¹ 1Wa baad mutu ta Joshua, iyal ta Israel asalu Rabuna, gal, de munu yahu nimra wahid bi hajimu le nina Canaaniin, al bi shakil did homon? ² Rabuna kelimu, Yahuza yahu bi hajimu, ana wodi musuliya ta ard de fi iden tomon. ³ Biga Yahuza kelim le aku tou Simeon, tali keli nina ruwa sawa ma inta fi ard al wodi le nina ashan nina bi haribu Canaaniin. Wa ana Kaman bi ruwa ma inta fi ard bitak al wodi le inta. Biga gebila ta Simeon ruwa sawa ma huwo. ⁴ Biga nas ta Yahuza hajimu, wa Rabuna kan wodi guwa wa nusra le humon did Canaaniin wa Perizziin. Humon katulu min jama de fi Bezek ashara alaf. ⁵ Humon ligo Adoni- Bezek fi Bezek, wa humon haribu did huwo. Wa katulu Canaaniin wa Perizziin. ⁶ Lakin Adoni- Bezek jere, wa humon turuju huwo wa gobudu huwo, wa humon gata dufur tai den tou al kebir wa ta kura tou Kaman. ⁷ Adoni- Bezek kelim,sebeyiin muluk, al gatau dufu tai den tomon al kubar wa Kaman ta kura tomon, humon kan gi legetu akil min tehet tarabiza tai. Ze ma ana kan amulu, Kaman Rabuna amulu le ana, humon jibu huwo fi Jerualem, wa huwo mutu hinak. ⁸ Nas ta Yahuza ja haribu medina ta Jerusalem wa humon istelimu. Humon hajimu be seef wa humon aragu bi nar. ⁹ Wa baad dak iyal ta Yahuza ruwa haribu Canaaniin al gi geni fi jebel al fi negev, wa fi sahil. ¹⁰ Yahuza ruwa lahadi gedam wa haribu did Canaaniin al gi geni fi Hebron(isim ta Hebron kan Kiriatt arba) , wa humon haribu sheshai Ahiman, wa Talmai. ¹¹ Min hinak iyal ta Yahuza ruwa haribu did sukan ta Debir(Isim ta Debir kan Kiriatt Sepher). ¹² Caleb kelim, ai zol al hajimu Kiriatt Sepher wa Istelimu, ana bi wodi le huwo biniya tai aksah Ashan bi kun mara tou. ¹³ Othniel jena ta Kenaz(al huwo aku al suker ta Caleb) yahu istelimu Debir, Yahu Caleb wodi le huwo Aksah biniya tou ashan bikun mara tou. ¹⁴ Biga Aksah ja le Othniel, wa hiya kelim le huwo ashan bi asalu abu ta hiya ashan bi wodi le hiya mahal zera. Biga zaman hiya kan gi nezil min hemar, Caleb asalu hiya, keli ana amulu le inta shunu? ¹⁵ Hiya kelim le huwo, wodi le ana Baraka ze ma inta wodi le ana ard fi Negev, wa Kaman wodi le ana yanabi ta moya, biga Caleb wodi le hiya yana bi ta moya al fok wa yanabi ta moya al tehet. ¹⁶ Iyal ta Kenite al humon nesiba ta Mosa ruwa min medina ta Nakhil ma iyal ta Yahuza, fi sahara ta Yahuza, al huwo fi Neger. Ashan bi geni ma iyal ta Yahuza gerib ma ard. ¹⁷ Iyal ta Yahuza ruwa sawa ma iyal ta aku tomon Simeon wa humon hajimu Canaaniin al humon sukan ta Zephatt, wa humon demiru humon mara wahid. Isim ta medina de Kan gi nadi Hormah. ¹⁸ Iyal t Yahuza Kaman istelimu Gaza wa mahalat al min hawli Gaza, wqa Kaman Ashkelon wa mahalat al min hawli huwo, wa Ekron wa ardi al min hawli. ¹⁹ Rabuna kan ma iyal ta Yahuza wa humon silu mumtalakat ta medina al kan fi Jebel, lakin humon ma turudu sukan ta wadi leanu humon indu murakabat. Ta hadid. ²⁰ Wodi Hebron le Caleb(zema mosa kelim) wa huwo turudu bara talata iyal ta Anak min hinak. ²¹ Lakin iyal ta Benjamin ma turudu al Jebusiin bara humon sukan ta Jerusalem. Biga al Jebusiin geni ma iyal ta Benjamin fi Jerusalem lahadi yom ta alela. ²² Bet ta Joseph ruwa ashan bi hajimu Bethel, wa kan Rabuna ma humon. ²³ Humon rasul zol,ashan bi jasas an bet Bethel(medina al kan isim tou Luz). ²⁴ Jasusiin del ainu zol gi ja min medina de,wa humon kelim le huwo, min fadlak, wori le nina kef nina bi dakalu fi medina de. Wa nina bi amulu maruf le inta. ²⁵ Huwo wori le humon sika le medina, biga humon hajimu medina de bi seef lakin humon sibu zol de ma usra tou ashan bi ruwa. ²⁶ Biga zol de ruwa fi ard ta Hittites wa abinu medina wa nadi isim tou Luz, wa de yahu isim tou lahadi yom ta alela. ²⁷ Iyal ta Manasseh ma turudu bara nas al geni fi mudun ta Bett shan wan as ta Kariya tou, au Taanach wan as ta kariya tou, au nas al gi geni fi Dor wan as ta kariya tou, au nas al gi geni fi Ibleam wan as ta kariya tou, au nas al gi geni fi Megiddo wan as ta kariya tou, leanu Canaaniin kariri ashan bi geni fi ard dak. ²⁸ Zaman Israel ja tala gowi, humon kutu Cananiin ashan bi akhdim humon be shukulat al saab, lakin humon ma turudu Canaaniin de mara wahid. ²⁹ Ephraim ma turudu bara Canaaniin al gi geni fi Gezer, biga Canaaniin istemir ashan bi geni fi nus tomon fi Gezer. ³⁰ Zebulum ma turudu bara nas al gi geni fi Kitron, au nas al gi geni fi Nahalol, wa biga Canaaniin istemir ashan bi geni fin us tomon, lakin Zebulum asuru Canaaniin ashan bi akhdim humon ma shukul al saab. ³¹ Asher ma turudu bara nas al gi geni fi Akko, au nas al gi geni fi Sidon, au del al gi geni fi Aliab, Akzib, Helbah Abhek, au Rebob. ³² Biga gebila ta Asher geni fi nus ta Cananiin(al humon gi geni fi al ard), leanu humon ma turudu humon bara. ³³ Gebila ta Naphtali ma turudu bara nas al gi geni fi Bett Shemesh, au nas al gi geni fi nus ta Canaaniin (nas al kan gi geni fi ard dak) ala kulu hal, sukan ta Bett Shemesh wa Bett Anatt kan asuru humon ashan bi istakal shukul al saab le Napthali. ³⁵ Amoriin turudu gebila ta Dan bara fi jebel ta medina, ma deir humon ashan bi nezil tehet fi wadi. ³⁴ Biga Amoriin geni fi jebel ta Heres. Fi Aijalon, wa fi Shaalbim, lakin jesh al fi bet ta Joseph gobudu humon, wa asuru humon ashan bi akhdim humon bi shukulat al saab. ³⁶ Hudud ta Amoriin bada min jebel ta Akrabbim fi sela lahadi fi jebel ta medina.