¹ Hasa ja fi zaman baad mutu ta Musa khadam bita Yahuwa, inu Yahuwa kelimu le Joshua weled bita Nun, naib bita Musa, gali, ² khadam bitai, Musa, mat. Hasa ashan kida gum gata nahar bita Ordon, inta wa shab kulu, fi ard al Ana bi wodi le umon- le shab bita Israel. ³ Ana wodi le intum ai mahal al kura bitakum bi douru fogo. Ana wodi mahal de le intum, ze Ana waadu le Musa. ⁴ Min beriya wa Lebnan, lahadi nahar, Euphrates, kulu ardi bita Hittites, wa le bahr al kebir, mahal al semis bi rua(waga) tehet, bikun ardi takum. ⁵ Mafi zol bi agder ashan bi wogif gidam intum fi haya takum kulu. Ana bikun ma intum ze Ana kan ma Musa. Ana ma bi sibu intum. ⁶ Kun gowi wa shuja. Inta bi kutu shab de ashan bi warisu ard al ana waad le judud Ana bi wodi le umon. ⁷ Kun gowi wa shuja. Kun haris ashan bi tii kulu ganun khadam bitai Musa wasi le inta. Mata aglib min fogo wele yemin au samal. ashan inta bikun naje fi ai inta bi rua fogo. ⁸ Inta daiman kede wonusu an kitab bita ganun de. Inta bi amulu taamulat fi kitab de nahar wa lel ashan inta bi tii kulu hajat al katibu fi fogo. Bad dak inta bi kun ghani wa naji. ⁹ Hal Ana ma wasi inta? kun gowi wa suja! mata kafu. kede niya taki ma gofulu. Yahuwa Allah taki fi ma inta fi ai mahal al inta bi rua fogo. ¹⁰ Bad dak Joshua amiru kaadad bita shab, ¹¹ "Rua be wasat keim wa amiru shab, Jahizu hajat le nefsa takum. Fi talata ayam intum bi gata ordon wa rua imteleku ard al Yahuwa Allah takum bi wodi le intum ashan intum bi imteleku(bikun mosulin). ¹² Le Reubenites, Gadites wa nus bita gebila bita Manasseh, Joshua gal, ¹³ "Zekiru kilma ta khadam bita Yahuwa Musa, amiru intum fi zaman(wokit) huwo gal,' Yahuwa Allah takum bi wodi le intum raha, wa huwo bi wodi le intum ard de.' ¹⁴ Nusuwan takum, iyal takum al suhar, wa bahaim takum bi geni(fadul) fi ard al Musa wodi le intum fi aksa(lahadi) Ordon. Lakin rijal al muharibin(bita sakila) bi rua be akwana takum wa saidu umon ¹⁵ lahadi Yahuwa kalas wodi le akwana takum raha ze huwo wodi le intum. Bad dak umon kaman bi imteleku ardi Yahuwa Allah takum wodi le umon. Bad dak intum bi rija le ardi takum wa imteleku, ard al Musa khadam bita Yahuwa wodi le intum fi aksa Ordon, mahal al semis bi tala fogo." ¹⁶ Bad dak umon juwabu, gal, "kulu kalam al inta amiru be nina nina bi amulu, wa ai mahal al inta bi rasulu nina nina bi rua. ¹⁷ Nina bi ihterimu(tii) inta ze nina kan ihrerimu(tii) Musa. Bes kede Yahuwa Allah taki yekun ma inta, ze huwo kan be Musa. ¹⁸ Ai zol al merid did awamir bitak wa ma bi tii kalamat bitak bi katulu. Bes kede inta kun gowi wa shuja."