¹ Kalam ta Yahwa kan wosulu le Yonan weled ta Amatai gali, ² Gum wa ruwa le ninewe, beled al azim, wa wonusu an huwo, lean usher/batal tomon wosulu le ana! ³ Lakin Yonan kan gum wa jahiz nefsa ashan bi jere min gidam ta Yahwa wa ruwa al gi ruwa le Tershish. Bigo huwo dafa taskara wa dakalu fi sefina ashan bi shilu umon le Tershish, beid min gidam ta Yahwa ⁴ Lakin Yahwa rasulu howa kebir fi bahar al kan biga asifa gowi fi bahar, baad zaman besit sefina kan gi ruwa kasuru. ⁵ Nas al fi sefina kan kafu shedid wa kulu zol bada kore le Rabuna towo, umon bada jada budaat al tegil fi bahar ashan bi kafifu sefina. Lakin Yonan kan ruwa le mahal al jowa shedid fi sefina, wa kan fi juwa num shedid. ⁶ Biga mosoulin ta sefina kan jale huwo wa kelim le huwo, “inta gi amulu shunu ma num? Gum fok, kore/nadi Rabuna bitak mikin Rabuna bitak bi ayinu anina wa nina ma bi mutu, ⁷ Umon kan wonusu le badun “taalu, keli nini jadau gura ashan anina bi aruf munu yau sabab ta kalam batal al ligo anina, “umon kan jadau gura, wa gura kan waga le Yonan. ⁸ Umon kan kelim le Yonan, “malesh, weri le nina munu yau mosoul le batal al hasil le nina, shokol taki shunu, wa inta ja min wein? Beled taki yatu wa inta min yatu nas? ⁹ Yonan kan kelim le umon ana abrani, wa ana gi kafu Yahwa, Rabuna ta sama, al kalagu bahar wa arid al yabis. ¹⁰ Biga rujal del kan kafu ziyada wa kelim le huwo, “lei inta amulu ze de? Le anu rujal del kalas aruf huwo kan gi jere min gidam ta Yahwa, le anu huwo kan wori le umon. ¹¹ Biga umon wori le Yona, “nina bi amulu le inta shunu ashan bahar de bi askot le nina? Leanu bahar biga gi zidu le batal ziyada. ¹² Yonan kelim le umon, arfau ana wa jada takum ana fi bahar, biga bahar bi askot le intum, ashan ana aruf de ashan ana yau hawa al gowi de gi amulu intum” ¹³ Lakin mosoulin ta sefina kan deir sugu ashan bi rija lle wara fi jiha ta wata, lakin umon kan ma agder leanu bahar taki yan ziyada wa ziyada did umon. ¹⁴ Bega umon kan kore le Yahwa wa kelim, “nina gi asalu inta, Yahwa, nina gi asalu inta, mata sibu nina mutu ashan fi hisab ta haya ta rajil de, wa mata kutu le nina galat ta mutu towo, leanu inta Yahwa amulu kalas ze niya taki deir, ¹⁵ Biga umon arfa Yonan wa jada huwo fi bahar, wa bahar kan askot min takiyan towo. ¹⁶ Bega rujal del kan kafu Yahwa ziyada. Umon gedim le Yahwa zabihat wa amulu halifat. ¹⁷ Hasa Yahwa kan jahizu samak kebir ashan bi abula Yonan, wa Yonan kan geni fi batna ta samak talata nahar wa talata bilel.