¹ Biga Yahwa kelim le Yashu, ² Kelim le shaab ta Israel, gali, Azilu mudun ta malja al ana kelim le itakum Allah ida ta Musa. ³ Amulu de ashan kan zol katulu zol be hadis auo min ger ma huwo bi arufu bi agder ruwa hinak. Mudun de bi kun mahal ta malja min muntaginta dom. ⁴ Huwo bi jere le wahid min mudun de wa bi wogif fi madkal ta bab ta medina. Wadehu hala bitou le gada ta medina dak. Biga humon bi shilu huwo dakil medina wa bi wodi le huwo mahal ashan huwo bi geni fi nus tomon. ⁵ Kan zol al dofuko dom tabi huwo hinak, bigan shaab ta medina ma bi selimu zol al katulu huwo bi intah le al musuliin. Humon ma bi amulu kida leanu huwo katulu jaran bitou ligo huwa ma arufu, wa huwa kan ma indu karahiya tijah bitou min zaman. ⁶ Huwo bi geni fi medina dak lahadi huwo bi wogif gidam ta mejeles le hakum, lahadi mutu ta zol al bi kadimu ze kahin al azim fi Ayam de, biga zol al katulu be don gasit de bi rija le beled bito wa bet bito, le beled al huwo jeri min fogo.” ⁷ Ashan kida Israeliin bi azilu kadesh fi Galile fi medina ta jebel ta naftali, shechem fi medina ta jebel ta Afraim, wa kariath Arba (nefsa Isim zehabron) fi medina ta jebel ta Yahuza. ⁸ Be wasit ta urdun sherik ta Ariha, humon bi Azilu basir fi saharah ala Atraf min gebila ta Rawabin; Ramoth Gilead, min gebila ta Gad; wa Golan fi bashan, min gebila ta Manasseh. ⁹ Del kan yau mudun al Azilu le kulu shaab ta Israel wa le mahal geni ta Ajnabi al garib fi nus bitomon, ashan kida ai zol al katulu zol bi don gasid bi jere le humon le salama bitou. Zol de ma bi mutu be wasit ida ta musulin ta dom, lahadi zol al mutaham de bi wogif gidam ta mejeles.