¹ Ayob gum juwabo wa kelimo, ² "Lahadi metain intum bi kutu ana bi taban wa kasutu an suker suker be kelimoat takum? ³ De nimra ashara tou intum bi wonuso; intum ma indo fadia inoa intum wonuso ana be batal. ⁴ Kan huwo hagiga ino ana amolo katia, katia de mushkila tai barao. ⁵ Kan intum bi fekir ino intum afdal min ana wa intum bi istakhdim mushkila tai de did ana, ⁶ kede intum arufu ino Allah yao kutu ana fi taab de wa huwp gubudo ana fi shabaka tou. ⁷ Aino, ana kore shedid, "Zulum!" lakin mafi zol juwabu. Ana nadi musaada, lakin mafi adala. ⁸ Huwo gufulo sika tai ashan ana ma bi mururu, wa huwo nenzil duluma fi sika tai. ⁹ Huwo shelo mejid tai, wa huwo shelo taj min ras tai ¹⁰ Huwo kasuru ana heta heta, wa ana intahet; huwo agila raja tai ze shejera. ¹¹ Huwo kaman kutu zalan tou fi ana, huwo ido ana wahid min adda tou. ¹² Asakir tou limo sawa; humon khatito ashan bi gofulo ana wa humon geni jambu khema tai. ¹³ Huwo kutu akwana tai beiid min ana; ashab tai biga beiidin min ana. ¹⁴ Ahal taii sibo ana; asdika tai al geribin nisitu ana. ¹⁵ Dealin al kan ja defan fi deat tai wa khadimat tai bi aino ana ze garib, ana biga ajnabi le humon. ¹⁶ Ana bi nadi abid tai, lakin huwo ma bi juwabo hata kan ana haniso huwo. ¹⁷ Mara tai ma dear sumu nefes tai; ana biga wasaka fi ena ta akwana tai al min uma wa abu wahid. ¹⁸ Hata iyal al sukerin ma bi rudu ana, kan ana gum ashan bi wonuso, humon bi aliso ana. ¹⁹ Ashab tai kulu al geribin jere min ana; dealin al ana bi hibu aglibu did ana. ²⁰ Adum tai lesegu ma jelid wa laham; ana fadulo bes be jelid ta sunun. ²¹ Hin takum le ana, ya asdika tai, ashan Allah habishu ana. ²² Malu intum bi turuju ana ze ma Allah bi turuju ana? Intum ma shabanin ma jesem tai? ²³ Ana bi itmana kelimat tai de bi katibo tehet! Ana bi itmana bi sejilo fi kitab! ²⁴ Aw ya reat bi katibo be galam min hadid wa rasas fi hajre lel abad! ²⁵ Lakin le ana, ana arufu ino Mukhalis tai hai, wa ino fi nihaya huwo bi wogif fi ard wa dafi ann ana; ²⁶ baad ma ayan demiro jesem tai, lesa be nefsa tai ana bi aino Allah. ²⁷ Ana bi aino huwo be ena tai, mata zol tani. Ana bi tala murtah kan ana bi fekir fi kalam de. ²⁸ Kan intu kelimo, 'Kef enna bi wogif gidam tou! Huwo yao sabab ta mashakil tou kulu,' ²⁹ Kede intum kafu min hukum ta Allah, ashan zalan bi jebu ikaab be seaf, biga intumbi arufu ino fi hukum."