¹ Fi ayamat ta Ahas jena ta Yusam weled ta Uzziah, melik ta Yahuza, Resin melik Aram, wa Fagih weled ta Ramaliah, melik ta Israel, umon ruwa lahadi Urshelim ashan bi shakila did Israel, lakin umon ma ageder gilibu. ² Jibu kabara le bet ta Dauod inu Aram tiffagu ma Afraim, Geliba tuo kafu, wa gulub ta shaab tuo hizu ze ashjar ta gaba be hawa. ³ Yala Yahwah kelim le Ashaya, ''Tala bara ma weled taki Shar-Yashub ashan bi gabilu ma Ahasfi nihaya ta beer al fuk, al fi sika ta mahal zara ta Gasar. ⁴ Weri le huwo, 'Kutu bala taki kues, geni be hudu, mata kafu wele kede inta ma tala faif be kalam ta itnin lisan ta nar al bi tala dukhan, be zalan ta Resin wa Aram, ma Fakih weled ta Ramaliah. ⁵ Aram, Afraim, ma weled ta Ramaliah katitu sher did inta; umon kelim, ⁶ ''Kede inina hajimu Yahuza wa kuofu hiya, wa kede dakalu hinak wa kutu melik ta nina, weled ta Tabeel.'' ⁷ Rabuna Yahwah kelim, ''Ma bi hasil; ma bi hasil, ⁸ ashan ras ta Aram de Damashek, wa ras ta Damashek de Resin. Fi kamsa wa sitteen sena, Afraim be fertiku umon, wa tani ma bi kun shaab. ⁹ Ras ta Afraim de Samira, wa ras ta Samira de weled ta Ramaliah. Kan intakum ma sabit guwi fi iman, be takid intakum ma bi fadulu aminin.''''' ¹⁰ Yala Yahwah tani wunuso le Ahas, ¹¹ ''Asalu mujiza ta Yahwah Allah taki; asalu kan fi umug wele fi tul fuk.'' ¹² Lakin Ahas kelim, ''Ana ma bi asalu, wele ana bi jeribu Yahwah.'' ¹³ Yala Ashaya juwabu, ''Asma takum bet ta Daoud. Uwu ma kifaya ashan shaab taki bi jeribu subur ta nas tanin? Kaman lazim kede intakum jeribu subur ta Allah tai? ¹⁴ Ashan kida Rabuna be nefsa tuo bi wedi le intakum shaab ze mujiza: Ayinu takum, mara al suker bi hamil, bi weledu weled, wa bi nadi isim tuo Immanuel. ¹⁵ Huwo bi akulu zabad wa assel kan huwo arufu ana sher wa hazilu kues. ¹⁶ Lanu gubal jena de bi arufu aba sher wa hazilu kues, wata al itnin muluk de inta bi kafu bi sibu karban. ¹⁷ Yahwah bi jibu fugu intakum, fi shaab takum, wa fi biut ta abuhat takum ayamat al ma kues min ma Afraim sibu Yahuza- huwo bi jibu le intakum melik ta Ashur.'' ¹⁸ Fi zaman dak Yahwah bi afugu sufara le duban al fi abiyar ta Masir al bait, wa le Duban Assel min beled ta Ashur. ¹⁹ Umon kulu bi ja wa istegir fi mahalt al karabu wa fi shuguk ta hujar, wa fi kulu gabat ta shuk wa mahalat al ganamayat bi akulu fugu. ²⁰ Fi zaman dak Rabuna bi haligu be mus al ajiru min gata bahar ta Farat- melik ta Ashur min ras lahadi shar ta kura; wa kaman bi shilu dikin bara. ²¹ Fi yom dak insan bi raba iji ta bagara wa itnin kurfan sukerin, ²² wa ashan leben bi kun ketir al umon bi tala, huwo bi akulu zabad, lanu ayi ziol al fadulu fi beled de bi akulu zabad wa assel. ²³ Fi zaman dak, bi kun fi ayi mahal al fugu alf Jafnna bi kun be alif shekel ta fidda, ma bi kun fi ayi haja bes shuk wa hasak. ²⁴ Rujal bi ruwa fi sead be danga, ashan ard kulu bi kun shuk wa hasak. ²⁵ Umon bi geni bait min murtafaat al kan kuruju ma turia , bait min hasak wa shuk; lakin bi kutu fi mahal al bagarat wa ganamayat bi akulu fugu.