¹ Biga Ayob juwabo wa kelimo, ² "Asuma kuwas le kalam tai, wa kede de kun tazia takum le ana. ³ Shelo takum sabur ma ana, wa ana kaman bi wonuso; kan ana wonuso, yal aliso takum ana. ⁴ Kan le ana, shakwa tai de le zol? Kan zede malo ruhu tai ana ma bi ishteki? ⁵ Aino takum le ana wa istagarab takum, wa kati kasuma takum. ⁶ Kan ana fekir fi taab tai, ana bi kafu, wa jesim tai bi rogus. ⁷ Le nas al ashrar bi istemir ish, wa tala ajus, wa guwa tumon bi zido? ⁸ Iyal ta iyal tumon bi geni ma tumon, wa iyal ta tumon bi zedi gidam ta eyon tumon. ⁹ Biyut tumon ma fogo khof; wele ikab ta Allah bi nenzil fi humon. ¹⁰ Teran tumon bi zedo; ma bi fashal fi shokol tou; abgar tumon bi weledo wa ma bi jada iyal tumon. ¹¹ Humon bi rasulo iyal tumon ashan alabu bara, wa iyal de bi alabu wa nutu nutu ze iyal ta aghnam. ¹² Humon bi guna be koshkosh wa gitar wa motahin be sot ta mizmar. ¹³ Humon bi itmaata be haia wa najah tumon, wa humon bi mutu be salam wa ruwa fi Hawia. ¹⁴ Humon bi kelimo le Allah, 'Ruwa min anna ashan enna ma dair marafa ta sika taki. ¹⁵ De muno Al Gadir , al lazim kede enna abido huwo? de yatu faida enna bi ligo kan enna abido huwo?' ¹⁶ Aino, najah tumon de ma be iden tumon? Ana ma bi ishatkal ma nasiha ta ashrar. ¹⁷ Kam marra lamba ta ashrar bi batulo, aw mashakil bi waga le humon? Kam marra hasil ino Allah gesimo le humon taab fi wokid ta zalan tou? ¹⁸ Kam marra humon tala ze wasaka ta dura gidam ta hawa aw ze gesh al hawa bi shelo baed? ¹⁹ Intum bi kelimo, 'Allah bi kutu katia ta zol fi iyal tou.' Kede huwo dafa be nefsa tou, ashan huwo bi arufu galat tou. ²⁰ Kede ena tou aino damar tou, wa kede huwo ashrab min gadab ta al Gader. ²¹ Ashan malo huwo bi ihtam be hajat al bi hasil le usura tou baad kan huwo mutu? ²² Fi zol al bi deriso Allah maraf wa huwo yao bi hakimo al mutakabirin? ²³ Fi zol bi mutu wa huwo gawi, bi itmata be raha wa aman. ²⁴ Jisim tou malian, wa juwa ta adum tou (Nikhaa) fi saha tamam. ²⁵ Zol tani bi mutu be waja fi jisi, huwo ma ligo haja kwais fi haya tou kulu kulu. ²⁶ Humon kulu bi mutu wa bi kati be turab; dudu bi kati humon kulu. ²⁷ Aino, ana bi arufu afkar takum, wa teriga al intu bi fekir ino ana galtan. ²⁸ Ashan intum bi kelimo, 'Weno hasa bed ta amir? Weno khema al sherir de kan bi geni fugu?' ²⁹ Intu ma hasil asalo nas al bi safir? Intum ma aruf ino isbat al kelimo, ³⁰ ino zol al sherir hafizo min kawaris, wa shelo huwo min yom ta raha? ³¹ Muno yao bi wonuso le sherir bata tou fi wosa tou? muno yao bi akibu huwo fi hajat al huwo amolo? ³² Lesa bi harago huwo fi hufra; fi zol bi harisu gabur tou. ³³ Turab ta wadi bi kun hilo le huwo; nas kulu bi ruwa wara huwo, ze ma fi nas ketir gidam tou. ³⁴ Kef intum bi shejao ana be kalam fariq, Kan fi kasum takum maf haja ile shkol belid?"