¹ De yao kalam ta Armiya weled ta Halkiah, wahid min kahana ta Anasos fi ard ta Benyamin. ² Kalam ta Yahwah ja le huwo fi ayam ta Yushiah weled ta Amon, melik ta Yahuza, fi sena al numra talatasgr ta hukum tuo. ³ Kaman hasil fi ayam ta Yahuyagim weled ta Yushiah, melik ta Yahuza, lahadi fi shahar nimra kamsa ta sena nimra hidashar ta Sadkiah weled ta Yushiah, melik ta Yahuza, zaman shilu shaab ta Urshelim ze masakin. ⁴ Kalam ta Yahwah ja le ana, kelim, ⁵ ''Gubal Ana ma kalgu inta fi batna, Ana iktar intar; gubal inta ma tala min rehim Ana kadisu inta; Ana kutu inta nebi le umam kulu.'' ⁶ ''Ana kelim, Ah, Rabuna Yahwah!'' ''Ana ma arufu wunuso, lanu ana lisa suker kalis.'' ⁷ Lakin Yahwah kelim le ana, ''Mata kelim, 'Ana suker kalis.' Inta lazim bi ruwa fe ayi mahal al Ana bi rsulu inta fugu, wa inta lazim bi wunuso haja al Ana amiru inta! ⁸ Mata kafu min umon, ashan Ana fi ma inta ashan bi angizu inta- de elaan ta Yahwah.'' ⁹ Yala Yahwah midu ida tuo, wa lemesu kasma tai, wa kelim le ana, ''Hasa, Ana kutu kilima tai juwa kasma taki. ¹⁰ Ana bi kutu inta min aleela musul min umam ketir wa mamalik, ashan bi agila wa kasuru, ashan bi demiro wa nagidu, ashan bi abinu wa zarau.'' ¹¹ Kalam ta Yahwah ja le ana, kelim, ''Inta bi ayinu shunu ya Armiya?'' Ana kelim, ''Ana bi ayinu asaya ta alumunia.'' ¹² Yahwah kelim le ana, ''Inta ayinu kues, lanu an bi kutu bala le kilima tai ashan bi nefizu.'' ¹³ Kelima ta Yahwah ja le ana mara nimra itnin, bi kelim, ''Inta bi ayinu shunu?'' Ana kelim, ''Ana bi ayinu kujiru munfuk wa uasa tuo bi nezil min safa shumal.'' ¹⁴ Yahwah kelim le ana, ''Karisa bi bada ja min shamal le kulu delin al bi geni fi ard. ¹⁵ Ashan Ana bi nadi kulu gabaiel ta mamlaka ta shumal, Yahwah alinu. Umon bi nja, wa ayi wahid bi kutu kuris tuo fi madkal ta abuwab ta Urshelim, did hiat al bi gufulu uwu, wa did kulu modun ta Yahuza. ¹⁶ Ana bi alino hukum tai did sher tumon al umon sibu ana, be aragu bakur le rabunat tanin, wa umon abudu haja al umon yao sala ma idenat tumon. ¹⁷ Jahisu nefsa taki! wegif fuk wa kelim le umon ayi haja al Ana amiro inta. Mata kafu min gidam tumon, ashan kede Ana ma kuofu inta gidam tumon! ¹⁸ Ayinu aleela Ana kutu inta medina al guwi, amuod ta hadid, wa hush ta nihas did ard kulu- did muluk ta Yahuza, wa ruwasa tumon, wa kahanat tumon, wa shaab ta ard. ¹⁹ Umon bi shakila did inta, lakin umon ma bi gilibu inta, ashan Ana bi kun ma inta- de yao elaan ta Yahwah.''