.'' Huwo midu dukri, wa ligo ilaj, ze ta ida tani de. ¹⁴ Lakin Pharisiiyin masha bara wa khatit did huwo. Umon kan bi fetisu teriga al umon bi katulu huwo. ¹⁵ Zema yesua arufu kalam de, huwo tala min hinak. Nas kutar kan masha warau, wa huwo aliju umon kulu. ¹⁶ Huwo amiru umon kede nas tanin ma arufu huwo. ¹⁷ ashan kalam de bikun hagiga, Kalam al kan wonusu be wasat nebi Isaiah, bi gul, ¹⁸ ''Suf, kadam bitai al Ana azilu; al mahbub, fi huwo ana moksut. Ana bi kutu Roho bitai le huwo, wa huwo bi alinu hukum le nas al geir yahudiiyin. ¹⁹ Huwo ma bi zalan wele kore shedid; wele mafi ai wahid bi asuma sot tou fi shawari. ²⁰ Huwo ma bi kasuru ai shejera; huwo ma bi katulu ai dukan ta sijara, lahadi huwo bi kudu adala le intishar, ²¹ wa fi isim bitou nas al geir yahudiyin bi indu raja kamil.'' ²² Bad kida zol tani amiyan wa tamtam, moskun be arua sherir, jabu le Yesua. Huwo aliju zol de, be netija al zol al tamtam de bi wonusu wa bi shuf. ²³ Kulu jamahir kan mustagrabin wa gal, ''hal zol de bikun ibin Daud?' ²⁴ Lakin zaman Pharisiiyin asuma an mujiza de, humon kelimu, ''Zol de ma bi turudu arua sherir bara ile be Belzebul, Amir bita arua sherir.'' ²⁵ Lakin Yesua arufu afkar bitomon wa kelimu le humon, ''Ai molokut mugasm did nefsu ma bi kun sabit, wa ai medina wele bet mugasam did nefsu ma bi wogif. ²⁶ Kan Sitan bi turudu Sitan bara, huwo gesimu did nefsu. Kef al mamlaka de bi wogif? ²⁷ Wa iza ana bi turudu bara arua sherir be Beelzebul, be munu iyal bitakum bi turudu humon bara? Fa le sabab de umon bikun guda bitakum. ²⁸ Lakin iza ana bi turudu arua sherir bara be Roho ta Allah, Ektebiru molokut ta Allah nezil lekum. ²⁹ Kef ai zol bi dakalu fi bet bita zol al indu guwa wa seregu hajat bitou bidun ma robutu zol al indu guwa de awel? Bad dak ashan huwo bi seregu hajat min bet bitou. ³⁰ Zol al ma ana huwo did ana, wa zol al ma bi limu ana bi shetet mini. ³¹ Ashan kida Ana bi kelim le intum, Kulu katiya wa kulu kalamat shar bi afi, lakin kalamat shar did Roho ma bi afi. ³² AI zol bi kelim kalam batal did Ibin al insan, bi afi. Lakin ai zol al kelim batal did Roho Al kudus, ma bi afi huwo. wele fi ardi de, wele fi dak al bi ja. ³³ Amulu shejer kwes wa shamar bitou kwes, wele amul shejer batal wa shamar bitou batal, Shejer bi arufu be shamar bitou. ³⁴ Intum iyal bita dabaib, intum sheririn, intum bi kelim kalam kwes kef? kalam al batal al fi dakil gelib yau kasuma bi gul. ³⁵ Zol al kwes min hajat kwes al fi gelib bitou bi kelim hajat al kwes, wa zol al sherir min hajat al sherir al fi gelib bitou bi kelim hajat sherir. ³⁶ Ana bi kelim le intum be-inu fi zaman bita hukum nas bi wori kulu kilma al batal al umon kelimu. ³⁷ Fa be kilmat bitak inta bikun beri, wa be kilmat bitak bi hakimu inta.'' ³⁸ Bad kida mualimin wa Farisiyin tanin juwabu Yesua wa gal, '''Mualim, Nina kan deirin ashan bi suf alama min inta.'' ³⁹ Lakin Yesua juwabu wa kelimu le umon, ''sherir wa jil bita zina bi fetis alama. Lakin mafi alama bi wodi le huwo ile alama ta nebi Yonah. ⁴⁰ Yonah kan indu talata ayam nahar wa bilel fi batun bita samak kebir, Ibin al Insan kaman bi indu talata ayam nahar wa bilel fi gelib bita ard. ⁴¹ Muatinin bita Niniweh bi wogif fok fi zaman bita hukum be jil bita hasa wa bi hakimu. umon tuubu fi bushara bita Yonah, wa suf, zol tani akbar min Yonah fi hina. ⁴² Melka bita Junub bi gum fok fi zaman bita hukum ma nas bita jil de wa bi hakimu. hiya ja min akir duniya ashan bi asuma hikma bita Solomon, wa suf, Zol al akbar min suliman fi hina. ⁴³ Izakan roho al nijis tala bara min insan, huwo bi yemsi fi tija al ma indu moya wa bi fetis mahal ta raha, lakin ma bi ligo. ⁴⁴ Huwo bi kelim, ' Ana bi rija le bet bitai al Ana ja min fogo.' Bat huwo raja, huwo bi ligo bet dak nedifu bara wa kutu fi nizam. ⁴⁵ Wa huwo bi yemsi ashan bi shilu ma huwo sabah arua tanin aktar minu, wa umon kulu bi ja ashan bi yeish hinak. Wa hala al akir bita zol dak bikun batal min al awel. Huwo bikun bes ze dak ma jil al sherir de.'' ⁴⁶ Zaman Yesua lisa bi kelim le jamahir, Uma bitou wa akwan bitou wagaf bara, deir ashan bi kelim ma huwo. ⁴⁷ Zol tani kelim le huwo, ''suf, uma bitak wa akwana bitak wagifin bara, deir ashan bi kelim ma inta.'' ⁴⁸ Lakin Yesua juwabu wa kelimu le huwo munu kelim le huwo, ''Munu yau uma bitai wa munu yau akwana bitai?'' ⁴⁹ Huwo biga midu yedu le talamiz wa gal, ''Suf Yau uma bitai wa akwana bitai! ⁵⁰ Ai zol al bi amulu irada bita Abu bitai al fi samah, Zol dak yau aku bitai, wa ukut, wa uma.''